އެފްއޭއެމް ފުޓްސަލް ޗެމްޕިއަންޝިޕްގެ ޒޯން ދޭއްގެ ސެމީ ފައިނަލުގެ ފަހު ޖާގަ ޅ. ހިންނަވަރުން ހޯދައިފި އެވެ.
ހިންނަވަރު ސެމީގެ ޖާގަ ކަށަވަރުކުރީ ރޭ ކުޅުނު ގްރޫޕް އޭގެ ފަހު މެޗުގައި ވާދަވެރި ކުރިމަތިލުމަކަށް ފަހު ބ. ތުޅާދޫ 2-3 އިން ބަލިކޮށްގެންނެވެ.
ގްރޫޕް އޭ އިން ހިންނަވަރު ސެމީގެ ޖާގަ ކަށަވަރުކުރީ ދެ ވަނަ ޓީމުގެ ގޮތުގަ އެވެ. އެޓީމަށް ތިން މެޗުން 6 ޕޮއިންޓް ލިބުނެވެ. ތުޅާދޫ އަށް ގްރޫޕުގެ ތިން ވަނަ ލިބުނީ ތިން މެޗުން 3 ޕޮއިންޓް ލިބުމުންނެވެ. ގްރޫޕުގެ އެއް ވަނަ ތިން މެޗުން ވެސް މޮޅުވެ އިނގުރައިދޫ ހޯދިއިރު ފުލަށް ދިޔައީ ތިން މެޗުން ވެސް ބަލިވި މަނަދޫ އެވެ.
ރޭގެ މެޗަށް ނުކުތްއިރު ސެމީ އަށް ދިއުމުގެ އެޑްވާންޓޭޖް ބޮޑަށް އޮތީ ތުޅާދޫ އަށެވެ. މެޗު އެއްވަރުކޮށްލައިގެން އެޓީމަށް ސެމީގެ ޖާގަ ލިބެން އޮތްއިރު، އެގޮތަށް ނަތީޖާ ނެރެން ތުޅާދޫން ވަރަށް ހިތްވަރުކުރި އެވެ.
މަނަދޫ ފުޓްސަލް ދަނޑުގައި ކުޅުނު މެޗުގެ ފުރަތަމަ ގޯލު ފުރަތަމަ މިނެޓުގައި ޖެހީ ހިންނަވަރުގެ އިބްރާހީމް ސިމާހް (ތަޑޭ) އެވެ. އޭގެފަހުން ތުޅާދޫން ވަނީ 12 ވަނަ މިނެޓުގައި ހައްޔާން ހަސަން ހުސައިންގެ ގޯލުން ނަތީޖާ ހަމަހަމަކޮށްފަ އެވެ. އޭގެ މިނެޓެއް ފަހުން ހިންނަވަރުގެ ބިދޭސީ ކުޅުންތެރިޔާ މިނޯ އަބޮލްފަޒްލް ވަނީ ހިންނަވަރަށް އަލުން ލީޑު ނަގައިދީފަ އެވެ.
ތުޅާދޫން ދެ ވަނަ ފަހަރަށް ނަތީޖާ ހަމަހަމަކުރީ މެޗުގެ 20 ވަނަ މިނެޓުގަ އެވެ. މި ގޯލު ވެސް ކާމިޔާބުކޮށްދިނީ މުބާރާތުގައި މޮޅު ކުޅުމެއް ދެއްކި ހައްޔާން އެވެ. ތުޅާދޫން މެޗު އެއްވަރުކުރަން މަސައްކަތްކުރަނިކޮށް، ހިންނަވަރުން މެޗުގައި ތިން ވަނަ ފަހަރަށް ލީޑު ނެގީ 36 ވަނަ މިނެޓުގައި ޖެހި ގޯލުންނެވެ. މި ގޯލު ކާމިޔާބުކޮށްދިނީ ވިޖާޒް އީސާ ފުޅެވެ.
މި ލީޑު ނެގުމަށް ފަހު މެޗު ނިމެންދެން ވަނީ ހިންނަވަރުން ވަނީ އެ ނަތީޖާގައި ހިފައްޓާލާފަ އެވެ.
ޒޯން ދޭއްގެ ގްރޫޕް ސްޓޭޖުގެ ފަހު މެޗު ކުޅޭނީ މިއަދު ހަވީރު އެވެ. މި މެޗުގައި ވާދަކުރާނީ ދުވާފަރާއި މަގޫދޫ އެވެ. މި ދެޓީމު ވެސް ވަނީ ސެމީ ފައިނަލުގެ ޖާގަ ކަށަވަރުކޮށްފަ އެވެ. މިއަދުގެ މެޗާ އެކު މި ގްރޫޕުގެ އެއް ވަނަ އާއި ދެ ވަަނަ ކަށަވަރުވާނެ އެވެ. މި ގްރޫޕުގައި ދެން ވާދަކުރީ މުޅި ރާއްޖެ އަށް މަޝްހޫރު އޭދަފުއްޓެވެ. އެކަމަކު ހައިރާންކުރުވަނިވި ގޮތަކަށް ދެ މެޗުން ވެސް ބަލިވި އޭދަފުށި ވަނީ ކަޓައިފަ އެވެ.
https://www.fahuminet.com/tournaments/fam-futsal-north-zone-2
އެފްއޭއެމް ނޯތު ޒޯން އެކެއްގެ މެޗުތައް ވެސް މިހާރު އަންނަނީ ކުޅެމުންނެވެ. ހދ. ނައިވާދޫގައި ކުޅޭ މި ޒޯނުގެ ދެ މެޗު އިއްޔެ ކުޅުނެވެ. އިއްޔެ ހަވީރު ކުޅުނު މެޗުގައި އިހަވަންދޫ ވަނީ 2-1 އިން ހަނިމާދޫ ބަލިކޮށްފަ އެވެ. އަދި ރޭ ފިއްލަދޫ އާއި ކަނޑިތީމު ވާދަކުރި މެޗު ނިމުނީ 2-2 އިން އެއްވަރުވެގެންނެވެ. ޒޯން އެކެއްގެ ލީގު ބުރުގެ މެޗުތައް ދެން ކުޅޭނީ މާދަމާ އެވެ.
