ދިވެހި ޕްރިމިއާ ލީގަށް މިފަހަރު މުޅިން އަލަށް ކޮލިފައިވި ހއ. ދިއްދޫއިން އަމިއްލަ ރަށުގައި ކުޅުނު ފުރަތަމަ ލީގު މެޗުގައި އިއްޔެ ހަވީރު ނިއު ރޭޑިއަންޓް ސްޕޯޓްސް ކްލަބާ ވާދަކޮށް 2-2 އިން އެއްވަރުވެގެން ނިމުނު އިރު މިއީ ދިއްދޫގެ ފުޓްބޯޅައިގެ ތާރީހުގައި މިހާތަނަށް ކުޅުނު އެންމެ ހާއްސަ މެޗެވެ.
ދިއްދޫގެ ފުޓްބޯޅައިގެ ތާރީހުގައި އައި އެންމެ ހާއްސަ ދުވަހަށް އިތުރު ފުރިހަމަ ކަމެއް ގެނެސްދިން އެއް އިއްތިފާގަކީ އިއްޔެ ހަވީރު ދިއްދޫއިން ކުޅުނު މެޗުގައި އިދިކޮޅުން ނުކުތް ޓީމަކަށް ނިއު ރޭޑިއަންޓް ވުމެވެ.
ނިއުރޭޑިއަންޓަކީ ރާއްޖޭގެ ފުޓްބޯޅައިގެ އެންމެ ކާމިޔާބު ކުލަބެވެ. ގައުމީ ފެންވަރުގައި މިހާތަނަށް ބޭއްވި އެންމެ ގިނަ މުބާރާތްތަކުގެ ތަށި އުފުލާލައިފައިވަނީ ނިއު ރޭޑިއަންޓުންނެވެ. އެންމެ ގިނަ ދިވެހިން ސަޕޯޓްކުރާ ކުލަބަކީ ވެސް އެއީ އެވެ.
މި ހާއްސަ މެޗަށް ނިއު ރޭޑިއަންޓް ދިއްދޫއަށް އައުމުން އެ ރަށުން ހޫނު މަރުހަބާއެއް ކިއެވެ. މެޗަށްޓަކައި ދިއްދޫ އޮތީ ވަރަށް ފުރިހަމައަށް ތައްޔާރުވެ ޒީނަތްތެރިކޮށްފަ އެވެ. މީގެ އިތުރުން މި މެޗު ޝަރަފްވެރިކޮށްދެއްވުމަށް ކުޅިވަރާ ބެހޭ ވަޒީރު ޑރ. އަބްދުﷲ ރާފިއު ދިއްދޫއަށް ވަޑައިގެންނެވިިއިރު ދިވެހި ފުޓްބޯޅައަށް އެތައް ހިދުމަތްތަކެއް ކޮށްދެއްވި ބައެއް ބޭފުޅުން ވެސް ވަނީ ވަނީ އިއްޔެގެ މެޗު ބައްލަވާލައްވަން ދިއްދޫއަށް ވަޑައިގެންފަ އެވެ.
އިއްޔެގެ މެޗަށް ދިއްދޫ ނުކުތް އިރު މިފަހަރުގެ ދިވެހި ޕްރިމިއާ ލީގުގައި އެ ޓީމުން މާލޭގައި ކުޅުނު ތިން މެޗުގައި ވެސް ރަގަޅު ކުޅުމެއް ދައްކައިފައި އޮތުމާއެކު އަމިއްލަ ރަށުގައި އެ ކުޅުން މާ ފުރިހަމަ އަށް ތަކުރާރުކުރާނެ ކަމަށް ގިނަ ބަޔަކު ތިބީ ބަލައިގެންނެވެ. އެއާއެކު މެޗު ފަށައިގެން ފުރަތަމަ 15 މިނެޓްގެ ތެރޭގައި ނިއުރޭޑިއަންޓް ކޮޅަށް ދެ ގޯލް ދިއްދޫއިން ވައްދާލުމާއެކު ސަޕޯޓަރުންގެ ފޯރި ވަރަށް ގަދަވި އެވެ. އެކަމަކު ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) އާއި މިދިޔަ ސީޒަންގައި އެންމެ ގިނަ ގޯލް ޖަހައިގެން ރަން ބޫޓް ހާސިލްކުރި އަލީ ފާސިރު (ސެންޓޭ) ގެ އިތުރުން ތަޖުރިބާކާރު ގިނަ ކުޅުންތެރިންތަކެއް ތިބި ނިއު ރޭޑިއަންޓް ބަލިކުރަން ފަސޭހަ ނުވާނެކަން ދިއްދޫގެ ސަޕޯޓަރުންނަށް އޭރުވެސް އެނގެ އެވެ.
އެކަމަކު މެޗުގެ ނަތީޖާ ނިއު ރޭޑިއަންޓަށް ހަމަހަމަކުރެވުނީ މެޗުގެ އިތުރު ވަގުތުގެ ގޮތުގައި ދެއްކި ދިހަ މިނެޓްވެސް ގާތްގަނޑަކަށް ހަމަވެފައި ވަނިކޮށް އެ ޓީމުން ދިއްދޫ ކޮޅަށް ވައްދާލި ދެވަނަ ގޯލާ އެކު އެވެ.
އިއްޔެގެ މެޗުގައި ނިއު ރޭޑިއަންޓާ ވާދަކޮށް ޕޮއިންޓެއް ހޯދުމަކީ އެ ޓީމަށް ލިބުނު ބޮޑު ކާމިޔާބީ އެކެވެ. ލީގުގައި މިހާތަނަށް ނިއު ރޭޑިއަންޓުން ތިން މެޗު ކުޅެފައިވާ އިރު އެ ޓީމަށް ތިން ޕޮއިންޓް ނުލިބި ގޮސްފައިވަނީ ދިއްދޫއާ ދެކޮޅަށް އިއްޔެ ކުޅުނު މެޗުގައި އެކަންޏެވެ. އިއްޔެގެ މެޗާ ނިއު ރޭޑިއަންޓް ކުރިމަތިލީ ވެސް އެ މެޗުގެ ކުރިން އެ ޓީމު ލީގުގައި ކުޅުނު އެންމެ ފަހު މެޗުގައި އެންމެ ފަހުގެ ޗެމްޕިއަން އަދި ދިވެހި ޕްރިމިއާ ލީގު މިހާތަނަށް އެންމެ ގިނަ ފަހަރު ކާމިޔާބުކޮށްފައިވާ މާޒިޔާ ވެސް ބަލިކުރުމަށް ފަހު އެވެ.
ދިއްދޫ އިން އިއްޔެ ނެރުނު ނަތީޖާއާއެކު ގަދަ ވެގެންދާނީ ދިވެހި ޕްރިމިއާ ލީގުގެ ފޯރި އެކަންޏެއް ނޫނެވެ. މިއީ ގިނަ ދުވަސްތަކެއް ވަންދެން ވަޅުޖެހިފައި އޮތް ދިވެހި ފުޓްބޯޅަ އަލުން ނަގާ ކޮޅަށް ޖެހުމަށްޓަކައި ފުޓްބޯލް އެސޯސިއޭޝަން އޮފް މޯލްޑިވްސް އިން ކުރަމުން އަންނަ މަސައްކަތްތަކަށް ވެސް ލިބުނު ބޮޑު ކުރިއެރުމެކެކެވެ. ހިތްވަރެކެވެ. މިއާއެކު ދިވެހި ޕްރިމިއާ ލީގުން ޖާގަ ހޯދުމަށް އެހެން ރަށްރަށުންގެ ޝައުގުވެރިކަން ވެސް އިތުރުވެ، މިހާރަށްވުރެ ބޮޑު އިސްކަމެއް ދީގެން މަސައްކަތްކުރާނެ ކަމަށް ބެލެވެ އެވެ. އެއާއެކު މުޅި ރާއްޖޭގައި ފުޓްބޯޅައިގެ ފޯރި އަލުން އާލާވަމުން އައުމުގެ ފުރުސަތު ބޮޑެވެ.
https://www.fahuminet.com/tournaments/dhivehi-premier-league-202627
ދިވެހި ޕްރިމިއާ ލީގުން ޖާގައެއް ހޯދުމަށްޓަކައި ދިއްދޫއިން ކުރީ ފަސޭހަ ދަތުރެއް ނޫނެވެ. އެއީ ގޮންޖެހުންތައް ގިނަ ދިގު ދަތުރެކެވެ. ފުޓްބޯޅައިގައި ދިއްދޫ އިން މިހާތަނަށް ހޯދި އެންމެ ބޮޑު ކާމިޔާބީއާ ހަމައަށް ވާސިލްވާން ޓީމުގެ ކުޅުންތެރިންނާއި، މެނޭޖްމަންޓުން ވީ އާދަޔާހިލާފް ގުރުބާނީ އެކެވެ. އެ ފަހްރުވެރި ޓީމަށް ދިއްދޫ ރައްޔިތުންގެ ފަރާތުން ދިނީ އެހެން ހުރިހާ ރަށަކުން މިސާލަކަށް ނަގަން ޖެހޭ ވަރުގެ ތައުރީފު ހައްގު ތަރުހީބެކެވެ. އެ ހުރިހާ ކަމެއް އެކުވެގެން ދިއްދޫ އިން ހޯދި އެ ބޮޑު ޝަރަފްގެ އުފާ ރައްޔިތުންނަށް އެންމެ ބޮޑަށް އިހްސާސްވާނެ އެއް ދުވަހަށް ޔަގީނުންވެސް އިއްޔެ ވާނެ އެވެ.
