މި މަހު ފަހުކޮޅު މާލޭގައި ފަށާގޮތަށް ހަމަޖެހިފައިވާ 20 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތަށް ތައްޔާރުވުމުގެ ގޮތުން ރާއްޖޭގެ ޖޫނިއާ ގައުމީ ޓީމު ސަންގަޕޫރުގެ ޖޫނިއާ ގައުމީ ޓީމާއެކު އެކުވެރިކަމުގެ ދެ މެޗު ކުޅޭ ގޮތަށް ހަމަޖެހިއްޖެ އެވެ.
މާޗް މަހުގެ 23 އިން އޭޕްރީލް 3 އަށް ގަލޮޅު ދަނޑުގައި ކުރިއަށްގެންދާ ގޮތަށް ހަމަޖެހިފައިވާ ސާކު ސަރަހައްދުގެ 20 އަހަރުން ދަށުގެ ފުޓްބޯޅަ މުބާރާތުގައި ވާދަކުރާ ރާއްޖޭގެ ގައުމީ ޓީމު ސިންގަޕޫރުގައި ކުޅޭ ދެ މެޗު އޮންނާނީ މި މަހުގެ 8 ވަނަ ދުވަހާއި އަދި 11 ވަނަ ދުވަހު އެވެ.
މި ދެ މެޗަކީ ޖޫނިއާ ގައުމީ ޓީމަށް އިތުރު ތަމްރީނާއި ތަޖުރިބާ ހޯދައިދިނުމުގެ ގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ސިންގަޕޫރުގެ ފުޓްބޯޅަ އެސޯސިއޭޝަނާއެކު ކުރި މަޝްވަރާގެ ތެރެއިން ހަމަޖެހުނު ޓްރެއިނިން ކޭމްޕެއްގެ ތެރޭގައި ހިމަނައިގެން ކުރިއަށްގެންދާ ގޮތަށް ހަމަޖެހިފައިވާ ދެ މެޗެވެ. މި ޓްރެއިނިން ކޭމްޕް ހިނގަމުންދާއިރު ސިންގަޕޫރުގައި ހިނގާ ހުރިހާ ހަރަދެއް އެގައުމުގެ އެފްއޭ އިން ހަމަޖައްސައިދޭނެ ކަމަށް އެފްއޭއެމުން ވަނީ ބުނެފަ އެވެ.
ކުރިން ރާއްޖޭގެ ސީނިއާ ގައުމީ ފުޓްބޯޅަ ޓީމަށް ދެ ފަހަރެއްގެ މަތިން ކޯޗުކަން ކޮށްދީފައިވާ އިސްތަވާން އުރުބާނީގެ އިރުޝާދުގެ ދަށުން ސާފް ޗެމްޕިއަންޝިޕަށް ތައްޔާރުވުމަށްޓަކައި 20 އަހަރުން ދަށުގެ ގައުމީ ޓީމު މިހާރު ވަނީ ފަރިތަކުރުންތައް ފަށައިފަ އެވެ. 20 އަހަރުން ދަށުގެ ގައުމީ ޓީމު ސިންގަޕޫރުގައި ފުރިހަމަކުރުމަށް ހަމަޖެހިފައިވާ ޓްރެއިނިން ކޭމްޕަކީ ހަތް ދުވަހުގެ މުއްދަތަށް ކުރިއަށްދާ ކޭމްޕެއް ކަމަށާއި، ކޭމްޕްގެ މުއްދަތު އިތުރުވުމުގެ ފުރުސަތުވެސް އެބަ އޮތް ކަމަށް އެފްއޭއެމް އިން ވަނީ ބުނެފަ އެވެ.
ރާއްޖޭގައި ބާއްވާ 20 އަހަރުން ދަށުގެ ސާފް ޗެމްޕިއަންޝިޕް ފުޓްބޯޅަ މުބާރާތުގައި ސާކްގެ ހަތް ގައުމުން ވާދަކުރާއިރު މުބާރާތް ކުރިއަށްގެންދާ ގޮތަށް ހަމަޖެހިފައިވަނީ ދެ ގްރޫޕަކަށް ބަހާލައިގެންނެވެ.
ރާއްޖެ ގްރޫޕް އޭގައި ހިމެނިފައި އޮތްއިރު ދެން މި ގްރޫޕްގައި އޮތީ ސްރީ ލަންކާ، ނޭޕާލް އަދި ބޫޓާނެވެ. ގްރޫޕް ބީގައި ހިމެނެނީ އިންޑިއާ، ބަންގްލަދޭޝް އަދި ޕާކިސްތާނެވެ.
