އެފްއޭއެމް ފުޓްސަލް ޗެމްޕިއަންޝިޕްގެ އުތުރުގެ ޒޯން ދޭއްގައި މިއަދު ހަވީރު ނ. މަގޫދޫ އަތުން ހައިރާންކުރުވަނިވި ގޮތަކަށް ބަލިވެ، ފުޓްބޯޅަ އާއި ފުޓްސަލްގައި މަޝްހޫރު ބ. އޭދަފުށި މުބާރާތުން ކަޓައިފި އެވެ.
ރާއްޖޭގެ ފުޓްސަލްގައި ވެސް ބޮޑެތި ގިނަ ކާމިޔާބީތަކެއް ހޯދާފައިވާ އޭދަފުށި މިއަދު މަގޫދޫއާ ވާދަކޮށް ބަލިވީ 2-1 އިންނެވެ.
ފުޓްސަލްގައި އިތުރު ކާމިޔާބީއަކަށް ދާން އުންމީދާ އެކު ނުކުތް އޭދަފުށި މުބާރާތުން ކެޓީ ތިން ޓީމު ހިމެނޭ ގްރޫޕުގެ ދެ މެޗުން ވެސް ބަލިވެގެންނެވެ. ފުރަތަމަ މެޗުގައި ދުވާފަރާ ވާދަކޮށް އޭދަފުށި ބަލިވީ 2-1 އިންނެވެ. މިއަދު ހަމަ އެ ނަތީޖާ އިން ބަލިވިއިރު، ދެ މެޗުގައި ވެސް އޭދަފުށިން ވަނީ މޮޅު ކުޅުމެއް ދައްކައިފަ އެވެ. އެކަމަކު އެޓީމަށް ލިބުނު ފުރުސަތުތައް ގޯލަށް ބަދަލުކޮށްނުލެވުނީ އެވެ.
މަނަދޫ ފުޓްސަލް ދަނޑުގައި މިއަދު ކުޅުނު މެޗުގެ މުޅި ކޮންޓްރޯލް ނެގީ އޭދަފުށިންނެވެ. އެކަމަކު އެޓީމު ކޮޅަށް ދިޔަ މަދު ހަމަލާތައް މަގޫދޫ އިން ވަނީ ގޯލަށް ބަދަލުކޮށްލާފަ އެވެ.
އޭދަފުށީގެ މުޅި ޓީމު ކުރިއަށް ޖެހިގެން ކުޅެނިކޮށް މަގޫދޫން ފުރަތަމަ ގޯލު ޖެހީ ހަތަރު ވަނަ މިނެޓުގައި މުހައްމަދު އިހުސާން އެވެ. ފުރަތަމަ ހާފުގައި ވެސް އޭދަފުށިން މަގޫދޫގެ ގޯލަށް ގިނަ ހަމަލާތަކެއް ފޮނުވާލި އެވެ.
ދެ ވަނަ ހާފު ފަށައިގެން ދެ ވަނަ މިނެޓުގައި އޭދަފުއްޓަށް އުންމީދެއް ހޯދައިދިނީ އަހުމަދު ބައްސާމް މުހައްމަދު ނައީމް (ބައްކު) ޖަހައިދިން ގޯލުންނެވެ. އެކަމަކު މި ގޯލަށް ފަހު ވެސް ޑިފެންސްގައި އަތުރާލާފައި އޮތް މަގޫދޫގެ ގޯލަށް ބޯޅައެއް ވައްދާލެވޭ ގޮތެއްނުވި އެވެ.
ނަތީޖާ 1-1 އިން އެއްވަރުވާން ދިއުމާއެކު މެޗުގެ ފަހު މިނެޓުގައި އޭދަފުށިން ވަނީ ޕަވަރ ޕްލޭ ބޭނުންކޮށްފަ އެވެ. މީގެ ބޭނުންހިފައި މަގޫދޫ އަށް ލިބުނު ކައުންޓާ ބޯޅައެއްގައި ތަޖުރިބާކާރު ކުޅުންތެރިޔާ މުހައްމަދު އައްޒާމް ވަނީ ހުސް ގޯލަކަށް ބޯޅަ ވައްދާލައިގެން ނަތީޖާ 2-1 އަށް ބަދަލުކޮށްލާފަ އެވެ. އައްޒާމްގެ މި ގޯލާ އެކު ރެފްރީ ވަނީ މެޗު ނިންމާލާފަ އެވެ.
ގްރޫޕް ބީ އިން ސެމީ ފައިނަލަށް ހޮވުނީ މަގޫދޫގެ އިތުރުން ދުވާފަރެވެ. ގްރޫޕް އޭ އިން ސެމީ ފައިނަލުގެ ފުރަތަމަ ޖާގަ ހޯދާފައިވަނީ އިނގުރައިދޫ އެވެ. ސެމީގެ ދެ ވަނަ ޖާގަ ލިބޭ ޓީމެއް ކަށަވަރުވާނީ މާދަމާ ރޭ ތުޅާދޫ އާއި ހިންނަވަރު ވާދަކުރާ މެޗުންނެވެ. އެ މެޗު އެއްވަރުކޮށްލައިގެން ވެސް ތުޅާދޫ އަށް ސެމީގެ ޖާގައެއް ލިބޭނެ އެވެ.
https://www.fahuminet.com/tournaments/fam-futsal-north-zone-2
އެފްއޭއެމް ފުޓްސަލް މުބާރާތުގެ ޒޯން ބުރާ ހަމައިން އޭދަފުށި ކެޓުމަކީ އެރަށުގެ ތާރީހަށް ބަލާއިރު ބޮޑު ނާކާމިޔާބީއެކެވެ. މިއީ އޭދަފުށީގެ ފުޓްސަލްގެ ތާރީހުގައި އެޓީމު އެންމެ ދަށްކޮށް ނިންމާލި މުބާރާތެވެ.
މުޅި ރާއްޖެ އަށް ހުޅުވާލައިގެން ކޮންމެ އަހަރަކު ބާއްވާ ގޯލްޑަން ފުޓްސަލް ޗެލެންޖުގެ 8 މުބާރާތުގައި އޭދަފުށި މިހާތަނަށް ވާދަކޮށްފައިވާއިރު، އެއިން އެއްވެސް މުބާރާތެއްގައި ކުއާޓާ ފައިނަލުގެ ކުރިން އެޓީމު ކަޓައިފައެއްނުވެ އެވެ. އަދި 2024 ވަނަ އަހަރު އެޓީމު ވަނީ ފުޓްސަލްގެ މުޅި ރާއްޖޭގެ ޗެމްޕިއަންކަން ވެސް ހޯދައިފަ އެވެ.
