އެފްއޭއެމް އެޓޯލް ފުޓްސަލް ޗެމްޕިއަންޝިޕްގެ އުތުރުގެ ޒޯން ދޭއްގެ ފައިނަލަށް، ކުޅިވަރުގައި އާދަޔާހިލާފު ވާދަވެރިކަމެއް އޮންނަ ރ. އިނގުރައިދޫ އާއި ރ. ދުވާފަރު ދަތުރުކޮށްފި އެވެ.
އުތުރުގެ ޒޯން ދޭއްގައި ހިމެނެނީ ނ، ރ، ބ، އަދި ޅ އަތޮޅެވެ. ޒޯން ދޭއްގެ މެޗުތައް މަނަދޫގައި ކުރިއަށްދާއިރު ފައިނަލުގެ ޖާގައަކާ އެކު ރ. އަތޮޅަށް ނިސްބަތްވާ މި ދެޓީމަށް ވަނީ އުތުރުގެ ރީޖަން ލީގުން ވެސް ފުރުސަތު ލިބިފަ އެވެ.
ޒޯން ފައިނަލުން އިނގުރައިދޫ ޖާގަ ހޯދީ މަނަދޫ ފުޓްސަލް ދަނޑުގައި މިއަދު ހަވީރު ކުޅުނު ސެމީ ފައިނަލް މެޗުގައި 0-5 އިން ނ. މަގޫދޫ ބަލިކޮށްގެންނެވެ. މަގޫދޫ ސެމީގެ ޖާގަ ކަށަވަރުކުރި ދަތުރުގައި، ރާއްޖޭގެ މަޝްހޫރު ރަށް ބ. އޭދަފުށި ކަޓުވާލި އެވެ. އެކަމަކު މިއަދުގެ ސެމީ މެޗުގައި އިނގުރައިދޫ ފެނުނީ މާ ވަރުގަދަކޮށެވެ.
މެޗުގައި އިނގުރައިދޫ އަށް ބޮޑު ލީޑެއް ލިބުމުގެ އަސްލަކީ މޮޅު ކުޅުމަކާ އެކު މެޗުގެ ކުރީކޮޅު ލީޑު ނެގުމެވެ. މި މެޗުގައި އެޓީމަށް ގޯލުތައް ކާމިޔާބުކޮށްދިނީ އަހުމަދު މަޝީދު އާއި އަލީ ހާޒިފް (ހާއްޕެ) ގެ އިތުރުން އަލީ ޝާފިއު އެވެ. މެޗުގައި މަޝީދު އާއި ހާއްޕެ، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ހާއްޕެ އެވެ.
މިރޭ ކުޅުނު ދެ ވަނަ ސެމީގައި ދުވާފަރުން ކުރި ހޯދީ ޅ. ހިންނަވަރުގެ މައްޗަށެވެ. ދުވާފަރު މި މެޗުން މޮޅުވީ 1-4 އިންނެވެ.
މެޗުގައި ދުވާފަރުގެ ހަތަރު ގޯލުގެ ތެރެއިން، މެޗުގެ މޮޅު ކުޅުންތެރިޔާގެ މަގާމް ހޯދި ހަސަން އަޒޫމު އަލީ ދެ ގޯލު ޖެހި އެވެ. ދެން ގޯލު ޖެހީ އިބްރާހީމް އަނާން އަލީ އާއި އެޓީމުގެ އެންމެ ވިދުންގަދަ ތަރި މުހައްމަދު އިސާމް (ޝަންޓޭ) އެވެ. މިއީ ޝަންޓޭ މުބާރާތުގައި ކުޅުނު ފުރަތަމަ މެޗެވެ. އަނިޔާގެ ސަބަބުން އޭދަފުއްޓާއި މަގޫދޫއާ ދެކޮޅަށް ގްރޫޕް ސްޓޭޖުގައި ޝަންޓޭ ނުކުޅެ އެވެ. މިރޭގެ މެޗުގައި ޝަންޓޭ ކުޅުމާ ބައިވެރިވުމަކީ ދުވާފަރަށް ލިބުނު ބޮޑު ހިތްހަމަޖެހުމެކެވެ. މެޗުގައި ހިންނަވަރުގެ ހަމައެކަނި ގޯލު ޖެހީ އަހުމަދު އަޝްރަފެވެ.
އިނގުރައިދޫ އާއި ދުވާފަރު ވާދަކުރާ ޒޯން ފައިނަލް މެޗު އޮންނާނީ އަންގާރަ ދުވަހުގެ ރެ އެވެ.
މި ދެ ރަށަކީ ފުޓްސަލްގައި ރާއްޖޭގައި އޮތް އެންމެ ވާދަވެރި ދެ ރަށެވެ. އަތޮޅު ފެންވަރުގެ މުބާރާތްތަކާއި ގައުމީ ފެންވަރުގެ މުބާރާތްތަކުގައި ވެސް މި ދެ ޓީމު ވާދަކުރާ ކޮންމެ މެޗަކީ ވަރަށް ހޫނު މެޗުތަކެކެވެ. މީގެކުރިން އަތޮޅު މުބާރާތްތަކުގެ އިތުރުން ގޯލްޑަން ފުޓްސަލް ޗެލެންޖުގައި ވެސް ވާދަވެރި މެޗުތަކެއް މި ދެރަށުން ވަނީ ކުޅެފަ އެވެ. ރާއްޖޭގައި މުޅިން އަލަށް ބާއްވާ އެފްއޭއެމް ފުޓްސަލް ޗެމްޕިއަންޝިޕްގެ ޒޯން ފައިނަލުގައި އަނެއްކާ ވެސް މި ދެޓީމުގެ ވާދަވެރިކަމެއް ފެނުމަކީ އާދައިގެ ކަމެއް ނޫނެވެ.
https://www.fahuminet.com/tournaments/fam-futsal-north-zone-2
އުތުރު ރީޖަން ލީގުގައި ވާދަކުރާނީ އުތުރު ސަރަހައްދުގެ ޒޯން އެކެއް އަދި ދެއަކުން ފައިނަލަށް ހޮވޭ ހަތަރު ޓީމެވެ. މި ހަތަރު ޖާގައިގެ ތެރެއިން ތިން ޖާގަ މިހާރު ވަނީ ފައިނަލްވެފަ އެވެ. އެއީ އިނގުރައިދޫ އާއި ދުވާފަރުގެ އިތުރުން ހދ. ނައިވާދޫ އެވެ. ޒޯން އެކަކުން ބާކީ ޖާގަ އަށް ވާދަކުރަނީ ހއ. އިހަވަންދޫ އާއި ށ. ކަނޑިތީމެވެ.
