އިންޑިއާ އާއި ސްރީ ލަންކާގައި ކުރިއަށްދާ ޓީ20 ވޯލްޑް ކަޕް ކްރިކެޓް މުބާރާތުގެ ފައިނަލަށް އެންމެ ފަހުގެ ޗެމްޕިއަން އިންޑިއާ އާއި ނިއު ޒީލެންޑް ދަތުރުކޮށްފި އެވެ.
އިންޑިއާ އިން މުބާރާތުގެ ފައިނަލްގެ ޖާގަ އެއް ކަށަވަރުކުރީ ރޭ މުމްބާއީގައި ކުޅުނު ސެމީ ފައިނަލް މެޗުގައި އިންގްލެންޑާ ވާދަކޮށް ހަތް ލަނޑުން މޮޅުވެގެންނެވެ.
އިންޑިއާ އާއި އިންގްލެންޑް ވާދަކުރި ސެމީ ފައިނަލް މެޗުގައި ފުރަތަމަ ކުޅެން އެރީ އިންޑިއާ އިންނެވެ. 20 އޯވަރުގެ ތެރޭގައި ހަތް ކުޅުންތެރިން ނުބައިވެގެން އިންޑިއާ އިން 253 ލަނޑު ހެދި އެވެ. މިއީ ޓީ 20 ވޯލްޑް ކަޕް މުބާރާތެއްގައި މިހާތަނަށް ގައުމަކުން ހެދި އެންމެ މަތީ ސްކޯ އެވެ.
މި އިނިންގްސް ގައި އިންޑިއާ އިން އެންމެ ރަގަޅަށް ކުޅުނީ 42 ބޯޅައިން 89 ލަނޑު ހެދި ސަންޖޫ ސެމްސަން އެވެ. އިންގްލެންޑުން އެންމެ ރަގަޅަށް އުކީ 41 ލަނޑަށް 2 ވިކެޓް ނެގި އާދިލް ރަޝީދެވެ.
ޖަވާބުގައި އިންގްލެންޑުން ކުޅެން އަރައި 20 އޯވަރު ހަމަވި އިރު ހެދުނީ 246 ލަނޑެވެ. އޭރު އިންގްލެންޑަށް ގެއްލިފައި އޮތީ ހަތް ވިކެޓެވެ. އިންގްލެންޑުން އެންމެ ރަނގަޅަށް ކުޅުނީ 48 ބޯޅައިން 105 ލަނޑު ހެދި ޖޭކޮބް ބީތެލް އެވެ. އިންޑިއާ އިން އެންމެ ރަގަޅަށް އުކީ 38 ލަނޑަށް 2 ވިކެޓް ނެގި ހަރްދިކް ޕާންޑިއާ އެވެ.
އިންޑިއާ އާ ދެކޮޅަށް ފައިނަލްގައި ނުކުންނަ ނިއު ޒީލެންޑުން ވަނީ ބުދަ ދުވަހުގެ ރޭ އޮތް ސެމީ ފައިނަލް މެޗުގައި ސައުތު އެފްރިކާ ބަލިކޮށްފަ އެވެ. އެ މެޗު ނިއުޒީލެންޑުން ކާމިޔާބުކުރީ ނުވަ ވިކެޓުންނެވެ.
ނިއު ޒީލެންޑާއި ސައުތު އެފްރިކާ ވާދަކުރި ސެމީ ފައިނަލް މެޗުގައި ސައުތު އެފްރިކާއިން ފުރަތަމަ ކުޅެން އެރި އިރު 20 އޯވަރު ހަމަވެގެން އެ ޓީމަށް ހެދުނީ 169 ލަނޑެވެ. ޖަވާބުގައި ނިއު ޒީލެންޑުން ކުޅެން އަރައި 13 ވަނަ އޯވަރުގެ ތެރޭގައި އެ އަމާޒަށް ވާސިލްވި އެވެ.
މުބާރާތުގެ ފައިނަލް މެޗު އޮންނާނީ އަންނަ އާދީއްތަ ދުވަހު އެވެ. މެޗު ފަށާނީ ރާއްޖޭގެ ގަޑިން އިރު އޮއްސި 6:30 ގަ އެވެ.
