އެފްއޭއެމް ފުޓްސަލް ޗެމްޕިއަންޝިޕްގެ އުތުރުގެ ޒޯން ދޭއްގެ ސެމީ ފައިނަލުގައި ރ. އިނގުރައިދޫ އާއި ނ. މަގޫދޫ ވާދަކުރަން ޖެހުނުއިރު އަނެއް ސެމީގައި ރ. ދުވާފަރާއި ޅ. ހިންނަވަރު ވާދަކުރަން ޖެހިއްޖެ އެވެ.
ނ. މަނަދޫގައި ކުރިއަށްދާ އުތުރުގެ ޒޯން ދޭއްގެ ގްރޫޕް ސްޓޭޖުގެ ކުޅުން މިއަދު ވަނީ ނިމިފަ އެވެ. މިއަދު ކުޅުނީ ގްރޫޕް ބީގެ ފަހު މެޗެވެ. ދުވާފަރާއި މަގޫދޫ ވާދަކުރި އެ މެޗު ނިމުނީ 1-1 އިން އެއްވަރުވެގެންނެވެ.
މި ނަތީޖާއާ އެކު ދުވާފަރާއި މަގޫދޫ ވެސް ނިންމާލީ ހަތަރު ޕޮއިންޓުގަ އެވެ. އަނެއްކޮޅުން މި ދެޓީމު އެހެން ހުރިހާ ގޮތަކުން ވެސް ވީ އެއްވަރެވެ. އެހެންވެ ގްރޫޕުގެ އެއް ވަނަ ކަށަވަރުކުރީ ގުރުނަގައިގެންނެވެ. ގުރު ނަގައިގެން ދުވާފަރަށް ގްރޫޕް ބީގެ އެއް ވަނަ ލިބުނުއިރު މަގޫދޫ އަށް ލިބުނީ ދެ ވަނަ އެވެ.
މި ގްރޫޕުގައި ދެން ވާދަކުރީ ބ. އޭދަފުއްޓެވެ. ދުވާފަރާއި މަގޫދޫ އަތުން ވެސް އޭދަފުށި ބަލިވީ 1-2 އިންނެވެ.
މިއަދުގެ މެޗަށް ނުކުތްއިރު ވެސް ދުވާފަރާއި މަގޫދޫ އޮތީ ސެމީ ފައިނަލް ކަށަވަރުކޮށްފަ އެވެ. އެހެންވެ ހީކުރިވަރުގެ ވާދަވެރިކަމެއް މި މެޗުން ނުފެނުނެވެ. އެކަމަކު ދެޓީމުން ވެސް މޮޅުވާން މަސައްކަތްކުރި އެވެ.
މެޗުގެ ފުރަތަމަ ގޯލު ޖެހީ ދުވާފަރުންނެވެ. މި ގޯލު މެޗު ފަށައިގެން ދެ ވަނަ މިނެޓުގައި ޖެހީ އިބްރާހީމް ރަޝީދު އެވެ. އޭގެ އިރުކޮޅެއް ފަހުން ހަތަރު ވަނަ މިނެޓުގައި މަގޫދޫ އަށް ނަތީޖާ ހަމަހަމަކޮށްދިން ގޯލު ކާމިޔާބުކޮށްދިނީ މިގްދާދު މުހައްމަދެވެ.
ދެ ވަނަ ހާފުގައި ދެޓީމުން ވެސް ހަމަލާތައް އުފެއްދި ނަމަވެސް ގޯލަށް ބަދަލުކޮށްލެވޭގޮތެއްނުވި އެވެ. އެކަމަކު މިހާފުގައި މަގޫދޫގެ ގޯލްކީޕަރު މުހައްމަދު ޖަމީލްގެ މޮޅު ސޭވްތައް ފާހަގަކޮށްލެވުނެވެ. ދުވާފަރުގެ ހަމަލާތައް ހުއްޓުވުމުގައި މުޅި މެޗުގައި ވެސް ދެއްކި މޮޅު ކުޅުމާ އެކު ޖަމީލް ވަނީ މެޗުގެ މޮޅު ކުޅުންތެރިޔާގެ މަގާމް ވެސް ހޯދައިފަ އެވެ.
ގްރޫޕް އޭ އިން އެއް ވަނަ ހޯދީ އިނގުރައިދޫ އެވެ. ދެ ވަނަ ލިބުނީ ހިންނަވަރަށެވެ. ތިން ވަނަ ތުޅާދޫ އަށް ލިބުނުއިރު ފުލަށް ދިޔައީ ތިން މެޗުން ވެސް ބަލިވި މަނަދޫ އެވެ.
https://www.fahuminet.com/tournaments/fam-futsal-north-zone-2
އުތުރުގެ ޒޯން ދޭއްގެ ސެމީ ފައިނަލް މެޗުތައް ކުޅޭނީ ހޮނިހިރު ދުވަހު އެވެ. އެދުވަހު ހަވީރު ކުޅޭ މެޗުގައި އިނގުރައިދޫ އާއި މަގޫދޫ ވާދަކުރާއިރު ދުވާފަރާއި ހިންނަވަރު ވާދަކުރާ ދެ ވަނަ ސެމީ އޮންނާނީ އެރެ އެވެ.
ޒޯން ދޭއްގެ ފައިނަލް މެޗު ކުޅުމަށް ހަމަޖެހިފައިވަނީ އަންގާރަ ދުވަހު އެވެ.
އެފްއޭއެމް ފުޓްސަލް ޗެމްޕިއަންޝިޕްގައި މިހާރު ކުރިއަށްދަނީ އުތުރުގެ ދެ ޒޯންގެ ކުޅުމެވެ. މި ޒޯންތަކަށް ފަހު ދެކުނުގެ ދެ ޒޯންގެ ކުޅުން ވެސް ކުރިއަށްގެންދާނެ އެވެ.
