38 އަހަރުގެ ފެޑެރާ އޮސްޓްރޭލިއަން އޯޕަންގެ ސެމީ ފައިނަލަށް

އޮސްޓްރޭލިއާގެ މެލްބަންގައި މިހާރު ކުރިއަށްދާ އޮސްޓްރޭލިއަން އޯޕަން ޓެނިސް މުބާރާތުގެ ސެމީ ފައިނަލަށް ސްވިޒަލޭންޑްގެ ރޮޖާ ފެޑެރާ ދަތުރުކޮށްފި އެވެ. އުމުރުން 38 އަހަރުގެ ފެޑެރާ މުބާރާތުގެ ސެމީ ފައިނަލުން ޖާގަ ހޯދީ މީގެ ކުޑައިރުކޮޅެއް ކުރިން މުބާރާތުގެ ކުއާޓާ ފައިނަލްގައި އެމެރިކާގެ ޓެނީސް ސޭންޑްގްރެންއާ ވާދަކޮށް ތިން ސެޓް ދެ ސެޓުން މޮޅުވެގެންނެވެ. މި މެޗްގެ ސެޓްތައް ފެޑެރާ ގެންގޮސްފައިވަނީ 3-6. 6-2، 6-2، 7-6 އަދި 3-6 އިންނެވެ.
މެޗްގެ ފުރަތަމަ ސެޓް ފެޑެރާ ގެންދިޔަ ނަމަވެސް ޖެހިގެން އައި ދެ ސެޓް ދުނިޔޭގެ ރޭންކިންގެ 100 ވަނައިގައި އޮތް ސޭންޑްގްރެން ފަސޭހަކަމާއެކު ކާމިޔާބުކުރުމުން 1991 ވަނަ އަހަރުގެ ފަހުން މުބާރާތުގެ ސެމީ ފައިނަލަށް ދަތުރުކުރާ އެންމެ ދަށް ރޭންކުގެ ކުޅުންތެރިޔަކަށް އޭނާ ވެދާނެ ކަމަށް ގިނަ ބަޔަކަށް ހީކުރެވުނެވެ. އެކަމަކު 3 ގަޑިއިރާއި 28 މިނެޓަށް ދިގުދެމިގެންދިޔަ މެޗްގެ ފަހު ދެ ސެޓްގައި ވަރަށް ހިތްވަރާއެކު ކުޅެ ފެޑެރާ ވަނީ މެޗް ކާމިޔާބުކޮށްފަ އެވެ.
މުބާރާތުގެ ސެމީ ފައިނަލްގައި ފެޑެރާ ވާދަކުރަންޖެހޭނީ ނޮވާކް ޖޮކޮވިޗް އާއި މިލޯސް ނައޮރިޗް ވާދަކުރާ ކުއާޓާ ފައިނަލް މެޗުން މޮޅުވާ ކުޅުންތެރިޔަކާ އެވެ. އޮސްޓްރޭލިއަން އޯޕަން އަކީ ދުނިޔޭގައި ބޭއްވޭ އެންމެ ޝަރަފްވެރި ހަތަރު ޓެނިސް މުބާރާތުގެ ތެރެއިން އެއް މުބާރާތެވެ.