މިހާރު ރަސްމާދޫގައި ކުރިއަށްދާ އެމްޕީ ފަލާހް ރ. ވެޓަރަންސް ފުޓްސަލް ޗެލެންޖްގެ ގްރޫޕް ސްޓޭޖުގެ މެޗުތައް ނިމި މުބާރާތުގެ ކުއާޓާ ފައިނަލްގެ މެޗުތައް މިއަދު ކުޅެން ތައްޔާރުވެއްޖެ އެވެ.
މުޅި އަތޮޅަށް ހުޅުވާލައިގެން ކުރިއަށްގެންދާ ވެޓަރަންސް މުބާރާތުގައި ޖުމްލަ 11 ރަށަކުން ވާދަކުރާއިރު ކުއާޓާ ފައިނަލްގެ އެންމެ ފަހު ޖާގަ ރޭ ކަށަވަރުކޮށްފައިވަނީ މާކުރަތުންނެވެ. ރޭ ކުޅުނު ގްރޫޕް ބީގެ ފުރަތަމަ މެޗުގައި މަޑުއްވަރި އަތުން އިންނަމާދޫ 0-5 އިން ބަލިވުމާއެކު ގްރޫޕްގެ ފަހު މެޗުގައި އިނގުރައިދޫއާ ދެކޮޅަށް ނުކުތްއިރު ވެސް މާކުރަތަށް އޮތީ ކުއާޓާ ފައިނަލްގެ ޖާގަ ކަށަވަރުވެފަ އެވެ.
ގަދަ އަށެއް ޔަގީންވެފައި އޮތުމުގެ ހިތްހަމަޖެހުމާއެކު އިނގުރައިދޫ މެޗަށް ނުކުތް މާކުރަތުން ވަނީ 0-3 އިން މެޗު ކާމިޔާބުކޮށް ގްރޫޕްގެ ދެވަނަ މަގާމުވެސް ހޯދައިފަ އެވެ. މި މެޗުގައި މާކުރަތަށް ގޯލްތައް ކާމިޔާބުކޮށްދިނީ މުހައްމަދު ރިޝީފާއި، މުހައްމަދު މުސްތަފާގެ އިތުރުން އަހްމަދު ޝާފީ އެވެ.
ޖުމްލަ ހަ ޕޮއިންޓާ އެކު ގްރޫޕް ބީގެ ދެވަނަ މާކުރަތުން ހޯދިއިރު އެ ގްރޫޕްގެ އެއްވަނަ ޓީމުގެ ގޮތުގައި މަޑުއްވަރި ކުއާޓާ ފައިނަލުން ޖާގަ ހޯދައިފައިވަނީ ކުޅުނު އެއްވެސް މެޗަކުން ބަލިނުވެ ހަތް ޕޮއިންޓާއެކު އެވެ. ރޭ އެ ޓީމުން ކުޅުނު ގްރޫޕް ސްޓޭޖުގެ ފަހު މެޗުގައި އިންނަމާދޫ ކޮޅަށް ވައްދާލި ފަސް ގޯލްގެ ތެރެއިން ދެ ގޯލް ކާމިޔާބުކޮށްދިނީ އަހްމަދު އަޝްހަދެވެ. އެ ޓީމުން ޖެހި އަނެއް ތިން ގޯލް ކާމިޔާބުކޮށްދީފައި ވަނީ މެޗުގެ މޮޅު ކުޅުންޔެރިޔާގެ މަގާމު ހޯދި ޝަންމޫން އިލްޔާސްގެ އިތުރުން ހަސަން ރަޝީދާއި، މުހައްމަދު އިރުޝާދެވެ.
މިއަދު ކުޅޭ ކުއާޓާ ފައިނަލްގެ ހަތަރު މެޗުގެ ތެރެއިން ހަވީރު ކުޅޭ ފުރަތަމަ މެޗުގައި ވާދަކުރާނީ މުބާރާތުގެ ގްރޫޕް ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށްގެން ގްރޫޕް އޭގެ އެއްވަނަ ޓީމުގެ ގޮތުގައި ގަދަ އަށެއްގެ ޖާގަ ކަށަވަރު ކުރި ހުޅުދުއްފާރާއި، މާކުރަތެވެ. މި މެޗު ހަވީރު 3:50 ގައި ފަށާ ގޮތަށް ހަމަޖެހިފައިވާއިރު 4:50 ގައި ކުޅޭ މެޗުގައި ވާދަކުރާނީ ތިން ޓީމު ވާދަކުރި ގްރޫޕް ސީގެ ދެވަނަ ހޯދި އުނގޫފާރާއި، މަޑުއްވަރި އެވެ. މި މުބާރާތުގައި މުޅިން އަލަށް ވާދަކުރާ އުނގޫފާރު މުބާރާތުގެ ގްރޫޕް ސްޓޭޖުގައި ކުޅުނު ދެ މެޗު ވެސް ވީ އެއްވަރެވެ.
https://fahuminet.com/tournaments/r-veterans-futsal-challenge-2026
ރަސްމާދޫ ކައުންސިލް އިދާރާ އާއި، ރަސްމާދޫ ޑިވެލޮޕްމަންޓް އެސޯސިއޭޝަންގެ އިތުރުން އެރަށު ސްޕޯޓްސް ކްލަބް ގުޅިގެން ކުރިއަށްގެންދާ ރ. ވެޓަރަންސް ފުޓްސަލް ޗެލެންޖުގެ ކުއާޓާ ފައިނަލްގައި މިރޭ ކުޅޭ ދެ މެޗުގެ ތެރެއިން ފުރަތަމަ މެޗުގައި ވާދަކުރާނީ ގްރޫޕް ސީގެ އެއްވަނަ ހޯދި މީދޫ އާއި، ގްރޫޕްތަކުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި އިނގުރައިދޫ އެވެ. އުނގޫފާރުން ގްރޫޕް ސްޓޭޖް ހަތަރު ޕޮއިންޓާއެކު ނިންމާލި އިރު އިނގުރައިދޫއަށް ވެސް ލިބިފައި އޮތީ ހަތަރު ޕޮއިންޓެވެ.
ކުއާޓާ ފައިނަލްގައި މިރޭ ކުޅޭ ފަހު މެޗުގައި ވާދަކުރާނީ ގްރޫޕް އޭގައި ވާދަކުރި ދެ ޓީމު ކަމަށްވާ ރަސްމާދޫ އާއި ރަސްގެތީމެވެ. މިދިޔަ އަހަރުގެ ޗެމްޕިއަން ރަސްމާދޫ ހަ ޕޮއިންޓާއެކު ގްރޫޕްގެ ދެވަނަ ޓީމުގެ ގޮތުގައި ކުއާޓާ ފައިނަލްގެ ޖާގަ ކަށަވަރުކުރި އިރު ރަސްގެތީމަށް ކުއާޓާއިން ޖާގަ ލިބުނީ ގްރޫޕްތަކުން ތިންވަނައަށް އައި ޓީމުތަކުގެ ތެރެއިން އެންމެ ރަގަޅު ނަތީޖާ ހޯދި ދެވަނަ ޓީމުގެ ގޮތުގަ އެވެ. ގްރޫޕް ސްޓޭޢޖުގައި މި ދެ ޓީމު ވާދަކުރި މެޗު 0-1 އިން ކާމިޔާބުކުރީ ރަސްމާދޫ އެވެ.
