އެމްޕީ ފަލާހް ރ. ވެޓަރަންސް ފުޓްސަލް ޗެލެންޖްގެ ކުއާޓާ ފައިނަލްގެ ޖާގަ މަޑުއްވަރި އާއި ހުޅުދުއްފާރުން ކަށަވަރުކުރި އިރު ތިން ޓީމު ހިމެނޭ ގްރޫޕް ސީގެ ވާދަވެރިކަން ބޮޑުވެއްޖެ އެވެ.
ރަސްމާދޫ ކައުންސިލް އިދާރާ އާއި ރަސްމާދޫ ޑިވެލޮޕްމަންޓް އެސޯސިއޭޝަންގެ އިތުރުން އެ ރަށު ސްޕޯޓްސް ކްލަބުން އިންތިޒާމުކޮށްގެން ކުރިއަށްގެންދާ މި މުބާރާތުގެ ކުއާޓާ ފައިނަލުން މަޑުއްވަރި ޖާގަ ހޯދީ އިއްޔެ ހަވީރު ކުޅުނު ގްރޫޕް ބީގެ މެޗުގައި އެ ގްރޫޕްގެ އެއް ވަނައިގައި އޮތް މާކުރަތު 0-4 އިން ބަލިކުރުމަށްފަހު އެވެ.
އިންނަމާދޫގެ މައްޗަށް 0-2 އިން ހޮނިހިރު ދުވަހު ކުރި ހޯދި މާކުރަތަށް މަޑުއްވަރި އާއެކު އިއްޔެ ކުޅުނު މެޗުގައި ހަމަލާތަކެއް އުފައްދަން މަސައްކަތްކުރި ނަމަވެސް މަޑުއްވަރީގެ ގޯލަށް މާ ނުރައްކާ ކުރެވޭ ގޮތެއް ނުވި އެވެ.
މެޗު ފަށައިގެން ދެ މިނެޓް ނުވަނީސް މަޑުއްވަރީގެ ތަރި ޝައްމޫން އިލްޔާސް ކާމިޔާބުކުރި ގޯލާއެކު މެޗުގެ ފުރިހަމަ ކޮންޓްރޯލް އެ ޓީމުން ނެގި އެވެ. އޭގެ ފަހުން އަހްމަދު އަޝްހަދާއި އަދި އަހްމަދު އާތިރު ޖަހައިދިން ގޯލްތަކާއެކު މަޑުއްވަރިން ފުރަތަމަ ހާފު ނިންމާލީ ތިން ލަނޑުގެ ލީޑެއްގަ އެވެ.
ގްރޫޕް ބީގެ ފުރަތަމަ މެޗުގައި އިނގުރައިދޫއާ ވާދަކޮށް އެއްވަރުކުރި މަޑުއްވަރިން މެޗުގައި ޖެހި ފަހު ލަނޑު ކާމިޔާބުކޮށްފައިވަނީ މެޗު ނިމެން ގާތްވެފައި ވަނިކޮށް އަލީ އަބްދުލްހަކީމެވެ. މި މެޗުގެ މޮޅު ކުޅުންތެރިޔާގެ މަގާމު ހޯދީ މަޑުއްވަރި ކުޅުނު ފުރަތަމަ މެޗުގައިވެސް މޮޅު ކުޅުންތެރިޔާގެ މަގާމު ހޯދި ޝައްމޫނެވެ.
މުޅި އަތޮޅަށް ހުޅުވާލައިގެން ކުރިއަށްގެންދާ ވެޓަރަންސް މުބާރާތުގެ ކުއާޓާ ފައިނަލުން ހުޅުދުއްފާރު ޖާގަ ހޯދީ ރޭ ކުޅުނު ގްރޫޕް އޭގެ މެޗުގައި އަނގޮޅިތީމާ ވާދަކޮށް 0-5 އިން މޮޅުވެގެންނެވެ. ރޭގެ މެޗުގައި ހުޅުދުއްފާރުން ޖެހި ފަސް ގޯލްގެ ތެރެއިން ހަތަރު ގޯލް ކާމިޔާބުކޮށްދީފައިވަނީ ހުޅުދުއްފާރުން ހުކުރު ދުވަހުގެ ރޭ ރަސްގެތީމާ ދެކޮޅަށް ކުޅެ 0-7 އިން މޮޅުވި މެޗުގައިވެސް ހެޓްރިކް ހެދި އަބްދުލްމަންނާން އިބްރާހީމް އެވެ.
ރޭގެ މެޗުގައި ހުޅުދުއްފާރުގެ އަބްދުއްރަޝީދު އަހްމަދު ވެސް ގޯލެއް ކާމިޔާބުކޮށްފައިވާއިރު ގްރޫޕް ސްޓޭޖުގެ ފަހު މެޗުގައި އެ ޓީމު ނުކުންނާނީ މިދިޔަ އަހަރުގެ ޗެމްޕިއަން ރަސްމާދޫއާ ދެކޮޅަށެވެ.
މުބާރާތް ހުޅުވި މެޗުގައި ރަސްމާދޫ އަތުން 0-1 އިން ބަލިވި އަނގޮޅިތީމަށް ކުއާޓާ ފައިނަލްގެ ޖާގައެއް ކަށަވަރުކުރެވެން މިހާރު އޮތް ހަމައެކަނި ގޮތަކީ ގްރޫޕް ސްޓެޖުގައި އެ ޓީމް ކުޅެންޖެހޭ ފަހު މެޗުގައި ރަސްގެތީމް ބަލިކުރުމެވެ. ރަސްގެތީމަށް ވެސް އަދި މި މުބާރާތުގައި ޕޮއިންޓެއް ލިބިފައެއް ނުވެ އެވެ.
އުމުރުން 40 އަހަރުން މަތީގެ މީހުންނަށް އެކަނި ކުޅެވޭ ގޮތަށް ހަމަޖެހިފައިވާ މި މުބާރާތުގައި އިއްޔެ ކުޅުނު މެޗުތަކުގެ ތެރެއިން އެންމެ ވާދަވެރި ކުޅުމެއް ފެނުނީ ގްރޫޕް ސީ ގައި އުނގޫފާރާއި، މީދޫ ވާދަކުރި މެޗުގަ އެވެ. މި މެޗު 2-2 އިން އެއްވަރުވި އިރު ދުވާފަރާއި، އުނގޫފާރު ވާދަކުރި މި ގްރޫޕްގެ ފުރަތަމަ މެޗު ވެސް ނިމުނީ އެއްވަރުވެގެންނެވެ. މިއާއެކު މި ގްރޫޕުން ކުއާޓާ ފައިނަލަށް ހޮވޭ ޓީމުތައް ކަށަވަރު ވާނީ މީދޫ އާއި ދުވާފަރު ވާދަކުރާ ގްރޫޕްގެ އެންމެ ފަހު މެޗު ނިމުމުންނެވެ.
ރޭގެ މެޗުގައި ފުރަތަމަ ދެ ގޯލް ޖަހައި ލީޑް ނެގީ އުނގޫފާރުންނެވެ. މެޗުގެ ފުރަތަމަ ހާފުގައި އުނގޫފާރުން ކާމިޔާބުކުރި ދެ ގޯލްވެސް ޖަހައިދީފައިވަނީ އިބްރާހީމް ހަސަން އެވެ. އުނގޫފާރުން ދެ ގޯލް ޖެހުމާ އެކު މީދޫއިން ކުޅުން ރަގަޅުކޮށް ފުރަތަމަ ހާފު ނިމުމުގެ ކުރިން ގޯލެއް ޖަހައި ނަތީޖާގެ ފަރަގު ކުޑަކުރި އެވެ. މި ލަނޑު އެ ޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމު ހޯދި އަޝްރަފް ހަސަން އެވެ. މި މެޗުގައި މީދޫއަށް ނަތީޖާ ހަމަހަމަކޮށްދިން ލަނޑު ކާމިޔތާބުކޮށްދިނީ މުހައްމަދު ސައީދެވެ.
https://www.fahuminet.com/tournaments/r-veterans-futsal-challenge-2026
މުބާރާތުގައި މިއަދުވެސް ތިން މެޗު ކުޅޭ ގޮތަށް ވަނީ ހަމަޖެހިފަ އެވެ. ހަވީރު ކުޅޭ މެޗުގައި ވާދަކުރާނީ ހުޅުދުއްފާރާއި ރަސްމާދޫ އެވެ. މިރޭ ކުޅޭ ފުރަތަމަ މެޗުގައި އިނގުރައިދޫ އާއި އިންނަމާދޫ ވާދަކުރާ ގޮތަށް ހަމަޖެހިފައިވާ އިރު ފަހު މެޗުގައި ބައްދަލުކުރާނީ ރަސްގެތީމާއި އަނގޮޅިތީމެވެ.
