މިލަދޫގައި މިހާރު ކުރިއަށް އެމްވައިއެމް ފުޓްސަލް ޗެލެންޖުގެ ލީގު ބުރުގެ ކުޅުން ނިމި ސެމީ ފައިނަލުގެ ޖާގަތައް ޔަގީންވެއްޖެ އެވެ.
މުބާރާތުގައި މިރޭ ވަނީ ލީގު ބުރުގެ ފަހު ދެ މެޗު ކުޅެފަ އެވެ. ފުރަތަމަ މެޗުގައި ޗިކޯސް އިން ވަނީ ފެލްކަންސްއާ ވާދަކޮށް 0-2 އިން މޮޅުވެފަ އެވެ. އަނެއް މެޗުގައި ގޯލްޑަން ފެލްކަންސްއާ ވާދަކޮށް މާފަރު މޮޅުވީ 3-2 އިންނެވެ.
ލީގު ބުރުގެ އެއް ވަނަ ހޯދީ 10 ޕޮއިންޓާ އެކު ޗިކޯސް އެވެ. ދެ ވަނަ ލިބުނީ 8 ޕޮއިންޓް ހޯދި ޑީ ޓެން އެފްސީ އަށެވެ. ފެލްކަންސް ތިން ވަނަ އަށް ދިޔައީ 4 ޕޮއިންޓާ އެކު އެވެ. ލީގު ބުރުގެ ހަތަރު ވަނަ ހޯދި ގޯލްޑަން ފެލްކަންސް އާއި ފަސް ވަނަ ލިބުނު މާފަރަށް ވެސް 3 ޕޮއިންޓް ލިބުނެވެ. އެކަމަކު ގޯލުގެ ތަފާތުން ހަތަރު ވަނަ ލިބުނީ ގޯލްޑަން ފެލްކަންސް އަށެވެ. އެހެންވެ މާފަރަށް ޖެހުނީ ފަސް ޓީމު ވާދަކުރާ މުބާރާތާ އަލްވަދާއު ކިޔާށެވެ.
ޗިކޯސް އިން މިރޭ ފެލްކަންސް ބަލިކުރި މެޗުގައި ގޯލުތައް ކާމިޔާބުކޮށްދިނީ ފުޓްސަލްގެ ތަޖުރިބާކާރު ދެ ކުޅުންތެރިން ކަމަށްވާ މުހައްމަދު އައްޒާމު އާއި އަލީ މާއިސް (މައްޓު) އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ މައްޓު އެވެ.
ސެމީގެ ފަހު ޖާގަ ހޯދަން ނުކުން ދެ ޓީމު ކަމަށްވާ ގޯލްޑަން ފެލްކަންސް އާއި މާފަރުގެ މެޗު ފެނުނީ ވާދަވެރިކޮށެވެ. މި މެޗުގައި މާފަރަށް ގޯލުތައް ކާމިޔާބުކޮށްދިނީ، ދެ ގޯލު ޖެހި އިރުޝާދު އަދުނާންގެ އިތުރުން އިބްރާހީމް ޒަކަރިއްޔާ އެވެ. ގޯލްޑަން ފެލްކަންސްގެ ދެ ގޯލު ޖެހީ ސައުދު މުހައްމަދު އާއި މުހައްމަދު އިރުޝާދު އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ މާފަރުގެ އިރުޝާދު އެވެ.
https://fahuminet.com/tournaments/miladhoo-mym-futsal-challenge-2026
މުބާރާތުގެ ސެމީ ފައިނަލް ދެ މެޗު އޮންނާނީ ހުކުރު ދުވަހުގެ ރެ އެވެ. ފައިނަލް މެޗު ކުޅުމަށް ހަމަޖެހިފައިވަނީ އަންނަ އާދީއްތަ ދުވަހުގެ ރެ އެވެ.
އެމްވައިއެމް ފުޓްސަލް ޗެލެންޖުގެ މިއަހަރުގެ އޮންލައިން މީޑިއާ ޕާޓްނަރަކީ ފަހުމިނެޓެވެ.
