އެމްޕީ ފަލާހް ރ. ވެޓަރަންސް ފުޓްސަލް ޗެލެންޖް 2026 ގެ ޗެމްޕިއަންކަން އުނގޫފާރު ވެޓަރަންސް ޓީމު ހޯދައިފި އެވެ.
ރ. އަތޮޅުގެ ހުރިހާ ރަށަކަށް ހުޅުވާލައިގެން ރަސްމާދޫގައި ކުރިއަށްގެންދިޔަ ވެޓަރަންސް ފުޓްސަލް މުބާރާތުގައި މިފަހަރު މުޅިން އަލަށް ބައިވެރިވި އުނގޫފާރުން މުބާރާތުގެ ތަށި އުފުލާލުމުގެ ޝަރަފް ހޯދީ މިރޭ ކުޅުނު ފޯރިގަދަ ފައިނަލްގައި މީދޫއާ ވާދަކޮށް ފުރިހަމަ ވަގުތު ހަމަވި އިރު 2-2 އިން އެއްވަރުވެފައި އޮތުމާއެކު ޕެނަލްޓީ ޖަހައިގެން 3-4 އިން މެޗު ކާމިޔާބުކޮށްގެންނެވެ.
ރަސްމާދޫ ކައުންސިލް އިދާރާ އާއި ރަސްމާދޫ ޑިވެލޮޕްމަންޓް އެސޯސިއޭޝަންގެ އިތުރުން އެރަށު ސްޕޯޓްސް ކްލަބް ގުޅިގެން ކުރިއަށްގެންދިޔަ ރ. ވެޓަރަންސް ފުޓްސަލް ޗެލެންޖްގެ ފައިނަލް މެޗު ފަށައިގެން މީދޫއަށް ވުރެ ރަނގަޅަށް ކުޅެ އުނގޫފާރުން ގިނަ ހަމަލާތަކެއް އުފައްދަން މަސައްކަތްކުރަމުން ދަނިކޮށް މީދޫއިން މެޗުގެ ލީޑު ނެގީ 12 ވަނަ މިނެޓްގަ އެވެ. މިލަނޑު އެ ޓީމަށް ކާމިޔާބުކޮށްދިނީ މައުރޫފް އަފީފެވެ.
މީދޫ އިން ލީޑު ނެގިތާ މިނެޓެއް ވެސް ނުވަނީސް ދެން ފެނުނީ އުނގޫފާރުން ލަނޑެއް ޖަހައި މެޗުގެ ނަތީޖާ ހަމަހަމަކުރި ތަނެވެ. މި ލަނޑު އެ ޓީމަށް ކާމިޔާބުކޮށްދިނީ އުނގޫފާރު ޓީމުގެ އެންމެ އިތުބާރު ފޯވާޑް ސައުދުﷲ ހުސައިން އެވެ. އުނގޫފާރުގެ ލަނޑަށްފަހު ދެ ޓީމަށްވެސް ނަތީޖާ ބަދަލުކޮށްލަން ފުރުސަތު ލިބުނު ނަމަވެސް ފުރަތަމަ ހާފު ނިމުނީ ނަތީޖާއަށް އިތުރު ބަދަލެއް ނައިހެވެ.
ސަޕޯޓަރުންގެ ފަރާތުން ދެ ޓީމަށްވެސް ހޫނު ތަރުހީބެއް ލިބުނު މިރޭގެ މެޗުގެ ފަހު ހާފު ފަށައިގެން ދެ ޓީމުން ވެސް ހަމަލާއަށް އިސްކަންދީގެން ކުޅެމުން އަންނަނިކޮށް މެޗުގައި ފުރަތަމަ ފަހަރަށް އުނގޫފާރަށް ލީޑް ނަގައިދިނީ ސައުދުﷲ ދިން ރީތި ބޯޅައަކުން އެ ޓީމުގެ އިބްރާހީމް ހަސަން އެވެ. މިއީ މި މުބާރާތުގައި އިބްރާހީމް ޓީމަށް ކާމިޔާބުކޮށްދިން ފަސް ވަނަ ގޯލެވެ.
އުނގޫފާރުން ލީޑުގައި އޮވެގެން މެޗު ނިމެން ދަނިކޮށް މީދޫ އަށް ނަތީޖާ ހަމަހަމަކޮށްދިނީ އެ ޓީމުގެ ހަސަން ޝަރީފެވެ.
ޕެނަލްޓީ ޝޫޓްއައުޓްގައި އުނގޫފާރުން ޖެހި ހުރިހާ ޕެނަލްޓީއެއް ކާމިޔާބުކޮށްފައިވާއިރު މީދޫއިން ޖެހި ހަތަރު ޕެނަލްޓީގެ ތެރެއިން ރީހާން އަހްމަދާއި، އަދި މިރޭގެ މެޗުގައި މީދޫ އަށް ނަތީޖާ ހަމަކޮށްދިން ލަނޑު ކާމިޔާބުކޮށްދިން ހަސަން ޝަރީފް ޖެހި ޕެނަލްޓީ ވަނީ ނާކާމިޔާބުވެފަ އެވެ.
މިރޭ ކުޅުނު ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދީ ސެމީ ފައިނަލްގައި އުނގޫފާރުން ކުޅުނު މެޗުގައިވެސް މޮޅު ކުޅުންތެރިޔާގެ މަގާމު ހޯދި އެ ޓީމުގެ ގޯލްކީޕަރު ހަސަން އާސިފެވެ. މުބާރާތުގެ ފެއާ ޕްލޭ ކުޅުންތެރިޔަކަށް ހޮވުނީ މަޑުއްވަރީ ޓީމުގައި މޮޅު ކުޅުމެއް ދެއްކި ޝައްމޫން އިލިޔާސް އެވެ.
މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ އުނގޫފާރު ޓީމުގެ ސައުދުﷲ ހުސައިން އާއި ގޯލްކީޕަރު ހަސަން އާސިފްގެ އިތުރުން ހުޅުދުއްފާރު ޓީމުގެ ތަރި އަބްދުލް މަންނާން އިބްރާހIމް އާއި މީދޫ ޓީމުގެ ހުސައިން ނައީމް އަދި ރަސްމާދޫ ޓީމުގެ ނަސްރުﷲ މުހައްމަދެވެ.
https://www.fahuminet.com/tournaments/r-veterans-futsal-challenge-2026
މުބާރާތުގެ އެންމެ ގިނަ ގޯލްޖެހި ކުޅުންތެރިޔާގެ އެވޯޑް މުބާރާތުގައި ހުޅުދުއްފާރު ޓީމަށް 10 ގޯލް ކާމިޔާބުކޮށްދިން މަންނާނަށް ލިބުނު އިރު އެންމެ މޮޅު ކޯޗަކަށް ހޮވުނީ އުނގޫފާރު ޓީމުގެ ކޯޗު ތޯހާ ހަނީފެވެ. ފެއާ ޕްލޭ ޓީމަކަށް ހޮވުނީ ހުޅުދުއްފާރެވެ.
އުމުރުން 40 އަހަރުން މަތީގެ ކުޅުންތެރިންނަށް އެކަނި ކުޅެވޭ ގޮތަށް ކުރިއަށްދިޔަ ރ. ވެޓަރަންސް ފުޓްސަލް މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ އުނގޫފާރު ޓީމުގެ ގޯލްކީޕަރު ހަސަން އާސިފެވެ.
