ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ކުރިއަށްގެންދާ ޑައިމަންޑް ޖުބިލީ އިންްޓަނޭޝަނަލް މުބާރާތުގައި، ބާކީ އެއް މެޗު އޮއްވައި ރާއްޖޭގެ ގައުމީ ފުޓްބޯޅަ ޓީމު މުބާރާތުން ކަޓައިފި އެވެ.
ރާއްޖެ މުބާރާތުން ކެޓީ މިއަދު ހަވީރު ގަލޮޅު ދަނޑުގައި ޕާކިސްތާނާ ދެކޮޅަށް ކުޅުނު މެޗުން 3-0 އިން ބަލިވުމުންނެވެ.
ލީގު ބުރުގެ ފުރަތަމަ މެޗުގައި ރާއްޖެ ވަނީ އަފްގާނިސްތާން އަތުން 1-0 އިން ބަލިވެފަ އެވެ. ރާއްޖެ އަށް ބާކީ އޮތީ ބަންގްލަދޭޝް މެޗެވެ. އެކަމަކު، އެ މެޗުން މޮޅުވިޔަސް ގަދަ ދެ ޓީމުގައި ހިމެނުމުގެ ފުރުސަތެއް ރާއްޖެއަކަށް ނެތެވެ.
މިއަދުގެ މެޗުގައި ޕާކިސްތާނުން ތިން ގޯލު ވެސް ޖެހީ ދެ ވަނަ ހާފުގަ އެވެ. އެޓީމުގެ ފުރަތަމަ ގޯލު 54 ވަނަ މިނެޓުގައި ޖެހީ އުމަރު ނަވާޒެވެ. ދެ ވަނަ ގޯލު 83 ވަނަ މިނެޓުގައި ޖެހީ އަބްދުއްސަމަދު ޝަހްޒާދު އެވެ.
ޕާކިސްތާނުގެ ފަހު ގޯލު 89 ވަނަ މިނެޓުގައި ޖެހީ ހާރޫން ރާޝިދު ފަހީމް ހާމިދު އެވެ.
މިއަދުގެ މެޗުގައި ރާއްޖޭގެ ޓީމުން ވެސް ވަނީ ފުރުސަތުތައް ތަނަވަސްކޮށް ގިނަ ހަމަލާތަކެއް އުފައްދައިފަ އެވެ. އެކަމަކު ގޯލު ސްކޯ ކުރުމުގައި ރާއްޖެ އަށް މިއަދު ވެސް މައްސަލަ ކުރިމަތިވީ އެވެ.
https://www.fahuminet.com/tournaments/diamond-jubilee-international-football-tournament
މުބާރާތުގައި މިރޭ ކުޅޭ މެޗުގައި ބައްދަލުކުރާނީ އަފްގާނިސްތާނާއި ބަންގްލަދޭޝް އެވެ. ރާއްޖޭގެ ފަހު މެޗުގައި ބަންގްލަދޭޝްއާ ދެކޮޅަށް ނުކުންނާނީ ޖޫން ހަތް ވަނަ ދުވަހުގެ ރެ އެވެ.
