އެފްއޭއެމް އެޓޯލް ފުޓްސަލް ޗެމްޕިއަންޝިޕްގެ އުތުރުގެ ޒޯން އެކެއްގެ ފައިނަލުން ހދ. ނައިވާދޫ ޖާގަހޯދިއިރު، ފައިނަލުގެ ދެ ވަނަ ޖާގަ އަށް މަރުގެ މެޗަކަށް ކަނޑިތީމާއި އިހަވަންދޫ ނުކުންނަން ތައްޔާރުވެއްޖެ އެވެ.
ޒޯން އެކެއްގެ ލީގު ބުރުގެ ދެ މެޗު ނައިވާދޫ ފުޓްސަލް ދަނޑުގައި މިއަދު ވަނީ ކުޅެފަ އެވެ. މިރޭ ކުޅުނު މެޗުގައި ނައިވާދޫން ވަނީ ފަސޭހަކަމާ އެކު 0-5 އިން ށ. ކަނޑިތީމު ބަލިކޮށްފަ އެވެ.
މި މޮޅާ އެކު ޒޯން އެކެއްގެ ލީގު ބުރުގެ އެއް ވަނަ ގާތްގަނޑަކަށް ކަށަވަރުކޮށް ނައިވާދޫ ވަނީ ފައިނަލުގެ ޖާގައަކާ އެކު އުތުރުގެ ރީޖަން ލީގުގެ ޖާގައެއް ވެސް ކަށަވަރުކޮށްފަ އެވެ. ފަސް ޓީމާ އެކު ކުރިއަށްދާ ޒޯން އެކެއްގެ ލީގު ބުރުގެ ފައިނަލަށް ހޮވޭ ދެ ވަނަ ޓީމަށް ވެސް ރީޖަން ލީގުން ފުރުސަތު ލިބޭނެ އެވެ.
މިރޭގެ މެޗުގައި ނައިވާދޫގެ ފަސް ގޯލުގެ ތެރެއިން މުހައްމަދު އަސްލަމާއި މުހައްމަދު ޝާއިން، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. މި ދެކުޅުންތެރިން ވެސް އަންނަނީ މިފަހަރުގެ މުބާރާތުގައި ނައިވާދޫ ޓީމުގައި މޮޅު ކުޅުމެއް ދައްކައި ގިނަ ގޯލުތަކެއް ޖަހަމުންނެވެ. ނައިވާދޫގެ އަނެއް ގޯލު ޖެހީ ގައުމީ ފުޓްސަލް ޓީމުގައި ވެސް ހިމެނޭ އަހުމަދު ހަމީދު (އަންމަޑޭ) އެވެ. އަންމަޑޭ ވަނީ މެޗުގެ މޮޅު ކުޅުންތެރިޔާގެ މަގާމް ވެސް ހޯދައިފަ އެވެ.
ޒޯން އެކެއްގައި މިއަދު ހަވީރު ހއ. ފިއްލަދޫއާ ދެކޮޅަށް ކުޅުނު މެޗުގައި ފަހަތުން އަރައި ހއ. އިހަވަންދޫ ވަނީ 2-1 އިން ކާމިޔާބުކޮށްފަ އެވެ. މި މެޗުގައި ދެ ވަނަ ހާފުގައި ލީޑު ނެގީ ފިއްލަދޫންނެވެ. މި ގޯލު ކާމިޔާބުކޮށްދިނީ އުފާލް އަބްދުﷲ އެވެ. ދެ ވަނަ ހާފުގައި މި ގޯލު އިހަވަންދޫ ކޮޅަށް ވަނީ އެޓީމުގެ މުހައްމަދު މަޒީނަށް ރެފްރީ ރަތް ކާޑު ދެއްކިތާ އިރުކޮޅެއް ފަހުންނެވެ.
މުހިއްމު ކުޅުންތެރިއަކަށް ރަތް ކާޑު ދެއްކުމާއި، އެއް ގޯލު ފަހަތުގައި އޮތުމުން މެޗުން މޮޅުވާން އިހަވަންދޫ އަށް އިތުރު ހިތްވަރެއް ލާން ޖެހުނެވެ. އެކަމަކު ހިތްވަރާ އެކު ކުޅެ އެޓީމުން ނަތީޖާ ނެރުނެވެ. އެޓީމުގެ ފުރަތަމަ ގޯލު 32 ވަނަ މިނެޓުގައި ޖެހީ ޝިފާޒް އިބްރާހީމް އެވެ. އަނެއް ގޯލު މެޗުގެ ފަހު މިނެޓުގައި ޖެހީ އިބްރާހީމް ހާމިދު އެވެ. މި ގޯލާ އެކު އިހަވަންދޫ އަށް މޮޅު ކަށަވަރުކޮށްދީ މެޗުގެ މޮޅު ކުޅުންތެރިޔާގެ މަގާމް ވެސް ހާމިދު ހޯދި އެވެ.
ލީގު ބުރުގެ އެއް ވަނައިގައި ނައިވާދޫ އޮތީ ކުޅުނު ތިން މެޗުން ވެސް މޮޅުވެ 9 ޕޮއިންޓާ އެކު އެވެ. މި ތިން މެޗުގައި އެޓީމު ކޮޅަށް ގޯލެއް ވެސް އަދި ނުވަދެ އެވެ. ފަހު މެޗުގައި ނައިވާދޫ ނުކުންނާނީ މުބާރާތުން ކަޓާފައިވާ ހަނިމާދޫއާ ދެކޮޅަށެވެ.
ދެ ވަނައިގައި އޮތް އިހަވަންދޫ އަށް 6 ޕޮއިންޓް ލިބިފައިވާއިރު ތިން ވަނައިގައި އޮތް ކަނޑިތީމަށް ލިބިފައިވަނީ 4 ޕޮއިންޓެވެ. ލީގު ބުރުގައި ދެން އޮތީ ވެސް މި ދެޓީމުގެ ކުރިމަތިލުމެކެވެ. މި މެޗު އެއްވަރުކޮށްލައިގެން ފައިނަލުގެ ޖާގައަކާ އެކު ރީޖަން ލީގުގެ ޖާގައެއް އިހަވަންދޫ އަށް ލިބޭނެ އެވެ. ކަނޑިތީމަށް ފައިނަލަށް ދެވެން އޮތީ އިހަވަންދޫ ބަލިކޮށްގެންނެވެ.
https://www.fahuminet.com/tournaments/fam-futsal-north-zone-1
ލީގު ބުރުގެ ހަތަރު ވަނައިގައި 4 ޕޮއިންޓާ އެކު އޮތް ފިއްލަދޫ އަށް މިހާރު ވަނީ ފައިނަލުގެ ފުރުސަތު ބަންދުވެފަ އެވެ. އެއީ އެޓީމަށް ބާކީ މެޗެއް ނެތުމުންނެވެ. ފުލުގައި އޮތް ހަނިމާދޫ ވަނީ ތިން މެޗުން ވެސް ބަލިވެފަ އެވެ.
އުތުރުގެ ޒޯން އެކެއްގެ ލީގު ބުރުގެ ފަހު މެޗުތައް އޮންނާނީ ހޯމަ ދުވަހު އެވެ. ފައިނަލް މެޗު އޮންނާނީ ބުދަ ދުވަހު އެވެ.
