ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމްކޮށްގެން އަންނަ މަހު ބާއްވާ ގޮތަށް ހަމަޖެހިފައިވާ އެފްއޭ ކަޕް ފުޓްބޯޅަ މުބާރާތުގެ ގުރު ނަގައި މުބާރާތުގެ ކުއާޓާ ފައިނަލްގެ މެޗުތަކުގައި ބައްދަލުކުރަންޖެހޭ ޓީމުތައް ކަނޑައަޅައިފި އެވެ.
މިއީ މި ވޭތުވެދިޔަ ދިހަ ދިހަ ވަރަކަށް އަހަރު ދުވަހުގެ ތެރޭގައި ބާއްވާ ތިން ވަނަ އެފްއޭ ކަޕް މުބާރާތެވެ. އެންމެ ފަހުން މި މުބާރާތް ބާއްވާފައި ވަނީ 2022 ވަނަ އަހަރު އެވެ. އޭގެ ކުރިން މި މުބާރާތް އެންމެ ފަހުން ބާއްވާފައި އޮތީ 2017 ވަނަ އަހަރު އެވެ.
އޭޕްރީލް މަހުގެ 10 ވަނަ ދުވަހު ފަށާ ގޮތަށް ހަމަޖެހިފައިވާ އެފްއޭ ކަޕް މުބާރާތުގައި ބައިވެރިވެފައި ވަނީ ޖުމްލަ އަށް ކްލަބަކުންނެވެ. ނޮކައުޓް އުސޫލުން ކުރިއަށްގެންދާ ގޮތަށް ހަމަޖެހިފައިވާ މި މުބާރާތުގެ ކުއާޓާ ފައިނަލް މެޗުތައް ކުޅޭ ގޮތަށް ހަމަޖެހިފައިވަނީ އޭޕްރީލް މަހުގެ 10 އަދި 11 ވަނަ ދުވަހު އެވެ.
ކުއާޓާ ފައިނަލް މެޗުތަކުގެ ތެރެއިން އެންމެ ފޯރިގަދަވާނެ ކަމަށް ބެލެވެނީ އަންނަ މަހުގެ 10 ވަނަ ދުވަހު ކުޅޭ ގޮތަށް ހަމަޖެހިފައިވާ އޮޑި ސްޕޯޓްސް ކްލަބާއި ނިއުރޭޑިއަންޓް ސްޕޯޓްސް ކްލަބެވެ. މިއީ އެފްއޭ ކަޕް ފުޓްބޯޅަ މުބާރާތުގައި އޮޑި ވާދަކުރާ ފުރަތަމަ ފަހަރަށް ވިޔަސް އެއީ އެންމެ ފަހުން ނިމުނު ޕްރެޒިޑެންޓްސް ކަޕްގެ ޗެމްޕިއަނުންނެވެ. ނިއު ރޭޑިއަންޓުން މި މުބާރާތް 12 ފަހަރު ކާމިޔާބުކޮށްފައިވާއިރު އެ ޓީމު ވަނީ ޕްރެޒިޑެންޓްސް ކަޕްގެ ސެމީ ފައިނަލްގައި ކުޅެފަ އެވެ.
އޭޕްރީލް މަހުގެ 10 ވަނަ ދުވަހު ކުޅޭ ކުއާޓާ ފައިނަލް މެޗުގައި ބައްދަލުކުރާނީ ކްލަބް އީގަލްސް އާއި އެއްވަނަ ޑިވިޝަންގައި ނުކުޅޭ ބްލޫސް ސްޕޯޓްސް ކްލަބެވެ.
އޭޕްރީލް މަހުގެ 11 ވަނަ ދުވަހު ކުޅޭ ކުއާޓާ ފައިނަލް ދެ މެޗުގެ ތެރެއިން އެއް މެޗުގައި ބައްދަލުކުރާނީ ޓީސީ ސްޕޯޓްސް ކްލަބާއި ވިކްޓްރީ ސްޕޯޓްސް ކްލަބެވެ. އަނެއް މެޗުގައި ބައްދަލުކުރާ ގޮތަށް ހަމަޖެހިފައިވަނީ މުބާރާތުގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި ބުރު ސްޕޯޓްސް ކްލަބެވެ.
މުބާރާތުގެ ސެމީ ފައިނަލް 15 ވަނަ ދުވަހު ކުޅޭ ގޮތަށް ހަމަޖެހިފައިވާ އިރު ފައިނަލް މެޗު އޮންނާނީ 18 ވަނަ ދުވަހު އެވެ.
