ކްލަބް މޯލްޑިވްސް ކަޕްގެ ގްރޫޕް ޑީގައި ރޭ އާރްއާރްސީ އާއި އެޗްޑީސީ ވާދަކުރި މެޗު އެޗްޑީސީއިން ކާމިޔާބުކޮށް ގްރޫޕްގެ އެއްވަނައިގައި އެ ޓީމު ހަމަޖެހިލައިފި އެވެ.
މުބާރާތުގެ އެންމެ ފަހުގެ ޗެމްޕިއަން އާރްއާރްސީގެ މައްޗަށް ރޭ އެޗްޑީސީއިން ކުރި ހޯދާފައިވަނީ 0-3 އިންނެވެ. މި މެޗުގައި އެޗްޑީސީއިން ޖެހި ތިން ގޯލްގެ ތެރެއިން ދެ ގޯލް ކާމިޔާބުކޮށްފައިވަނީ މި މުބާރާތުގައި މޮޅު ކުޅުމެއް ދައްކަމުން އަންނަ މުހައްމަދު ސާދު ނިޒާރެވެ. ރޭގެ މެޗުގައި ސާދު ޖެހި ދެ ލަނޑާއެކު އޭނާ މި މުބާރާތުގައި މިހާތަނަށް ޖެހި ގޯލްގެ އަދަދު ނުވައަކަށް އެރީ އެވެ. މުބާރާތުގައި މިހާތަނަށް އެންމެ ގިނަ ގޯލްޖެހި ކުޅުންތެރިންގެ ލިސްޓްގެ އެންމެ ކުރީގައިވެސް އޮތީ ސާދެވެ.
ރޭގެ މެޗުގައި އެޗްޑީސީއިން ކާމިޔާބުކުރި ތިން ގޯލުވެސް ފަހު ހާފުގައި ޖަހާފައިވާއިރު އެ ޓީމުން މިރޭގެ މެޗުގައި ޖެހި ފަހު ގޯލް ކާމިޔާބުކޮށްދީފައިވަނީ ޔޫސުފް ޝާއިފެވެ.
ކްލަބް މޯލްޑިވްސް ކަޕްގައި ރޭ އާރްއާރްސީގެ މައްޗަށް އެޗްޑީސީއިން ހޯދި މޮޅާއެކު އެ ޓީމަށް ވަނީ ކުޅުނު ތިން މެޗުން ނުވަ ޕޮއިންޓް ލިބިފަ އެވެ. ފަސް ޓީމު ހިމެނޭ ހަމައެކަނި ގްރޫޕް ކަމަށްވާ ގްރޫޕް ޑީގެ އެއްވަނައިގައި އެޗްޑީސީ އޮތްއިރު ދެވަނައިގައި އޮތް އާރްއާރްސީއަށާއި، ތިންވަނައިގައި އޮތް ވެމްކޯއަށް ލިބިފައިވަނީ ހަ ޕޮއިންޓެވެ.
https://fahuminet.com/tournaments/club-maldives-cup-2026
ގްރޫޕް ޑީގައި މިރޭ ކުޅުނު އަނެއް މެޗުގައި މުބާރާތުގައި އަދި ޕޮއިންޓެއް ހޯދިފައި ނެތް ފެން ކްލަބާ ވާދަކޮށް 4-8 އިން ވެމްކޯ ވަނީ މޮޅުވެފަ އެވެ. މި މެޗުގައި ވެމްކޯގެ އިބްރާހިމް މައިސާން ހެޓްރިކް ހަދައިފައިވާއިރު އެޓީމަށް ކުޅޭ ބިދޭސީ ކުޅުންތެރިޔާ ވަނީ ދެ ގޯލް ޖަހައިފައެވެ. މި މެޗުގައި ދެން ވެމްކޯއަށް ގޯލްތައް ކާމިތާބުކޮށްދިނީ އަހްމަދު ބައްސާމް މުހައްމަދާއި، އިބްރާހިމް އައިސަމްގެ އިތުރުން އިބްރާހިމް މަހުދީ ހުސައިން (ފޭދޫ އިއްބެ) އެވެ.
ކްލަބް މޯލްޑިވްސް ކަޕްގެ ކުޅުން ދެން އޮންނާނީ އަންނަ އަންގާރަ ދުވަހުގެ ރެ އެވެ. އެރޭ މުބާރާތުގެ ހަތަރު މެޗް ކުޅޭނެ އެވެ.
