އެމްޕީ ފަލާހް ރ. ވެޓަރަންސް ފުޓްސަލް ޗެލެންޖްގެ ފައިނަލް މެޗަށް މިރޭ ނުކުންނާނީ ފުރަތަމަ ފަހަރަށް ފުޓްސަލްގެ ތަށްޓެއް ރަށަށް ހޯދައިދިނުމުގެ ވަރުގަދަ އަޒުމުގައި ކަމަށް މުބާރާތުގައި މިފަހަރު އަލަށް ވާދަކުރާ އުނގޫފާރު ޓީމުގެ މެނޭޖަރު އަބޫބަކުރު ލުތުފީ (ބޫ) ބުނެފި އެވެ.
ރ. އަތޮޅުގެ 11 ރަށަކުން ވާދަކުރާ ވެޓަރަންސް ފުޓްސަލް މުބާރާތުގެ ފައިނަލުން އުނގޫފާރު ޖާގަ ހޯދީ މިދިޔަ އަހަރު ބޭއްވި މުބާރާތުގެ ރަނަރަޕް މަގާމު ހޯދި ހުޅުދުއްފާރާ ސެމީ ފައިނަލްގައި ވާދަކޮށް 0-1 އިން މޮޅުވެގެންނެވެ. އެ މެޗުގައި އުނގޫފާރުން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ މެޗު ނިމެން ހަތް މިނެޓަށް ވެފައި ވަނިކޮށް ރިލްވާން މުހައްމަދެވެ.
ރަސްމާދޫ ކައުންސިލް އިދާރާ އާއި ރަސްމާދޫ ޑިވެލޮޕްމަންޓް އެސޯސިއޭޝަންގެ އިތުރުން އެރަށު ސްޕޯޓްސް ކްލަބް ގުޅިގެން ކުރިއަށްގެންދާ ވެޓަރަންސް މުބާރާތުގައި މިހާތަނަށް އުނގޫފާރު ކުޅުނު އެއްވެސް މެޗަކުން ބަލިވެފައެއް ނުވެ އެވެ. ތިން ޓީމު ވާދަކުރި ގްރޫޕް ސީގެ ދެވަނަ ޓީމުގެ ގޮތުގައި ކުއާޓާ ފައިނަލުން ޖާގަ ހޯދި އުނގޫފާރުން މޮޅަކާ ނުލައި ގްރޫޕް ސްޓޭޖު ނިންމާލި ނަމަވެސް ކުއާޓާ ފައިނަލްގައި އެ ޓީމުން ވަނީ މުބާރާތުގެ ގްރޫޕް ސްޓޭޖުގައި އެންމެ ރަގަޅު ނަތީޖާ ނެރުނު އެއް ޓީމު ކަމަށްވާ މަޑުއްވަރި 3-4 އިން ބަލިކޮށްފަ އެވެ.
"އަޅުގަނޑުމެން ވާނެ މި މުބާރާތަށް އެންމެ ކުރިން ތައްޔާރުވާން ފެށި ޓީމަށް. މިދިޔަ އަހަރުގެ މުބާރާތުގަ ކަން ދިމާކުރި ގޮތުން އަޅުގަނޑުމެންނަށް ބައިވެރި ނުވެވުނީމަ ވަރަށް ދެރަވެސްވި. އެކަމަކު މިފަހަރު މުބާރާތް އިއުލާން ކުރުމާއެކު އަޅުގަނޑުމެން މުބާރާތަށް ތައްޔާރުވާން ފެށީ ސީދާ މުބާރާތް ކާމިޔާބުކުރަން ޓާގެޓް ކޮށްގެން." މިރޭގެ ފައިނަލް މެޗުގެ ކުރިން "ފަހުމިނެޓް" އާ ވާހަކަދައްކަމުން އުނގޫފާރު ޓީމުގެ މެނޭޖަރު އަބޫބަކުރު ލުތުފީ (ބޫ) ބުންޏެވެ.
ބޫ ފާހަގަކުރި ގޮތުގައި އުނގޫފާރު ޓީމުގައި ތިބީ އެރަށުގެ ފުޓްބޯޅައިގެ ގޯލްޑަން ޖަނަރޭޝަންގެ ކުޅުންތެރިން ކަމަށާއި، އެ ކުޅުންތެރިން ރަށަށް ރީތި ނަން ހޯދައިދޭން މިރޭ ވަރަށް ބޮޑަށް މަސައްކަތްކުރާނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.
ފުޓްބޯޅައިގަ އުނގޫފާރަށް އެބަހުރި އަތޮޅު ފެންވަރުގަ ކާމިޔާބީތައް ލިބިފަ. އެ ކާމިޔާބީ ހޯދި ކުޅުންތެރިން ޓީމުގައި މި ތިބީ. އެކަމަކު އަދި މިހާތަނަށް ފުޓްސަލްގެ ތައްޓެއް އުނގޫފާރަށް ލިބިފައެއް ނެތް. އެހެންވީމަ މިރޭގެ މެޗަށް ނުކުންނައިރު ހުރިހާ ކުޅުންތެރިންގެ އަޒުމަކަށް ވާނީ ފުރަތަމަ ފަހަރަށް ފުޓްސަލްގެ ތަށްޓެއް ރަށަށް ހޯދައިދިނުން.
އުނގޫފާރުން މުބާރާތުގައި މިހާތަނަށް ކުޅުނު ހަތަރު މެޗުގައި 7 ގޯލް ޖަހާފައިވާއިރު އެ ޓީމު ކޮޅަށް ހަ ގޯލް ވަނީ ވަދެފައެވެ. ބޫ ފާހަގަކުރި ގޮތުގައި އުނގޫފާރު ޓީމު މިހާ ހިސާބަށް އައުމުގެ އެންނެ ބޮޑު އަސްލަކީ ޓީމުގެ ހުރިހާ ކުޅުންތެރިން ކޯޗާއި، މެނޭޖްމަންޓަށް ކުރި އިހްތިރާމް ކަމަށެވެ.
"ޓީމުގެ ކޯޗުންނާއި އޮފިޝަލުންގެ ގޮތުގައި ތިބީ ޓީމުގައި ތިބި ކުޅުންތެރިންނާ އަޅައި ބަލާއިރު އުމުރުން ހަގު ބައެއް. އެކަމަކު ކުޅުންތެރިން ވަރަށް ޑިސިޕްލިން. ކޯޗާއި، އޮފިޝަލުން ދޭ އިރުޝާދު ވަރަށް ރަގަޅަށް ފޮލޯ ކުރޭ. އެއީ ހަގީގަތުގަ މިހިސާބަށް ޓީމަށް އާދެވުނު މައިގަނޑު ސަބަބަކީ."
އުނގޫފާރު ޓީމުން ފާހަގަކުރި ގޮތުގައި އަނިޔާގެ މައްސަލަ ކޮންމެވެސް ވަރަކަށް ޓީމުގައި އުޅޭ ކަމަށާއި، އެކަމަކު މިރޭގެ މެޗުގައި ހުރިހާ ކުޅުންތެރިންވެސް ފެންނާނެ ކަމަށް އުންމީދު ކުރާ ކަމަށެވެ.
އުނގޫފާރަކީ މިފަހަރުގެ މުބާރާތުގައި ބައިވެރިވި ޓީމުތަކުގެ ތެރެއިން އެންމެ ފުރިހަމަ ސަޕޯޓެއް ލިބެމުން އަންނަ އެއް ޓީމު ކަމަށާއި، މިރޭގެ މެޗަށް ވެސް ގިނަ އަދަދެއްގެ ސަޕޯޓަރުން ރަސްމާދޫއަށް ދާނެ ކަމަށް އުނގޫފާރު ޓީމުން ވަނީ މައުލުމާތު ދީފަ އެވެ.
https://fahuminet.com/tournaments/r-veterans-futsal-challenge-2026
"ގާތްގަނޑަކަށް 250 އެއްހާ ސަޕޯޓަރުން ޓީމަށް ސަޕޯޓްކުރަން ރަސްމާދޫއަށް ދާނެ ކަމަށް ބެލެވެނީ، މިހާރުވެސް ވަރަށް ފޯރިއާއެކު ސަޕޯޓަރުންގެ ހަރަކާތްތައް އެބަ ހިނގާ." އުނގޫފާރު ޓީމުގެ މެނޭޖަރު ބޫ ރޭ "ފަހުމިނެޓް" އާ ވާހަކަދައްކަމުން ބުންޏެވެ.
މީދޫ އާއި އުނގޫފާރު ބައްދަލު ކުރާ ރ. ވެޓަރަންސް ފުޓްސަލް ޗެލެންޖްގެ ފައިނަލް މެޗު ފަށާ ގޮތަށް ހަމަޖެހިފައިވަނީ މިރޭ 08:40 ގަ އެވެ.
