ކާފް ގެ މޮޅު ކުޅުންތެރިޔާގެ މަގާމް ވެސް ސަލާހަށް

ކޮންފެޑެރޭޝަން އޮފް އެފްރިކަން ފުޓްބޯލް (ސީއޭއެފް) އިން ރޭ ހޮވި މިދިޔަ އަހަރުގެ އެފްރިކާގެ އެންމެ މޮޅު ކުޅުންތެރިޔާގެ މަގާމް ލިވަޕޫލްގެ ހުނަރުވެރި ފޯވާޑް މުހައްމަދު ސަލާހް ހޯދައިފި އެވެ. ޖެހިޖެހިގެން ދެ ވަނަ ފަހަރު ސަލާހް މި އެވޯޑު ހޯދިއިރު މިދިޔަ އަހަރުގެ ފަހުކޮޅު ބީބީސީން ހޮވި ސަރަހައްދުގެ މޮޅު ކުޅުންތެރިޔާގެ މަގާމްވެސް ހޯދީ އުމުރުން 26 އަހަރުގެ ސަލާހް އެވެ. 

މޮޅު ކުޅުންތެރިޔާގެ މަގާމަށް ސަލާހް އާއެކު ވާދަކުރީ އޭނާއާ އެއް ޓީމަކަށް ކުޅޭ ސެނެގާލްގެ ސަޑިއޯ މާނޭ އާއި އާސެނަލަށް ކުޅޭ ގޭބޮންގެ ހުނަރުވެރި ފޯވާޑް ޕިއޭ އެމެރިކް އޮބާމަޔަން އެވެ. ސެނެގާލްގައި ބޭއްވި އެވޯޑު ހަފްލާގައި ސަލާހާ އެވޯޑު ހަވާލުކޮށްދެއްވީ ކޮންފަޑެރޭޝަން އޮފް އެފްރިކަން ފުޓްބޯލް ގެ ރައީސް އަހުމަދު އަހުމަދާއި ކުރީގެ ފުޓްބޯޅަ ތަރި އަދި މިހާރު ލައިބީރިއާގެ ރައީސް ޖޯޖް ވެއާއެވެ.

Advertisement

“އެންމެ ކުޑަ އިރުއްސުރެ މި އެވޯޑު ހޯދުމަކީ އަހަރެންގެ ހުވަފެނެއް. މިފަހަރު އަަރެން މި އެވޯޑު މި ހޯދީ ޖެހިޖެހިގެން ދެ ވަނަ ފަރަހަށް” އެވޯޑަށް ފަހު ސަލާހް ބުންޏެވެ. 

Africa's best XI #AiteoCAFAwards18 pic.twitter.com/FQhnsncR0d

— CAF (@CAF_Online) January 8, 2019

މިދިޔަ ސީޒަނުގައި ސަލާހް ވަނީ ލިވަޕޫލަށް 44 ގޯލު ޖަހައިދީ އެޓީމު ޗެމްޕިއަންސް ލީގުގެ ފައިނަލަށް ގެންގޮސްދިނުމުގައި މޮޅު ކުޅުމެއް ދައްކައިފައެވެ. އަދި، ވޯލްޑް ކަޕްގައި މިސްރު ޓީމަށް ސަލާހް ވަނީ ދެ ގޯލު ޖަހައިދީފައެވެ. މި ސީޒަނުގައި ވެސް ލިވަޕޫލަށް މުހިއްމު ގޯލުތަކެއް ޖަހައިދެމުންދާ ސަލާހް ވަނީ މިހާތަނަށް ކުޅުނު 29 މެޗުގައި 16 ގޯލު ޖަހައިފައެވެ. 

މި ތިން ކުޅުންތެރިން ހިމަނައިގެން އެފްރިކާގެ އެންމެ މޮޅު 11 ކުޅުންތެރިންވެސް ރޭ ވަނީ ހޮވައިފައެވެ. އޭގެ ތެރޭގައި ލިވަޕޫލްގެ ނަބީ ކެއިޓާ އާއި މެންޗެސްޓަރ ޔުނައިޓެޑްގެ ޑިފެންޑަރ އެރިކް ބާއީ، މެންޗެސްޓަރ ސިޓީއަށް ކުޅޭ އަލްޖީރިއާގެ ރިޔާދް މާރޭޒް އަދި ޓޮޓެންހަމް ހޮޓްސްޕާސްގެ ޑިފެންޑަރ ސާޖް އޮރިއޭ ހިމެނެއެވެ. 

ސަލާހަށް މޮޅު ކުޅުންތެރިޔާގެ މަގާމް ލިބުނުއިރު މިއަހަރުގެ ޖޫން މަހު ބާއްވާ އެފްރިކާ ކަޕް އޮފް ނޭޝަންސް ވެސް އޮންނާނީ ސަލާހް ނިސްބަތްވާ މިސްރުގައެވެ. މޮޅު ކުޅުންތެރިޔާގެ މަގާމް ހޮވުމުގެ ކުރިން އިއްޔެ ނެގި ވޯޓުން މިސްރު ކުރި ހޯދީ މުބާރާތް ބާއްވަން ބިޑު ކުރި ސައުތު އެފްރިކާއާއި ވާދަކޮށް 16 ވޯޓު ހޯދައިގެންނެވެ. މިސްރާ ވާދަކުރި، 2010 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތް ބޭއްވި ސައުތު އެފްރިކާއަށް ލިބުނީ އެންމެ ވޯޓެކެވެ. 

އެފްރިކާ ކަޕް އޮފް ނޭޝަންސް މިއަހަރު ބާއްވަން އެންމެ ފުރަތަމަ ނިންމީ ކެމަރޫންގައެވެ. އެކަމަކު މުބާރާތް ބޭއްވުމުގެ ބާރުތައް ނެގީ އެގައުމުގެ ތައްޔާރީތައް މާބޮޑަށްވެސް ލަހުން ދިއުމުގެ ސަބަބުންނެވެ. މިއަހަރުގެ މުބާރާތް ކުޅޭ އަށް ސްޓޭޑިއަމްގެ މަސައްކަތް ކުރިއަށް އޮތް ހަ މަސްތެރޭ މިސްރުން ނިންމަން ޖެހެއެވެ. 

Advertisement