ރ، ރަސްމާދޫގައި މިހާރު ކުރިއަށްދާ ރ. ވެޓަރަންސް ފުޓްސަލް ޗެލެންޖުގެ ހަވާސާގައި ގިނަ ކަންތައްތަކެއް ހިނގަމުން އަންނައިރު ރޭ އެންމެ ގިނަ ބައެއްގެ ސަމާލުކަން ހުއްޓުނު އެއް ކަމަކީ ހުޅުދުއްފާރާއި، އަނގޮޅިތީމު ވާދަކުރި މެޗަށް ފަހު ހުޅުދުއްފާރު ޓީމުގެ ތަރި އަބްދުލްމަންނާނަށް އިހްތިރާމް އަދާކުރުމުގެ ގޮތުން ރަސްމާދޫ ޓީމުގެ ކެޕްޓަން އިބްރާހިމް މަމްދޫހް (މަންޑޭ) ދެއްކި ރީތި ނަމޫނާ އެވެ.
ރަސްމާދޫ ވެޓަރަންސް ޓީމުގައި މޮޅު ކުޅުމެއް ދައްކަމުން އަންނަ މަންޑޭ ވަނީ ރޭ އަނގޮޅިތީމާ ވާދަކޮށް 0-5 އިން ހުޅުދުއްފާރު ކުރި ހޯދި މެޗުގެ މޮޅު ކުޅުންތެރިޔާގެ މަގާމު ހޯދި މަންނާނަށް ތަފާތު ގޮތަކަށް މަރުހަބާ ކިޔައިފަ އެވެ. މެޗުގެ މޮޅު ކުޅުންތެރިޔާގެ އެވޯޑް މަންނާނުއާ ހަވާލުކުރުމާއެކު އޭނާއަށް މަރުހަބާކިޔަން މަންޑޭ އައީ ހުޅުދުއްފާރުގެ އަވޭ ޖޯޒީ ގައެވެ. ޖޯޒީގެ ފުރަގަހުގައި ވަނީ މަންޑޭގެ ނަންޖަހައިފަ އެވެ.
މީގެ ގާތްގަނޑަކަށް 13 އަހަރު ކުރިން މުޅި ރާއްޖެ އެލަވައަކަށް ހުއްޓުނު "ގިނަ ކެރިޔާ ވާރޭގާ" މި ލަވަ ކިޔައިފައިވާ ހުނަރުވެރި ލަވަކިޔުންތެރިޔާ އަދި ރާއްޖޭގެ ބޮޑުބެރަށް ބޮޑު އިންގިލާބެއް ގެނައި ހަރުބީ ބޮޑުބެރު ގްރޫޕްގެ ލީޑް ވޯކަލިސްޓްގެ ގޮތުގައި ހަރަކާތްތެރިވި މަންޑޭ ވަނީ މުޅި ރ. އަތޮޅަށް ހުޅުވާލައިގެން ކުރިއަށްދާ ވެޓަރަންސް މުބާރާތުގައި މިހާތަނަށް އުފަން ރަށް ރަސްމާދޫ ޓީމަށް ދެ ގޯލް ކާމިޔާބުކޮށްފަ އެވެ.
މަންޑޭ އާއި މަންނާނު އެކުގައި ރޭ ނަގާފައިވާ ފޮޓޯއެއް ހިއްސާކުރަމުން ހުޅުދުއްފާރު ފުޓްސަލް ޓީމުގެ ފޭސްބުކް ޕޭޖުގައި ލިޔެފައިވަނީ މަންޑޭގެ އެ ކުރި ކަމަކީ ވަރަށް ކުޑަކުޑަ ކަމެކޭ ހީވެދާނެ ކަމަށާއި އެކަމަކު އެއީ ވަރަށް ގިނަ މެސެޖުތަކެއް ދޭ ކަމެއް ކަމަށެވެ. އަދި މަންނާނަށް މަރުހަބާ ކިޔަން ހުޅުދުއްފާރުގެ ޖޯޒީގައި އައި އައުން ހުޅުދުއްފާރު ޓީމުން ޝުކުރުވެރިކަމާއެކު ބަލައިގަންނަ ކަމަށް އެ ޕޯސްޓްގައި ލިޔެފައިވެ އެވެ.
މިދިޔަ އަހަރުގެ މުބާރާތުގެ ޓޮޕް ސްކޯރާގެ މަގާމު ހޯދި މަންނާން ވަނީ މިފަހަރުގެ މުބާރާތުގައި މިހާތަނަށް 8 ގޯލް ކާމިޔާބުކޮށް ކުޅުނު ހުރިހާ މެޗެއްގެ މޮޅު ކުޅުންތެރިޔާގެ މަގާމުވެސް ހޯދައިފަ އެވެ.
ރަސްމާދޫ އާއި ހުޅުދުއްފާރަކީ މިދިޔަ އަހަރުގެ މުބާރާތުގެ ފައިނަލްގައި ވާދަކުރި ދެ ޓީމެވެ. އެފަހަރު ހުޅުދުއްފާރުގެ މައްޗަށް ކުރި ހޯދައި މުބާރާތުގެ ތަށި ރަސްމާދޫއިން އުފުލާލީ ޕެނަލްޓީ ޖަހައިގެންނެވެ.
https://www.fahuminet.com/tournaments/r-veterans-futsal-challenge-2026
މިފަހަރުގެ މުބާރާތުގައި ރަސްމާދޫ އާއި ހުޅުދުއްފާރު އެއް ގްރޫޕެއްގައި ވާދަކުރަމުން އަންނައިރު މި ދެ ޓީމުވެސް ވަނީ ކުއާޓާ ފައިނަލްގެ ޖާގަ ކަށަވަރުކޮށްފަ އެވެ. ހުޅުދުއްފާރުން މިއަދު ހަވީރު ރަސްމާދޫއާ ވާދަކޮށް ހޯދި މޮޅާއެކު އެ ޓީމު މި މުބާރާތުގައި މިހާތަނަށް ކުޅުނު ތިން މެޗު ވެސް ވަނީ ކާމިޔާބުކޮށްފަ އެވެ.
