އެމްޕީ ފަލާހް ރ. ވެޓަރަންސް ފުޓްސަލް ޗެލެންޖްގައި ސަޕޯޓަރުންގެ ފަރާތުން ލިބެމުން އަންނަ ތަރުހީބަކީ މުބާރާތުގެ ފައިނަލާ ހަމައަށް އާދެވުމުގެ އެންމެ ބޮޑު އެއް ސަބަބު ކަމަށާއި، ސަޕޯޓަރުންނަށްޓަކައި މުބާރާތުގެ ތަށި މީދޫގެ ފަސްގަނޑަށް ގެންދަން ކުރެވެން ހުރި ހުރިހާ މަސައްކަތެއް ޓީމުން މިރޭ ކުރާނެ ކަމަށް މީދޫ ޓީމުގެ ކޯޗު އިބްރާހީމް ޝަހީރު ބުނެފި އެވެ.
ރަސްމާދޫ ކައުންސިލް އިދާރާ އާޢި ރަސްމާދޫ ޑިވެލޮޕްމަންޓް އެސޯސިއޭޝަންގެ އިތުރުން އެ ރަށު ސްޕޯޓްސް ކްލަބް ގުޅިގެން ކުރިއަށްގެންދާ މި މުބާރާތުގެ ފައިނަލުން މީދޫ ޖާގަ ހޯދައިފައިވަނީ ސެމީ ފައިނަލްގައި މިދިޔަ އަހަރުގެ މުބާރާތް ކާމިޔާބުކުރި ރަސްމާދޫގެ މައްޗަށް 0-1 އިން ކުރި ހޯދައިގެންނެވެ. މި މެޗުގައި މީދޫ އިން ޖެހި ހަމައެކަނި ލަނޑު މެޗުގެ ފުރަތަމަ ހާފުގައި ކާމިޔާބުކޮށްދީފައިވަނީ މުހައްމަދު ސައީދެވެ.
ރ. އަތޮޅުގެ 11 ރަށަކުން ބައިވެރިވި މި މުބާރާތުގައި އަދި މިހާތަނަށް އެއްވެސް މެޗަކުން ބަލިވެފައި ނެތް މީދޫ އިން ވަނީ ގްރޫޕް ސްޓޭޖުގެ ފުރަތަމަ މެޗުގައި އުނގޫފާރުން ދެ ލަނޑު ޖަހައިފައި ވަނިކޮށް ފަހަތުން އަރައި ދެ ގޯލް ޖަހައިގެން މެޗު އެއްވަރުކޮށްފަ އެވެ. ކުއާޓާ ފައިނަލެގެ ޖާގައެއް މީދޫއިން ކަށަވަރުކުރީ ގްރޫޕް ސްޓޭޖުގެ ދެވަނަ މެޗުގައި ދުވާފަރާ ވާދަކޮށް 1-5 ގެ ތަފާތު ބޮޑު ނަތީޖާއަކުން މެޗު ކާމިޔާބުކޮށްގެންނެވެ. ކުއާޓާ ފައިނަލްގައި އިނގުރައިދޫގެ މައްޗަށް މީދޫ އިން ކުރި ހޯދީ 0-2 އިންނެވެ.
މުބާރާތުގައި މީދޫގެ ކުޅުން މެޗަކަށްވުރެ މެޗެއް ރަގަޅުކުރަމުން އައިސްފައި ވާއިރު އެ ޓީމުގެ ސަޕޯޓަރުންގެ ތަރުހީބުވެސް އަންނަނީ މެޗަކަށްވުރެ މެޗެއް ވަރުގަދަ ވަމުންނެވެ. މުބާރާތުގައި މިހާތަނަށް އެންމެ ފޯރިއާއެކު ތަރުހީބު ދެމުން އައި އެއް ބަޔަކަށް މީދޫގެ ސަޕޯޓަރުން ވާނެކަން ޔަގީނެވެ.
އަޅުގަނޑުމެންނަށް މި ފެންނަނީ މެޗަކަށްވުރެ މެޗެއް ސަޕޯޓަރުން ގިނަވަމުން އަންނަ ތަން. އަޅުގަނޑުމެންނަށްވެސް ވަރަށް ބޮޑު ހައިރާންކަމެއް ލިބޭ ވަރުގެ ތަރުހީބެއް ސަޕޯޓަރުންގެ ފަރާތުން ލިބެމުން އަންނަނީ. ހަގީގަތުގަ ޓީމު މިހިސާބަށް އައުމުގެ އެއް އަސްލަކީ ޓީމުގެ ސަޕޯޓަރުން އެ ދެމުން އަންނަ ތަރުހީބު. އެހެންވީމަ ސަޕޯޓަރުންނަށްޓަކައި އަޅުގަނޑުމެން މި ތަށި ހޯދައިދޭން ކުރެވެން ހުރި ހުރިހާ މަސައްކަތެއް މިރޭ ކުރާނަން.
މިރޭގެ މެޗާ ގުޅޭގޮތުން "ފަހުމިނެޓް" އަށް މައުލޫމާތު ދެމުން މީދޫ ޓީމުގެ ކޯޗު އިބްރާހިމް ޝަހީރު ބުނެފައިވެ އެވެ.
ޝަހީރު ބުނިގޮތުގައި އުނގޫފާރު ޓީމަކީ ވަރުގަދަ ޓީމެއް ކަމަށާއި، މުބާރާތުގެ ގްރޫޕް ސްޓޭޖްގައި އެ ޓީމުން އުނގޫފާރާ ވާދަކުރި މެޗު ކުޅުނު އިރު އޮތް ހާލަތާއި، މިރޭގެ މެޗާ ވަރަށް ބޮޑު ތަފާތެއް އެބަހުރި ކަމަށެވެ.
"އުނގޫފާރާ އެއްވަރުކުރި މެޗުގައި އެ ޓީމުގެ އެންމެ މޮޅު ކުޅުންތެރިޔާ (ސައުދުﷲ ހުސައިން) ކުޅެފައެއް ނުވޭ. އެއީ ވަރަށް ތަފާތު މޮޅު ކުޅުންތެރިއެއް. އޭގެ އިތުރުން ފައިނަލް މެޗަށް ވީމަ ޕްރެޝަރުވެސް އޮންނާނެ. އެކަމަކު އަޅުގަނޑަށް ވަރަށް ބޮޑު އުންމީދެއް އެބަ އޮތް މިރޭގެ މެޗު ކާމިޔާބުކުރެވޭނެ ކަމުގެ." މީދޫ ޓީމުގެ ކޯޗު ބުނެފައިވެ އެވެ.
އުނގޫފާރެކޭ އެއްގޮތަށް މީދޫއަށްވެސް އަނިޔާގެ ބައެއް މައްސަލަތައް ކުރިމަތިވެފައި އެބަހުރި ކަމަށާއި، މެޗުގައި ހުރިހާ ކުޅުންތެރިންނަށް ކުޅެވޭނެކަން ޔަގީން ކުރެވޭނޭ މިއަދު ކުޅުންތެރިންނާ ބައްދަލުވުމަށް ފަހު ކަމަށް ކޯޗު ޝަހީރު ރޭ ބުނެފައިވެ އެވެ.
ޝަހީރު އިތުރަށް ފާހަގަކުރި ގޮތުގައި މިރޭގެ މެޗަށް ނުކުންނައިރު އޭނާ އަށް އޮތް އެންމެ ބޮޑު ހިތްހަމަޖެހުމަކީ ކުޅުންތެރިންގެ މަސައްކަތުގެ ރޭޓާއި، މެޗާއި މެދު ކުޅުންތެރިން ވިސްނާ ގޮތް ރަގަޅުވުން ކަމަށާއި، ޓީމުގައި ހުރި ކުދިކުދި ކަންކަން ރަގަޅުކޮށް މިރޭގެ މެޗުން ފުރިހަމަ ނަތީޖާއެއް ނެރެވޭނެ ކަމުގެ ޔަގީންކަން އޭނާއަށް އެބަ އޮތް ކަމަށެވެ.
https://fahuminet.com/tournaments/r-veterans-futsal-challenge-2026
"މިހާ ހިސާބަށް ޓީމު އައިއިރު މެޗަކަށްވުރެ މެޗެއް ކުޅުން ރަނގަޅުކޮށްފަ ވަނީ. އެ ކޮންސިސްޓެންސީ މިރޭވެސް ކުޅުންތެރިންގެ ފަރާތުން ފެންނާނެ ކަމުގެ ޔަގީންކަން އަޅުގަނޑަށް އެބަ އޮތް."
މީދޫ އާއި އުނގޫފާރު ވާދަކުރާ ރ. ވެޓަރަންސް ފުޓްސަލް ޗެލެންޖްގެ ފައިނަލް މެޗު ފަށާނ މިރޭ 08:40 ގަ އެވެ.
