ރ. ވެޓަރަންސް ފުޓްސަލް ޗެލެންޖުގެ ކުއާޓާ ފައިނަލުން އިނގުރައިދޫ އާއި ރަސްގެތީމު ޖާގަ ހޯދައިފި އެވެ.
ރ. އަތޮޅުގެ ހުރިހާ ރަށަކަށް ހުޅުވާލައިގެން ކުރިއަށްގެންދާ މި މުބާރާތުގެ ކުއާޓާ ފައިނަލުން އިނގުރައިދޫ ޖާގައެއް ކަށަވަރުކުރީ ރޭ ކުޅުނު ގްރޫޕް ބީގެ ފޯރިގަދަ މެޗުގައި 2-4 އިން އިންނަމާދޫ ބަލިކޮށްގެންނެވެ. މި މެޗުގައި އިނގުރައިދޫ އަށް ލީޑް ނަގައިދިން ލަނޑު އެ ޓީމުގެ ކެޕްޓަން މުހައްމަދު އަބްދުއްރަހްމާން ކާމިޔާބުކޮށްދިން އިރު މި މެޗުގައި އެ ޓީމުގެ އަހްމަދު އަބޫބަކުރު ވަނީ ހެޓްރިކް ހަދައިފަ އެވެ.
ރޭ އިނގުރައިދޫ އާއި އިންނަމާދޫ ވާދަކުރި މެޗުގައި އިންނަމާދޫއިން ވަނީ އިނގުރައިދޫ ލީޑް ނެގިތާ މާ ގިނައިރުތަކެއް ނުވެ ނަތީޖާ ހަމަހަމަވެސް ކޮށްފަ އެވެ. އިންނަމާދޫއަށް ނަތީޖާ ހަމަހަމަކޮށްދިން ލަނޑު އެ ޓީމުގެ އަހްމަދު އަނީޒް ކާމިޔާބުކުރި އިރު އެ ޓީމުގެ ދެވަނަ ގޯލް މެޗުގެ ފަހު ހާފުގައި ކާމިޔާބުކޮށްދީފައިވަނީ އިބްރާހީމް ހަމީދެވެ.
ރޭގެ މެޗާއެކު އިންނަމާދޫއިން މުބާރާތުގައި ކުޅުނު ދެ މެޗުން ބަލިވެފައި އޮތް ނަމަވެސް ކުއާޓާ ފައިނަލަށް ދިއުމުގެ ދޮރު އެ ޓީމަށް އަދި ބަންދެއް ނުވެ އެވެ. ކުއާޓާ ފައިނަލްގެ ޖާގައެއް އިންނަމާދޫ އަށް ކިރިޔާވެސް ކަށަވަރުކުރުމުގެ ފުރުސަތެއް އޮތީ ގްރޫޕްގެ ފަހު މެޗުގައި މިހާރުވެސް ކުއާޓާގެ ޖާގައެއް ހޯދާފައި އޮތް މަޑުއްވަރި ބަލިކޮށްގެންނެވެ.
ރަސްމާދޫ ކައުންސިލް އިދާރާ އާއި ރަސްމާދޫ ޑިވެލޮޕްމަންޓް އެސޯސިއޭޝަން އަދި އެރަށު ސްޕޯޓްސް ކްލަބުން އިންތިޒާމުކޮށްގެން ކުރިއަށްގެންދާ ވެޓަރަންސް މުބާރާތުގެ ކުއާޓާ ފައިނަލުން ރަސްގެތީމު ޖާގަ ހޯދީ ގްރޫޕްގެ ފަހު މެޗުގައި ރޭ އަވަށްޓެރި އަނގޮޅިތީމާ ވާދަކޮށް 0-4 އިން މޮޅުވެގެންނެވެ.
ރަސްގެތީމާއި، އަނގޮޅިތީމު ވާދަކުރި މެޗުގައި ރަސްގެތީމުން ޖެހި ހަތަރު ގޯލްގެ ތެރެއިން ތިން ގޯލް ކާމިޔާބުކޮށްފައިވަނީ މެޗުގެ މޮޅު ކުޅުންތެރިޔާގެ މަގާމު ހޯދި އިބްރާހިމް ފައިސަލެވެ. އަނެއް ގޯލް ކާމިޔާބުކޮށްދީފައިވަނީ ރަސްގެތީމު ޓީމުގެ ކެޕްޓަން ހޫރުޝީދު މޫސާ އެވެ.
މުބާރާތުގައި އިއްޔެ އެެންމެ ފޯރިގަދަވީ މިދިޔަ އަހަރުގެ މުބާރާތުގެ ފައިނަލްގައި ވާދަކުރި ރަސްމާދޫ އާއި ހުޅުދުއްފާރު ބައްދަލުކުރި މެޗެވެ. އިއްޔެ ހަވީރު ކުޅުނު މެޗަށް ރަސްމާދޫ އާއި ހުޅުދުއްފާރު ނުކުތް އިރުވެސް އެ ދެ ޓީމުން ވަނީ މުބާރާތުގެ ކުއާޓާ ފައިނަލްގެ ޖާގަ ކަށަވަރުކޮށްފަ އެވެ.
ދެ ޓީމުގެ ފަރާތުންވެސް ބަލާހިތްވާ ކަހަލަ ރީތި ކުޅުމެއް ފެނުނު މި މެޗު 2-3 އިން ހުޅުދުއްފާރު ކާމިޔާބުކޮށް ގްރޫޕްގެ އެއްވަނަ ހޯދިއިރު މެޗުގައި ފުރަތަމަ ގޯލް ޖަހައި ލީޑު ނެގީ ވެސް ހުޅުދުއްފާރުންނެވެ. މެޗުގެ ހަވަނަ މިނެޓްގެ ތެރޭގައި އެ ޓީމުގެ އަބްދުއްރަޝީދު އަހްމަދުގެ ގޯލާއެކު ލީޑްގައި އޮވެގެން ހުޅުދުއްފާރުން ފުރަތަމަ ހާފު ނިންމަން ދަނިކޮށް ރަސްމާދޫގެ އަލީ ވިޝާމް ލަނޑެއް ޖަހައި މެޗުގެ ނަތީޖާ ހަމަހަމަކުރި އެވެ.
https://fahuminet.com/tournaments/r-veterans-futsal-challenge-2026
މި މެޗުގައި ފެނުނު އެންމެ ފޯރިިގަދަ ވަގުތު އައީ މެޗު ނިމެން ދެތިން މިނެޓަށް ވެފައި އޮއްވަ އެވެ. ދެ މިނެޓް ތެރޭގައި ތިން ގޯލް ފެނުނުއިރު މެޗުގައި ދެވަނަ ފަހަރަށްވެސް ލީޑު ނެގީ ހުޅުދުއްފާރުންނެވެ. ހުޅުދުއްފާރުގެ އިބްރާހިމް ނަސީމް އަލުން އެ ޓީމަށް ލީޑު ނަގައިދިންތާ މަދު ސިކުންތު ކޮޅެއްގެ ތެރޭގައި ރަސްމާދޫގެ ކެޕްޓަން އިބްރާހިމް މަމްދޫހް (މަންޑޭ) ލަނޑު ޖަހައި އަނެއްކާވެސް މެޗުގެ ނަތީޖާ ހަމަހަމަކުރި އެވެ. ހަމަ އެ ހަލުއި މިނުގައި ދެން ފެނުނީ ހުޅުދުއްފާރުގެ ތަރި އަބްދުލްމަންނާން ލަނޑެއް ޖަހައި އެ ޓީމަށް ތިން ޕޮއިންޓް ކަށަވަރުކޮށްދިން ތަނެވެ.
މުބާރާތުގައ މިއަދު ކުޅޭނީ ގްރޫޕް ސްޓޭޖުގެ އެންމެ ފަހު މެޗުތަކެވެ. މިއަދު ހަވީރު ކުޅޭ މެޗުގައި ބައްދަލުކުރާނީ ގްރޫޕް ސީގެ ދެ ޓީމު ކަމަށްވާ މީދޫ އާއި ދުވާފަރެވެ. މިރޭ ކުޅޭ ފުރަތަމަ މެޗުގައި ގްރޫޕް ބީ ގެ މަޑުއްވަރީ އާއި އިންނަމާދޫ ވާދަކުރާއިރު ފަހު މެޗުގައި އެ ގްރޫޕްގައި ހިމެނޭ އިނގުރައިދޫ ނުކުންނާނީ މާކުރަތާ ދެކޮޅަށެވެ.
