މިހާރު ކުރިއަށްދާ އެފްއޭއެމް ފުޓްސަލް ޗެމްޕިއަންޝިޕްގެ އުތުރުގެ ޒޯން އެކެއްގެ ކުޅުން އިއްޔެ ފެށިއިރު ރާއްޖޭގެ ޗެމްޕިއަން ހދ. ނައިވާދޫ އާއި ށ. އަތޮޅުގެ އެންމެ ވަރުގަދަ އެއް ރަށް ކަމަށްވާ ކަނޑިތީމު ކުޅުނު މެޗު ކާމިޔާބުކޮށްފި އެވެ.
މުޅި ރާއްޖޭގައި ކުރިއަށްދާ އެފްއޭއެމް އެޓޯލް ފުޓްސަލް ޗެމްޕިއަންޝިޕްގައި މިހާރު ކުރިއަށްދަނީ ޒޯން ބުރުގެ މެޗުތަކެވެ. ފުރަތަމަ ކުރިއަށްދަނީ އުތުރުގެ ޒޯން އެކެއް އަދި ޒޯން ދޭއްގެ މެޗުތަކެވެ. ޒޯން އެކެއްގެ މެޗުތައް ހޯސްޓްކުރަނީ ފުޓްސަލްގައި މަޝްހޫރު ރަށް ނައިވާދޫގަ އެވެ.
އަމިއްލަ ސަޕޯޓަރުން ކުރިމަތީ އިއްޔެ ހަވީރު ނައިވާދޫ ވަނީ ބޮޑު ތަފާތަކުން ފިއްލަދޫ ބަލިކޮށްފަ އެވެ. މި މެޗުން ނައިވާދޫ މޮޅުވީ 8-1 އިންނެވެ.
ނައިވަދޫގެ 8 ގޯލުގެ ތެރެއިން މުހައްމަދު ޝާއިން އާއި ޔާނިއު މުހައްމަދު ފާއިޒް، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. ބާކީ ހަތަރު ގޯލު ޖެހީ އަހުމަދު ހަމީދު (އަންމަޑޭ) އާއި އަލީ ހުސާމްގެ އިތުރުން މުހައްމަދު ނިހާދު އަދި އަބްދުﷲ ވިސާމް އެވެ. ފިއްލަދޫގެ ހަމައެކަނި ގޯލު ޖެހީ އަބްދުﷲ އިޚުވާން އެވެ.
އުތުރުގެ ޒޯން އެކެއްގެ ދެ ވަނަ މެޗުގައި ރޭ ކަނޑިތީމު ވަނީ ހދ. ހަނިމާދޫ 6-2 ގެ ތަފާތަކުން ބަލިކޮށްފަ އެވެ. ކަނޑިތީމުން ހޯދި ބޮޑު މޮޅުގައި ހުސައިން ނިހާލް އާއި ރައުލް ނިޔާޒް، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. ދެން ގޯލު ޖެހީ އެޓީމުގެ ކެޕްޓަން އަދި ފުޓްސަލް ތަރި އިބްރާހީމް ނަދާދު (ކުޑައްޓޭ) އާއި ހުސައިން ވާފިރެވެ. ހަނިމާދޫގެ ދެ ގޯލު ވެސް ޖެހީ ނޫރުﷲ ތޯހާ އެވެ.
އުތުރުގެ ޒޯން އެކެއްގައި ވާދަކުރަނީ ފަސް ރަށެވެ. އިއްޔެ ކުޅުނު ހަތަރު ޓީމުގެ އިތުރުން މި ޒޯނުގައި ދެން ވާދަކުރަނީ އިހަވަންދޫ އެވެ.
https://www.fahuminet.com/tournaments/fam-futsal-north-zone-1
މި ޒޯންގެ ކުޅުން ލީގު ބުރެއް ގޮތަށް ކުރިއަށްދާއިރު އެއް ވަނަ އަދި ދެ ވަނަ ޓީމަށް އުތުރު ސަރަހައްދުގެ މުބާރާތުން ފުރުސަތު ލިބޭނެ އެވެ. ޒޯން ޗެމްޕިއަންކަން ކަނޑައަޅާނީ އެ ދެ ޓީމުގެ މެދުގައި ކުޅޭ ފައިނަލް މެޗުންނެވެ.
އުތުރުގެ ޒޯން އެކެއްގެ ކުޅުން ދެން ކުރިއަށްދާނީ މާދަމާ އެވެ.
