މިހާރު ކުރިއަށްދާ އެފްއޭއެމް ފުޓްސަލް ޗެމްޕިއަންޝިޕްގެ އުތުރުގެ ޒޯން އެކެއްގައި އިއްޔެ ކުޅުނު މެޗުތަކުން ހދ. ނައިވާދޫ އާއި ހއ. ފިއްލަދޫ މޮޅުވެއްޖެ އެވެ.
ނައިވާދޫގައި ކުރިއަށްދާ ޒޯން ބުރުގައި އިއްޔެ އެރަށުން ވަނީ އިހަވަންދޫއާ ވާދަކޮށް 0-2 އިން މޮޅުވެފަ އެވެ.
އިއްޔެގެ މެޗުގައި އިހަވަންދޫން ވަނީ ނައިވާދޫއާ ރަނގަޅު ވާދައެއްކޮށްފަ އެވެ. ހއ. އަތޮޅުގެ ޗެމްޕިއަންކަން ހޯދި އިހަވަންދޫ ކޮޅަށް ނައިވާދޫން ދެ ގޯލު ވެސް ޖެހީ މެޗުގެ ފަހުކޮޅުގަ އެވެ. އެޓިމުގެ ފުރަތަމަ ގޯލު 29 ވަނަ މިނެޓުގައި ޖެހީ މޫސާ އަސްލަމެވެ. އޭގެ ފަސް ވަރަކަށް މިނެޓު ފަހުން ދެ ވަނަ ގޯލު ކާމިޔާބުކޮށްދިނީ މުހައްމަދު ޝާއިން އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ނައިވާދޫގެ ތަރި ޔާމިން މުހައްމަދެވެ.
ރޭ ކުޅުނު މެޗުގައި ފިއްލަދޫން ވަނީ ހަނިމާދޫ 0-2 އިން ބަލިކޮށްފަ އެވެ. މެޗުގައި ފިއްލަދޫގެ ދެ ގޯލު ވެސް ޖެހީ ފުރަތަމަ ހާފުގަ އެވެ. ފުރަތަމަ ގޯލު ރައިޝާން އަހުމަދު ސަލީމް ކާމިޔާބުކޮށްދިންއިރު ދެ ވަނަ ގޯލު ކާމިޔާބުކޮށްދިނީ އާދަމް ސަމާޚު އެވެ.
ރޭގެ މެޗުގައި ހަނިމާދޫން އުފެއްދި ގިނަ ހަމަލާތަކެއް ފިއްލަދޫގެ ގޯލްކީޕަރު މުހައްމަދު ހަރީޒް ހަލީމް ވަނީ މަތަކޮށްފަ އެވެ. ފިއްލަދޫ މެޗު ކާމިޔާބުކުރުމުގައި އަދާކުރި މުހިއްމު ދައުރާ އެކު މެޗުގެ މޮޅު ކުޅުންތެރިޔާގެ މަގާމް ވެސް ހަރީޒް ހޯދި އެވެ.
ފުރަތަމަ މެޗުގައި ނައިވާދޫ އަތުން 1-8 އިން ބަލިވިޔަސް ޖެހިގެން އައި ދެ މެޗުގައި ފިއްލަދޫން ވަނީ މޮޅު ކުޅުމަކާ އެކު ބޮޑު ކުރިއެރުމެއް ހޯދައިފަ އެވެ. އެޓީމު ވަނީ ލީގު ބުރުގެ ދެ ވަނަ މެޗުގައި ކަނޑިތީމާ 2-2 އިން އެއްވަރުކޮށްފަ އެވެ.
އުތުރުގެ ޒޯން އެކެއް ރޭވިފައިވާ ގޮތަށް ބަލާއިރު ދެ މެޗުން ވެސް މޮޅުވެ 6 ޕޮއިންޓާ އެކު އެއް ވަަނައިގައި އޮތީ ނައިވާދޫ އެވެ. ދެ ވަނައިގައި އޮތް ކަނޑިތީމާއި ތިން ވަނައިގައި އޮތް ފިއްލަދޫ އަށް ވަނީ 4 ޕޮއިންޓް ލިބިފަ އެވެ. އެކަމަކު ފިއްލަދޫ އޮތީ ކަނޑިތީމަށް ވުރެ އެއް މެޗު އިތުރަށް ކުޅެފަ އެވެ. ލީގު ބުރުގެ ހަތަރު ވަނައިގައި އޮތީ ދެ މެޗުން 3 ޕޮއިންޓް ލިބިފައިވާ އިހަވަންދޫ އެވެ. ފުލުގައި އޮތް ހަނިމާދޫ ތިން މެޗުން ވެސް ބަލިވެފައިވާއިރު އެޓީމަށް އިތުރަށް ކުރިއަށްދިއުމުގެ ފުރުސަތެއް ނެތެވެ.
https://www.fahuminet.com/tournaments/fam-futsal-north-zone-1
އުތުރުގެ ޒޯން އެކެއްގެ ލީގު ބުރު ކުރިއަށްދާއިރު، އުތުރުގެ ޒޯން ދޭއްގެ ސެމީ ފައިނަލް މެޗުތައް މާދަމާ ކުޅޭނެ އެވެ. މާދަމާ ކުޅޭ ސެމީގައި އިނގުރައިދޫ އާއި މަގޫދޫ ވާދަކުރާއިރު ދުވާފަރާ ދެކޮޅަށް ނުކުންނާނީ ހިންނަވަރެވެ.
