ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތާ ގުޅިގެން، މިއަދު ފެށި ޑައިމަންޑް ޖުބިލީ އިންޓަނޭޝަނަލް މުބާރާތުގެ ފުރަތަމަ މެޗުގައި ޕާކިސްތާނާއި ބަންގްލަދޭޝް ވާދަކޮށް 0-0 އިން އެއްވަރުވެއްޖެ އެވެ.
މި މެޗަކީ މުބާރާތުގެ ފުރަތަމަ މެޗެވެ. މި ދެޓީމުގެ އިތުރުން މުބާރާތުގައި ވާދަކުރަނީ ރާއްޖެ އާއި އަފްގާނިސްތާނެވެ.
ގަލޮޅު ދަނޑުގައި މިއަދު ކުޅުނު މެޗުގައި ބަންގްލަދޭޝްގެ ކެޕްޓަން މޮންޖުރޫރު ރަހުމާނަށް ވަނީ 62 ވަނަ މިނެޓުގައި ސީދާ ރަތް ކާޑެއް ދައްކައިފަ އެވެ. އޭނާ އަށް ރަތް ކާޑު ދެއްކީ ބޯޅަ ނެތިސް ޕާކިސްތާނުގެ ގޯލްކީޕަރު ޔޫސުފް އިޖާޒް ބަޓް އަށް ހަމަލާދިނުމުންނެވެ.
ކުޅުންތެރިއަކު މަދުވުމުން މެޗުގެ ފަހު 30 މިނެޓު ބަންގްލަދޭޝް ކުޅެން ޖެހުނީ އެއް ކުޅުންތެރިއަކު މަދުކޮށެވެ.
މެޗުގައި ދެޓީމުން ވެސް ގޯލު ޖަހާނެ ފުރުސަތުތައް ތަނަވަސްކުރި އެވެ. އެކަމަކު ގަދަ ހޫނުގައި ކުޅުނު މެޗުގައި ދެޓީމުގެ ކުޅުންތެރިންނަށް ވެސް އުނދަގޫތައް ކުރިމަތިވި އެވެ.
https://fahuminet.com/tournaments/diamond-jubilee-international-football-tournament
މެޗުގެ މޮޅު ކުޅުންތެރިޔާގެ މަގާމް ހޯދީ ޕާކިސްތާނުގެ ހަމަލާތައް ދިފާއުކުރުމުގައި މޮޅު ކުޅުމެއް ދެއްކި ބަންގްލަދޭޝްގެ ގޯލްކީޕަރު އެމްޑީ މެހެދީ ހަސަން އެވެ. މެޗަށް ފަހު ބަންގްލަދޭޝްގެ ސަޕޯޓަރުން ވަނީ ގޯލްކީޕަރު ދެއްކި ކުޅުމާއެކު އޭނާ އަށް ބޮޑު ސަޕޯޓެއް ދީފަ އެވެ.
ޑައިމަންޑް ޖުބިލީ މުބާރާތުގެ ދެ ވަނަ މެޗުގައި ރާއްޖެ އާއި އަފްގާނިސްތާން ބައްދަލުކުރާނީ މިރޭ 9 ޖަހާއިރު އެވެ.
