ރ. ރަސްމާދޫގައި މިހާރު ކުރިއަށްދާ އެމްޕީ ފަލާހް ރ. ވެޓަރަންސް ފުޓްސަލް ޗެލެންޖުގެ ކުއާޓާ ފައިނަލް މެޗުތަކުން މޮޅުވެ، ހުޅުދުއްފާރާއި އުނގޫފާރު އަދި މީދޫގެ އިތުރުން ރަސްމާދޫ އިން ސެމީ ފައިނަލުގެ ޖާގަ ހޯދައިފި އެވެ.
އުމުރުން 40 އަހަރުން މަތީގެ ކުޅުންތެރިންނަށް އަމާޒުކޮށްގެން ރަސްމާދޫ ފުޓްސަލް ދަނޑުގައި ކުރިއަށްގެންދާ މުބާރާތުގެ ކުއާޓާ ފައިނަލުގެ ހަތަރު މެޗު ވެސް ކުޅުނީ މިއަދު އެވެ.
މިއަދު ހަވީރު ކުޅުނު ފުރަތަމަ މެޗުގައި މާކުރަތާ ވާދަކޮށް ހުޅުދުއްފާރު ކުރި ހޯދީ 0-7 އިންނެވެ. ހުޅުދުއްފާރުން މާބޮޑަށް ވެސް ތަފާތު މޮޅު ކުޅުމެއް ދެއްކި މި މެޗުގައި އެޓީމަށް ގޯލުތައް ކާމިޔާބުކޮށްދިނީ، އިބްރާހީމް ނަސީމް އާއި އަހުމަދު ޝުޖާއު އަދި އަބްދުލްމަންނާން އިބްރާހީމްގެ އިތުރުން އަހުމަދު ސިރާޖެވެ. މީގެތެރެއިން ޝުޖާއު އަދި މަންނާން، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. މޮޅު ކުޅުންތެރިޔާގެ މަގާމް ހޯދީ ދެ ގޯލު ޖެހި ހުޅުދުއްފާރުގެ ޝުޖާއު އެވެ.
ކުއާޓާ ފައިނަލުގައި އެންމެ ވާދަވެރިކޮށް ފެނުނީ މިއަދު ހަވީރު ކުޅުނު ދެ ވަނަ މެޗެވެ. މި މެޗުގައި އުނގޫފާރުން ވަނީ މަޑުއްވަރި 4-3 އިން ބަލިކޮށްފަ އެވެ. މެޗުގައި އުނގޫފާރަށް ގޯލުތައް ކާމިޔާބުކޮށްދިނީ އިބްރާހީމް ހަސަން އަދި މޮޅު ކުޅުންތެރިޔާގެ މަގާމް ހޯދި ސައުދުﷲ ހުސައިން އެވެ. މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. މަޑުއްވަރީގެ ތިން ގޯލު ކާމިޔާބުކޮށްދިނީ އަހުމަދު އަޝްހަދު އާއި މުހައްމަދު އިރުޝާދުގެ އިތުރުން އަހުމަދު އާތިރު އެވެ.
މިރޭ ކުޅުނު ކުއާޓާ ފައިނަލް ތިން ވަނަ މެޗުގައި އިނގުރައިދޫއާ ވާދަކޮށް މީދޫ މޮޅުވީ 0-2 އިންނެވެ. މީދޫ އަށް ދެ ގޯލު ކާމިޔާބުކޮށްދިނީ ހުސައިން ނައީމާއި ރީހާން އަހުމަދު އެވެ. މޮޅު ކުޅުންތެރިޔާގެ މަގާމް ހޯދީ ނައީމެވެ.
ކުއާޓާ ފައިނަލްގެ ފަހު މެޗުގައި ރަސްގެތީމުން ވަނީ ރަސްމާދޫއާ ދެކޮޅަށް ހިތްވަރުގަދަ ކުޅުމެއް ދައްކައިފަ އެވެ. އެކަމަކު އަމިއްލަ ސަޕޯޓަރުން ކުރިމަތީ ރަސްމާދޫ އިން ވަނީ 1-2 އިން މި މެޗު ކާމިޔާބުކޮށްފަ އެވެ. މެޗުގައި ރަސްމާދޫގެ ދެ ގޯލު ކާމިޔާބުކޮށްދިނީ މުބާރާތުގައި އެޓީމަށް މޮޅު ކުޅުމެއް ދައްކަމުން އަންނަ އިބްރާހީމް މަމްދޫހް (މަންޑޭ) އާއި އަހުމަދު ޝާފިއު އެވެ. ރަސްގެތީމުގެ ހަމައެކަނި ގޯލު ޖެހީ ޚޫރުޝީދު މޫސާ އެވެ. މި މެޗުގެ މޮޅު ކުޅުންތެރިޔާގެ މަގާމް ހޯދީ ރަސްމާދޫ ޓީމުގެ އަލީ ވިޝާމެވެ.
https://www.fahuminet.com/tournaments/r-veterans-futsal-challenge-2026
މުބާރާތުގެ ސެމީ ފައިނަލް މެޗުތައް ކުޅޭނީ ހުކުރު ދުވަހު އެވެ. އެދުވަހުގެ ރޭ 8:20 ގައި ކުޅޭ ފުރަތަމަ ސެމީގައި ވާދަކުރާނީ ހުޅުދުއްފާރާއި އުނގޫފާރެވެ. ދެ ވަނަ ސެމީ 9:20 ގައި ފަށާއިރު، އެ ސެމީގައި ވާދަކުރާނީ ރަސްމާދޫ އާއި މީދޫ އެވެ.
ރ. ވެޓަރަންސް ފުޓްސަލް ޗެލެންޖުގެ ފައިނަލް މެޗު ކުޅުމަށް ހަމަޖެހިފައިވަނީ އަންނަ އާދީއްތަ ދުވަހު އެވެ.
އަތޮޅުގެ 11 ރަށަކުން ބައިވެރިވި މި މުބާރާތަކީ ރ. އަތޮޅުގައި ބާއްވާ ވެޓަރަންސް އެންމެ ބޮޑު ފުޓްސަލް މުބާރާތެވެ. މުބާރާތަށް ރަށްރަށުން ވަަރަށް ފުރިހަމައަށް ތައްޔާރުވިއިރު، ސަޕޯޓަރުން އަންނަނީ އާދަޔާހިލާފު ފޯރިއެއް ދައްކަމުންނެވެ.
