ފުޓްސަލްގެ ތަރިން އުފައްދާފައިވާ، އަދި މިހާރުވެސް ހުނަރުވެރި ގިނަ ކުޅުންތެރިންތަކެއް ނިސްބަތްވާ ކ. ގާފަރުގައި ބާއްވާ ފުޓްސަލް މުބާރާތުގައި ބައިވެރިވާން އެރަށު ކައުންސިލުން ހުޅުވާލައިފި އެވެ.
މިއީ ގާފަރު ކައުންސިލުން އެރަށުގައި ފުޓްސަލް މުބާރާތް ބާއްވާ 8 ވަނަ އަހަރެވެ. މިއަހަރުގެ މުބާރާތުގައި ބައިވެރިވުމުގެ އެންމެ ފަހު ތާރީހަކީ އޮކްޓޫބަރު 8 ވަނަ ދުވަހެވެ.
މިދިޔަ އަހަރުތަކަށް ބަލާއިރު އެރަށުގެ އެންމެ ކާމިޔާބު ފުޓްސަލް ޓީމަކީ ފަސް ފަހަރު ތަށި ހޯދާފައިވާ އެކްސް ބޯއީޒް އެވެ. އެޓީމުން ޗެމްޕިއަންކަން ހޯދީ 2020، 2021، 2023، 2024 އަދި 2025 ވަނަ އަހަރެވެ. ދެން އެންމެ ކާމިޔާބު ޓީމަކީ 2019 އަދި 2022 ވަނަ އަހަރުގެ ތަށި ހޯދި ވައިޕާސް އެވެ. މިހާތަނަށް މުބާރާތުގެ ޗެމްޕިއަނުންގެ ޝަރަފް ލިބުނީ ވެސް ހަމައެކަނި މި ދެ ޓީމަށެވެ.
މިދިޔަ އަހަރުގެ މުބާރާތުގައި 8 ޓީމު ވާދަކުރިއިރު ފައިނަލުގައި އެކްސް ބޯއީޒް މޮޅުވީ އޯކޭ ބޯއީޒްއާ ވާދަކޮށެވެ. މިދިޔަ އަހަރުގެ ތައްޓާ އެކު ޖެހިޖެހިގެން ތިން ތަށި ހޯދުމުގެ ޝަރަފް އެކްސް ބޯއީޒް އަށް ލިބުނެވެ.
މިއަހަރުގެ މުބާރާތުން ފެންނާނެ އެއް ތަފާތަކީ ޗެމްޕިއަން ޓީމާއި ރަނަރަޕް ޓީމަށް ދޭ ފައިސާގެ އިނާމު ބޮޑުކޮށްފައިވުމެވެ. މިދިޔަ އަހަރު ޗެމްޕިއަން ޓީމަށް 30،000 ދިންއިރު މިއަހަރުގެ ޗެމްޕިއަން ޓީމަށް ބައިލައްކަ ދޭގޮތަށް ވަނީ ނިންމާފަ އެވެ. އަދި، ރަނަރަޕް ޓީމަށް މިދިޔަ އަހަރު 20،000 ދިންއިރު، އެ އަދަދު މިއަހަރު ވަނީ 25،000 އަށް ބޮޑުކޮށްފަ އެވެ.
ގާފަރު ފުޓްސަލް މުބާރާތް ހުޅުވާލަނީ ހަމައެކަނި އެރަށުގެ ޓީމުތަކަށް ބައިވެރިވެވޭ ގޮތަށެވެ. އެކަމަކު އެރަށް ކައިރީގައި އޮންނަ ޖުމެއިރާ އޮޅަހަލި އައިލެންޑް ރިސޯޓުން ޓީމެއް މުބާރާތުގައި ބައިވެރިކުރުމަށް ވަނީ ހާއްސަ ހުއްދައެއްދީފަ އެވެ. މުބާރާތުގެ ގަވައިދު ބުނާގޮތުން ކޮންމެ ޓީމެއްގައި ވެސް ރަށުން ބޭރު އެއް ކުޅުންތެރިއަކު ޖެހޭނެ އެވެ.
ގާފަރު ކައުންސިލް ފުޓްސަލް މުބާރާތުގައި ބައިވެރިވާން ހުޅުވާލިއިރު، ގާތްގަނޑަކަށް 1700 އެއްހާ މީހުން ދިރިއުޅޭ ގާފަރަކީ ރާއްޖޭގެ ފުޓްސަލްގައި ފާހަގަކުރެވޭ ރަށެކެވެ. އަދި މިހާރު ރާއްޖޭގެ ފުޓްސަލްގެ ތަރިންނަށް ބަލާއިރު ގާފަރަކީ ފުޓްސަލްގެ މަޝްހޫރު ތަރިން ނިސްބަތްވާ ރަށެކެވެ.
ގާފަރުގެ މަޝްހޫރު ބައެއް ކުޅުންތެރިންނަށް ބަލާއިރު، ތަޖުރިބާކާރު ފުޓްސަލް ތަރި އަލީ މާއިސް (މައްޓު) ހިމެނެ އެވެ. މިހާރުވެސް އެއް ފެންވަރެއްގައި މައްޓު ކުޅެމުން އަންނައިރު ފުޓްސަލްގެ ތާރީހުގައި މައްޓު ވަނީ ގިނަ ކާމިޔާބީތަކެއް ހޯދައިފަ އެވެ.
ގާފަރު ޓީމުގައި ހިމެނޭ ޝަނާން ރަޝާދަކީ މިއަހަރު އޮތް ކްލަބް މޯލްޑިވްސް ކަޕްގެ ޝަރަފްވެރި ކިންގުގެ މަގާމް ހޯދި ކުޅުންތެރިޔާ އެވެ. ޒުވާން ހުނަރުވެރި ޝަނާނަކީ މިހާރު ރާއްޖޭގެ ފުޓްސަލްގައި ފާހަގަކޮށްލެވޭ މޮޅު ކުޅުންތެރިއެކެވެ.
މައްޓު އާއި ޝަނާންގެ އިތުރުން އިބްރާހީމް ރިމާހް (ރިމޭ) ވެސް އަންނަނީ ފުޓްސަލްގައި މޮޅު ކުޅުމެއް ދައްކަމުންނެވެ. ކްލަބް މޯލްޑިވްސް އިން މިއަހަރު ބޭއްވި ކިންގްސް ކަޕްގެ މޮޅު ކުޅުންތެރިޔާގެ މަގާމާއި މިއަހަރު ބޭއްވި އޮފީސް ލީގުގެ މޮޅު ކުޅުންތެރިޔާގެ މަގާމް ވެސް ހޯދީ ރިމޭ އެވެ. މި ކުޅުންތެރިންގެ އިތުރުން ގާފަރުގެ ސާމިން މުހައްމަދު ނަސީރު (ސާންކޮ) އަކީ ވެސް ފުޓްސަލްގައި ޑިމާންޑް ބޮޑު ކުޅުންތެރިއެކެވެ.
މުބާރާތުގައި ބައިވެރިވުމަށް:
https://docs.google.com/forms/d/e/1FAIpQLScuyF8Eaqo-D-34ky2L7-HxN4J17mHS66_gC3BVCYfGwdUqhg/viewform'
އިތުރު މައުލޫމާތު ހޯދުމަށް، 7498930 އަށް ވައިބަރ ކުރުމަށް.
ގާފަރު ކައުންސިލް ކަޕްގެ އެންމެ ފަހުގެ މައުލޫމާތު "ފަހުމިނެޓް" އިން ގެނެސްދިނުމަށް ވަނީ ހަމަޖެހިފަ އެވެ.
