ރ. ވެޓަރަންސް ފުޓްސަލް ޗެލެންޖުގެ ކުއާޓާ ފައިނަލުން މީދޫ އާއި އުނގޫފާރު ޖާގަ ހޯދައިފި އެވެ.
ރަސްމާދޫ ކައުންސިލް އިދާރާ އާއި، ރަސްމާދޫ ޑިވެލޮޕްމަންޓް އެސޯސިއޭޝަން އަދި އެ ރަށު ސްޕޯޓްސް ކްލަބް ގުޅިގެން ކުރިއަށްގެންދާ ވެޓަރަންސް މުބާރާތުގެ ގަދަ އަށަކުން މީދޫ ޖާގަ ހޯދައިފައިވަނީ މިއަދު ހަވީރު ކުޅުނު ގްރޫޕް ސީގެ ފަހު މެޗުގައި ދުވާފަރާއި ވާދަކޮށް 1-5 އިން މޮޅުވެގެންނެވެ.
މީދޫ ސަޕޯޓަރުންގެ ފަރާތުން ހޫނު ތަރުހީބެއް ލިބުނު މި މެޗުގައި އެ ޓީމުން ޖެހި ފަސް ލަނޑުވެސް ކާމިޔާބުކޮށްފައި ވަނީ ދުވާފަރުން ލަނޑެއް ޖަހައި ލީޑު ނަގައިފައިވަނިކޮށެވެ. މި މެޗުގައި މީދޫއިން ޖެހި ފަސް ލަނޑުގެ ތެރެއިން ތިން ލަނޑު ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމު ހޯދި އަޝްރަފް ހަސަން އެވެ. އަޝްރަފް ވަނީ މީދޫ އިން މި މުބާރާތުގައި އުނގޫފާރާ ދެކޮޅަށް ކުޅުނު މެޗުގައި ވެސް ގޯލް ޖަހައި އެ މެޗުގެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ.
މިއަދުގެ މެޗުގައި މީދޫއަށް ދެން ގޯލް ޖަހައިދީފައިވަނީ މުހައްމަދު ސައީދު އާއި ހުސައިން ނައީމެވެ. މުބާރާތުގައި މީދޫ އިން ކުޅުނު ފުރަތަމަ މެޗުގައި އުނގޫފާރާ އެއްވަރުކޮށް ހޯދި ޕޮއިންޓާ އެކު ތިން ޓީމު ހިމެނޭ ގްރޫޕްގެ އެއްވަނަ އެ ޓީމުން ވަނީ ހޯދައިފަ އެވެ.
ގްރޫޕް ސީ އިން ދެވަނަ ޓީމުގެ ގޮތުގައި ކުއާޓާ ފައިނަލްގެ ޖާގަ، މިފަހަރުގެ މުބާރާތުގައި މުޅިން އަލަށް ވާދަކުރާ އުނގޫފާރަށް ލިބުނީ މުބާރާތުގައި އެ ޓީމު ކުޅުނު ދެ މެޗުވެސް އެއްވަރުކޮށް ގްރޫޕްގެ ދެވަނަ ހޯދައިގެންނެވެ. ކޮންމެ ގްރޫޕަކުން ތިންވަނައަށް އަންނަ ޓީމުތަކުގެ ތެރެއިން އެންމެ ރަގަޅު ނަތީޖާ ހޯދާ ދެ ޓީމަށް ކުއާޓާ ފައިނަލްގެ ޖާގަ ލިބޭ ގޮތަށް އޮތް ނަމަވެސް ގްރޫޕް ސީގައި ހިމެނޭ ދުވާފަރަށް ލިބިފައިވަނީ އެންމެ ޕޮއިންޓެއް ކަމަށް ވުމާއެކު އެ ޓީމަށް އެ ފުރުސަތު ވަނީ ގެއްލިފަ އެވެ.
https://www.fahuminet.com/tournaments/r-veterans-futsal-challenge-2026
މުބާރާތުގެ ކުއާޓާ ފައިނަލްގެ ޖާގަ މިހާތަނަށް ހަތް ޓީމަކުން ކަށަވަރުކޮށްފައިވާއިރު ބާކީ އޮތް ޖާގަ ލިބޭ ޓީމެއް ކަށަވަރުވާނީ މިރޭ ކުޅޭ ގްރޫޕް ސްޓޭޖްގެ އެންމެ ފަހު ދެ މެޗު ނިމުމުންނެވެ.
