އެފްއޭއެމް ފުޓްސަލް ޗެމްޕިއަންޝިޕްގެ އުތުރުގެ ޒޯން ދޭއްގައި އިއްޔެ ކުޅުނު މެޗުތަކަށް ފަހު ރ. އިނގުރައިދޫ ސެމީ ފައިނަލުގެ ޖާގަ ކަށަވަރުކުރިއިރު، ސެމީ ފައިނަލުގެ ދެ ވަނަ ޖާގަ ހޯދަން ބ. ތުޅާދޫ އާއި ޅ. ހިންނަވަރު ގަދަހިފުމަކަށް ދާންޖެހިއްޖެ އެވެ.
މަނަދޫގައި ކުރިއަށްދާ ޒޯން ބުރުގައި ރޭ އިނގުރައިދޫ ވަނީ 4-1 އިން ހިންނަވަރު ބަލިކޮށްފަ އެވެ. މި މޮޅާ އެކު އިނގުރައިދޫ ވަނީ ހަތަރު ޓީމު ހިމެނޭ ގްރޫޕުގެ ފުރަތަމަ ދެ މެޗު ކާމިޔާބުކޮށް 6 ޕޮއިންޓް ހޯދައިފަ އެވެ. ފުރަތަމަ މެޗުގައި އިނގުރައިދޫން ވަނީ ތުޅާދޫ 5-2 އިން ބަލިކޮށްފަ އެވެ.
ރޭގެ މެޗުގައި އިނގުރައިދޫގެ ގޯލުތައް ކާމިޔާބުކޮށްދިނީ ދެ ގޯލު ޖެހި އިބްރާހީމް މުބީން އަހުމަދު ރަޝީދު (މުއްކި) އާއި އަލީ ހާފިޒްގެ އިތުރުން ބިދޭސީ ކުޅުންތެރިޔާ އުލާން އެވެ. މެޗުގައި ދެ ގޯލު ޖެހި މުބީން ވަނީ މޮޅު ކުޅުންތެރިޔާގެ މަގާމް ހޯދައިފަ އެވެ. ހިންނަވަރުގެ ހަމައެކަނި ގޯލު ޖެހީ އަހުމަދު އަޝްރަފެވެ.
އިއްޔެ ހަވީރު ކުޅުނު މެޗުގައި ތުޅާދޫ ވަނީ 5-0 އިން މަނަދޫ ބަލިކޮށްފަ އެވެ. ފުރަތަމަ މެޗުގައި އިނގުރައިދޫ އަތުން ބަލިވިޔަސް އިއްޔެ ހޯދި ބޮޑު މޮޅާ އެކު ތުޅާދޫ އަށް ވަނީ އުންމީދެއް ލިބިފަ އެވެ.
މަނަދޫ ކޮޅަށް ތުޅާދޫން ޖެހި ފަސް ގޯލުގެ ތެރެއިން، ހައްޔާން ހަސަން ހުސައިން އަދި މުހައްމަދު ޒައިން ނިޔާޒް، މިއިން ކޮންމެ ކުޅުންތެރިއަކު ދެ ގޯލު ޖެހި އެވެ. އަނެއް ގޯލު ޖެހީ މުހައްމަދު ތަސްނީމް އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ތުޅާދޫގެ އަރަމުން އަންނަ ތަރި ހައްޔާން އެވެ.
ގްރޫޕް އޭ ގައި އިނގުރައިދޫގެ ފަހަތުން ދެ ވަނައިގައި އޮތީ ތުޅާދޫ އެވެ. ތިން ވަނައިގައި އޮތީ ހިންނަވަރެވެ. ދެ މެޗުން ބަލިވެ ފުލުގައި އޮތް މަނަދޫ އަށް މިހާރު ވަނީ ސެމީގެ ފުރުސަތު ބަންދުވެފަ އެވެ.
އެންމެ ބޮޑު ވާދަވެރިކަމެއް އޮންނާނީ މާދަމާ ރޭ ތުޅާދޫ އާއި ހިންނަވަރު ކުޅޭ މެޗުގަ އެވެ. އެ މެޗު އެއްވަރުކޮށްލައިގެން ވެސް ތުޅާދޫ އަށް ސެމީގެ ޖާގައެއް ޔަގީންވާނެ އެވެ. ހިންނަވަރަށް ސެމީގެ ޖާގައެއް ލިބޭނީ ތުޅާދޫ ބަލިކޮށްގެންނެވެ. ތުޅާދޫ އަށް މިވަގުތު ހިންނަވަރަށް ވުރެ ކުރި ލިބެނީ ޖެހި ގޯލުގެ ތަފާތުންނެވެ. ތުޅާދޫން 7 ގޯލު ޖަހާފައިވާއިރު ހިންނަވަރު ޖަހާފައި ވަނީ 6 ގޯލެވެ.
https://www.fahuminet.com/tournaments/fam-futsal-north-zone-2
އުތުރުގެ ޒޯން ދޭއްގައި މިއަދު ހަވީރު ކުޅޭ މެޗުގައި ބައްދަލުކުރާނީ އޭދަފުއްޓާއި ނ. މަގޫދޫ އެވެ. ސެމީގެ ޖާގައެއް ހޯދަން އޭދަފުއްޓަށް މިއަދުގެ މެޗު ކާމިޔާބުކުރުން މަޖުބޫރެވެ.
