ސައުދީ އަރަބިއާގެ އެންމެ މަތީ ފުޓްބޯޅަ ލީގުގައި ކުޅެމުން އަންނަ ދުނިޔޭގެ މަޝްހޫރު ފުޓްބޯޅަ ކުޅުންތެރިންގެ އަދަދު އަހަރުން އަހަރަށް އަންނަނީ އިތުރުވަމުންނެވެ. މި ކުޅުންތެރިން ސައުދީގައި ކުޅެން އެ ގައުމަށް ދިރިއުޅުން ބަދަލުކުރާއިރު އެ ކުޅުންތެރިންނާއެކު އެމީހުންގެ އަނބިންނާއި ލޯބިވެރިންވެސް ސައުދީއަށް ދިރިއުޅުން ބަދަލުކުރެ އެވެ.
ދުނިޔޭގެ މަޝްހޫރު ގިނަ ފުޓްބޯޅަ ކުޅުންތެރިންގެ އަނބިންނާއި، ލޯބިވެރިންނަކީ ވަރަށް މިނިވަންކަމާއެކު ސްޓައިލިޝް ދިރިއުޅުމެއް އުޅެން ލޯބިކުރާ ބައެކެވެ. ސައްތައިން ސައްތަ މުސްލިމު ގައުމަކަށް ދިރިއުޅުން ބަދަލުކުރަން ޖެހުމަކީ އެމީހުންނަށް ވަރަށް ތަފާތު ތަޖުރިބާއެކެވެ. ގިނަ ގޮންޖެހުންތަކެއް އެމީހުންގެ ދިރިއުޅުމަށް ކުރިމަތިވާ ކަމެކެވެ. އެކަން ތަޖުރިބާކުރަމުން އަންނަ އެކަކީ އިނގިރޭސި ޕްރިމިއާ ލީގުގެ މެންޗެސްޓާ ސިޓީއަށް ކުރިން ކުޅެފައިވާ އަލްޖީރިއާއަށް އުފަން ރިޔާދު މާރޭޒް އަންހެނުން ޓޭލާ ވާޑެވެ.
ވާޑްގެ ދިރިއުޅުމަށް ހީވެސް ނުކުރާ ވަރުގެ ބޮޑު ބަދަލެއް އައީ އޭނާގެ ފިރިމީހާ ސައޫދީ ޕްރޯ ލީގުގެ ކްލަބެއް ކަމަށްވާ އަލް އަހުލީ އަށް ކުޅެން ސޮއިކުރި ވާހަކަ ފޯނުން ގުޅާފައި އޭނާ ގާތު ބުނި ހިސާބުންނެވެ.
"އަހަރެންނަށް ހަމަ ވަގުތުން ރޮވުނު. އެއީ ވަރަށް ހިތް ދަތިވި ވަގުތެއް." އިނގިރޭސި ވިލާތުގެ ނޫހެއް ކަމަށްވާ ދަ ޓައިމްސް އަށް ދިން އިންޓަވިއުއެއްގައި ވާޑް ބުނެފައިވެ އެވެ.
"މަޝްހޫރު ފުޓްބޯޅަ ކުޅުންތެރިޔަކާ ކައިވެނިކުރުމަކީ ލިބޭ ވަރަށް ބޮޑު ޝަރަފެއް. އެއީ ވަރަށް ހިތްގައިމު ދިރިއުޅުމެއް. އަހަރެން މި ބުނި އެއްޗެއްގެ މާނަ ގޯސްކޮށް ނުނަގައްޗޭ. އެކަމަކު އޭގަ ހުރޭ ނުތަނަވަސްވާ ކަންކަންވެސް. އަމިއްލަ ގައުމާ އާއިލާ ދޫކޮށްފަ ބޭރު ގައުމަކަށް ދިރިއުޅުން ބަދަލުކުރަން ޖެހުން ކަހަލަ." ވާޑް ބުނެފައިވެ އެވެ.
މިންގަނޑުތަކެއް ހިފަހައްޓަންޖެހުމާއި، ބައެއް ކަންކަން މަނާވުން
ސައުދީގައި އުޅޭއިރު އެންމެ އުނދަގޫވާ ކަންކަމުގެ ގޮތުގައި މާރޭޒްގެ އަންހެނުން ފާހަގަކުރީ ބޭރުތެރޭގައި އުޅޭއިރު ހެދުން އެޅުން ބަހައްޓަންޖެހޭ ގޮތާއި، ދެޖިންސްގެ މީހުންނަށް އެއްކޮށް ވަދެވޭ ގޮތަށް ހުންނަ ޖިމް ފަދަ ތަންތަން ނެތުމާއި، ރާ ބުއިމަށްޓަކައި ކައިރީގައި އޮންނަ ބަހްރެއިނަށް ދާންޖެހުމެވެ.
މާރޭޒްއާއި ވާޑް ސައުދީގައި ދިރިއުޅެމުން އަންނަނީ އަށް ކޮޓަރި ހުންނަ ގެއެއްގަ އެވެ. އެގޭގައި ދެން ދިރިއުޅެމުން އަންނަނީ އެ ދެމަފިރިންނަށް ލިބިފައިވާ ދެ އަހަރުގެ އަންހެން ދަރިފުޅުގެ އިތުރުން މާރޭޒަށް ބައްޕަ ކިޔާ ދެ އަންހެން ކުދިންނެވެ. ގެއަކީ ރީތި އަދި ޖާގަ ތަނަވަސް ގެއެކެވެ.
ދިރިއުޅެމުން އަންނަ ގެއާ މެދު ކިތަންމެ ހިތްހަމަޖެހުނަސް ވާޑް ބުނާ ގޮތުގައި ސައުދީގައި ވަރަށް ބޮޑަށް އެކަނިވެރިކަން އިހުސާސް ކުރަންޖެހެ އެވެ. ކޮންމެވެސް ވަރަކަށް އަރަބި ދަސްވެފައި ހުއްޓަސް ބަހަކީ އޭނާއަށް އަދިވެސް އޮތް ބޮޑު ގޮންޖެހުމެކެވެ. ގެއަށް ބޭނުންވާ ތަކެތި ގަންނަން ފިހާރަތަކަށް ގޮސް އުޅޭއިރު އެކަމުގެ ސަބަބުން އުނދަގޫތަކާ ކުރިމަތިވެ އެވެ.
ވާޑްގެ އިތުރުން ސައުދީގައި ދިރިއުޅެމުން އަންނަ މަޝްހޫރު ފުޓްބޯޅަ ކުޅުންތެރިންގެ ހަޔާތުގެ ބައިވެރިންގެ ތެރޭގައި ޕޯޗްގަލްގެ ތަރި ކްރިސްޓިއާނޯ ރޮނާލްޑޯގެ ލޯބިވެރިޔާ ޖޯޖީނާ ރޮޑްރިގޭޒާއި، ބްރެޒިލްގެ ފަބީނިއޯގެ އަންހެނުން ރެބެކާ ޓަވަރޭޒާއި އަދި ރޮބާޓީ ފިރްމީނޯގެ އަންހެނުން ލެރީސާ ޕެރޭރާ ހިމެނެ އެވެ.
