މުޅި އަތޮޅަށް ހުޅުވާލައިގެން ރަސްމާދޫގައި މިހާރު ކުރިއަށްގެންދާ ރ. ވެޓަރަންސް ފުޓްސަލް ޗެލެންޖްގެ ސެމީ ފައިނަލްގެ މެޗުތައް މިރޭ ކުޅެން ތައްޔާރުވެފައިވާއިރު މިފަހަރުގެ ފައިނަލުން އާ ޓީމެއް ފެނުމުގެ ފުރުސަތު އޮތީ ކިހާ ވަރަކަށްތޯ މިއީ ބައެއް މީހުންގެ ހިތުގައި އުފެދޭނެ ސުވާލެކެވެ.
ރަސްމާދޫ ކައުންސިލް އިދާރާ އާއި، ރަސްމާދޫ ޑިވެލޮޕަމަންޓް އެސޯސިއޭޝަންގެ އިތުރުން އެރަށު ސްޕޯޓްސް ކްލަބް ގުޅިގެން ކުރިއަށްގެންދާ ވެޓަރަންސް ފުޓްސަލް މުބާރާތުގެ ސެމީ ފައިނަލްގައި މިފަހަރު ވާދަކުރަނީ މިދިޔަ އަހަރުގެ މުބާރާތުގެ ފައިނަލްގައި ކުޅުނު ރަސްމާދޫ އާއި ހުޅުދުއްފާރުގެ އިތުރުން މީދޫ އާއި އަދި މުބާރާތުގައި މިފަހަރު މުޅިން އަލަށް ބައިވެރިވި އުނގޫފާރެވެ.
މިރޭ ކުޅޭ ސެމީ ފައިނަލްގެ ފުރަތަމަ މެޗުގައި ހުޅުދުއްފާރާއި، އުނގޫފާރު ބައްދަލުކުރާއިރު ހުޅުދުއްފާރު ސެމީ ފައިނަލުން ޖާގަ ހޯދައިފައިވަނީ ގްރޫޕް ބީގެ ދެވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދި މާކުރަތުގެ މައްޗަށް 0-7 އިން ކުރި ހޯދައިގެންނެވެ. މިއީ މި މުބާރާތުގައި މިހާތަނަށް ނުކުތް އެންމެ ތަފާތު ބޮޑު ނަތީޖާ އެވެ. އަދި، މިއީ މި ނަތީޖާ ހުޅުދުއްފާރުން މި މުބާރާތުގައި ނެރުނު ދެވަނަ ފަހަރެވެ. އެ ޓީމުން ވަނީ ގްރޫޕް ސްޓޭޖުގެ ފުރަތަމަ މެޗުގައި އަނގޮޅިތީމު ކޮޅަށްވެސް ހަތް ގޯލް ޖަހައިފަ އެވެ.
މިފަހަރުގެ މުބާރާތުގެ ސެމީ ފައިނަލުން އުނގޫފާރު ޖާގަ ހޯދައިފައިވަނީ ގްރޫޕް ބީގެ އެއްވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދި މަޑުއްވަރި 3-4 އިން ބަލިކޮށްގެންނެވެ. ފޯރިގަދަ ކުޅުމެއް ފެނުނު ކުއާޓާ ފައިނަލްގެ މި މެޗާ ހަމައަށް އައިއިރު ބައިކޮޅަށް އެންމެ ގޯލެއް ވަދެފައި އޮތް މަޑުއްވަރިގެ މައްޗަށް ކުއާޓާ ފައިނަލްގައި އުނގޫފާރުން ކުރި ހޯދީ މެޗުގެ ނަތީޖާ 3-3 އިން އެއްވަރުވެފައި ވަނިކޮށް އެންމެ ފަހު މިނެޓްގައި އެ ޓީމުން ކާމިޔާބުކުރި ގޯލުންނެވެ.
މިފަހަރުގެ މުބާރާތަށް އެންމެ ފުރިހަމައަށް ތައްޔާރުވި ޓީމުތަކުގެ ތެރޭގައި ހިމެނޭ ހުޅުދުއްފާރުން ވަނީ މި މުބާރާތުގައި މިހާތަނަށް އެ ޓީމު ކުޅުނު ހުރިހާ މެޗެއް ކާމިޔާބުކޮށްފަ އެވެ. މުބާރާތުގައި މިހާތަނަށް ހުޅުދުއްފާރުން ކުޅުނު ހަތަރު މެޗުގައި 22 ގޯލް ކާމިޔާބުކޮށްފައިވާއިރު އެ ޓީމު ކޮޅަށް ވަދެފައިވަނީ ގްރޫޕް ސްޓޭޖުގައި ރަސްމާދޫއިން ވައްދާލި ދެ ގޯލް އެކަންޏެވެ.
އަނެއްކޮޅުން ތިން ޓީމު ވާދަކުރި ގްރޫޕް ސީގައި ހިމެނުނު އުނގުފާރުން މި މުބާރާތުގައި މިހާތަނަށް ކުޅުނު ތިން މެޗުގެ ތެރެއިން ގްރޫޕް ސްޓޭޖުގައި ކުޅުނު ދެ މެޗު ވެސް ވީ އެއްވަރެވެ. މުބާރާތުގައި މިހާތަނަށް އުނގޫފާރުން ހަ ގޯލް ކާމިޔާބުކޮށްފައިވާއިރު އެޓީމު ކޮޅަށް ފަސް ގޯލް ވަނީ ވަދެފަ އެވެ.
އުމުރުން 40 އަހަރުން މަތީގެ މީހުންނަށް އެކަނި ކުޅެވޭ ގޮތަށް ކުރިއަށްދާ ރ. ވެޓަރަންސް ފުޓްސަލް ޗެލެންޖުގެ ސެމީ ފައިނަލްގެ ދެވަނަ މެޗުގައި މިދިޔަ އަހަރުގެ ޗެމްޕިއަން ރަސްމާދޫ އާއި މީދޫ މިރޭ ވާދަކުރާއިރު ރަސްމާދޫއިން ސެމީ ފައިނަލްގެ ޖާގަ ކަށަވަރުކުރީ ކުއާޓާ ފައިނަލްގައި ރަސްގެތީމާ ވާދަކޮށް 1-2 އިން މޮޅުވެގެންނެވެ. މުބާރާތުގެ ސެމީ ފައިނަލުން މީދޫ ޖާގަ ހޯދައިފައިވަނީ އިނގުރައިދޫގެ މައްޗަށް 0-2 އިން ކުރި ހޯދައިގެންނެވެ.
މިފަހަރުގެ މުބާރާތުގައި ޗެމްޕިއަން ރަސްމާދޫއަށް ދިމާވެފައި އޮތް އެންމެ ބޮޑު އެއް މައްސަލައަކީ ގޯލް ޖަހަން ލިބޭ ފުރުސަތުތަކުގެ ބޭނުން އެންމެ ރަގަޅަށް ނުހިފުމެވެ. މިފަހަރުގެ މުބާރާތުގައި ރަސްމާދޫ އަށް އެއްވެސް މެޗެއްގައި ދެ ގޯލަށްވުރެ ގިނައިން ކާމިޔާބުކުރެވިފައެއް ނެތެވެ. ރަސްމާދޫ އިން މުބާރާތުގައި ކުޅުނު ހަތަރު މެޗުގައި ޖެހިފައިވަނީ އެންމެ ހަތް ގޯލެވެ. އެ ޓީމު ކޮޅަށް ފަސް ގޯލް ވަނީ ވަދެފަ އެވެ.
ރަސްމާދޫއަށްވުރެ މަދުން މި މުބާރާތުގައި މީދޫ މެޗު ކުޅެފައި ވީނަމަވެސް މީދޫ އިން ވަނީ މި މުބާރާތުގައި ރަސްމާދޫއަށްވުރެ ގިނައިން ގޯލް ޖަހައިފަ އެވެ. މިފަހަރުގެ މުބާރާތުގައި މީދޫއިން މިހާތަނަށް ނުވަ ގޯލް ޖަހައިފައިވާ އިރު އެ ޓީމު ކޮޅަށް ވަދެފައިވަނީ އެންމެ ތިން ގޯލެވެ. މީދޫ އިން މި މުބާރާތުގެ ގްރޫޕް ސްޓޭޖުގައި ކުޅުނު ދެ މެޗަށް ބަލާއިރު ފުރަތަމަ މެޗުގައި އުނގޫފާރާ ވާދަކޮށް 2-2 އިން އެއްވަރުކުރީ އުނގޫފާރުން ދެ ގޯލް ޖަހައި ކުރި ހޯދާފައި އޮއްވަ އެވެ. ދެވަނަ މެޗުގައި ދުވާފަރުން ގޯލެއް ޖަހައި ކުރި ހޯދައިފައިވަނިކޮށް މީދޫ އިން ވަނީ ފަސް ގޯލް ޖަހައިފަ އެވެ.
https://fahuminet.com/tournaments/r-veterans-futsal-challenge-2026
ރ. ވެޓަރަންސް ފުޓްސަލް މުބާރާތުގައި މިރޭ ކުޅޭ ދެ މެޗަކީވެސް ސަޕޯޓަރުންގެ ފޯރި ގަދަވާނެ މެޗުތަކަކަށް ވާނެ ކަމަށް ބެލެވެ އެވެ. މުބާރާތުގެ ސެމީ ފައިނަލްގައި ކުޅޭ އެހެން ރަށްރަށާ ރަސްމާދޫއާ ކައިރި ވުމާއި، މި ދުވަސްވަރަކީ މޫސުން ރަގަޅު ދުވަސްވަރަކަށް ވުމާއެކު ގިނަ އަދަދެއްގެ ސަޕޯޓަރުން މިރޭގެ މެޗުގައި ރަށު ޓީމަށް ތަރުހީވުދޭން ރަސްމާދޫއަށް ދާނެ ކަމަށް ބެލެވެ އެވެ.
މިހުރިހާ ކަމަކަށް ބަލާއިރު މިރޭގެ ސެމީ ފައިނަލް ކާމިޔާބުކޮށް އާ ޓީމަކުން ފައިނަލްގެ ފުރުސަތު ހޯދުމަކީ ހަމަ ވެދާނެ ކަމެކެވެ.
