އޭޝިއަން ކަޕް ފުޓްބޯޅަ މުބާރާތް ޔޫއޭއީ ގައި މިއަދު ފަށަނީ

އޭޝިއާ ސަރަހައްދުގެ ފުޓްބޯޅައިގެ އެންމެ ބޮޑު ކުޅިވަރު މުބާރާތް ކަމަށްވާ އޭއެފްސީ އޭޝިއަން ކަޕް މިއަދު ޔުނައިޓެޑް އަރަބް އެމިރޭޓްސް (ޔޫއޭއީ) ގައި ފަށާނެއެވެ. 17 ވަނަ އޭޝިއަން ކަޕްގެ ފުރަތަމަ މެޗުގައި ބައްދަލުކުރާނީ މުބާރާތް ބާއްވާ ޔޫއޭއީ އާއި ބަހްރޭން އެވެ. މި މެޗު ފަށާނީ ރާއްޖެ ގަޑިން މިރޭ ނުވައެއް ޖަހާއިރު އެވެ. 

އެހެން އަހަރުތަކާ ހިލާފަށް މިއަހަރުން ފެށިގެން އޭޝިއަން ކަޕްގައި 24 ޓީމުން މުބާރާތުގައި ކުޅޭނެއެވެ. 2004 އިން ފެށިގެން 2015 ވަނަ އަހަރާއި ހަމައަށް ކުޅުނު މުބާރާތްތަކުގައި ކޮލިފައިވީ 16 ޓީމެވެ. މިފަހަރުގެ މުބާރާތް ކުރިއަށްދާނީ މިއަދުން ފެށިގެން އަންނަ މަހުގެ އެއް ވަނަ ދުވަހުގެ ނިޔަލަށެވެ. 

މުބާރާތުގެ މެޗުތައް ކުޅުމަށް ހަމަޖެހިފައިވަނީ ހަ ގްރޫޕަކަށް ބަހާލައިގެންނެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު އެއިން ކޮންމެ ގްރޫޕަކުން އެންމެ ރަނގަޅު ނަތީޖާ ހޯދާ ދެޓީމު ގަދަ 16 އަށް ކޮލިފައިވާނެއެވެ. ގަދަ 16 ގެ ބާކީ ހަތަރު ޖާގަ ލިބޭނީ ހަ ގްރޫޕުގެ ތެރެއިން އެންމެ ރަނގަޅު ނަތީޖާ އާއެކު ތިން ވަނަ ހޯދާ ޓީމުތަކަށެވެ. މިއަހަރުގެ މުބާރާތުގެ ޗެމްޕިއަން ޓީމަށްވެސް 2021 ވަނަ އަހަރު އޮންނަ ބައްރުތަކުގެ ޗެމްޕިއަނުންގެ މެދުގައި ކުޅެވޭ ފީފާ ކޮންފެޑަރޭޝަންސް ކަޕުން ފުރުސަތު ލިބޭނެ އެވެ. 

ގްރޫޕް ސްޓޭޖުގެ މެޗުތަކަށް ފަހު ގަދަ 16 ގެ އަށް މެޗު ކުޅޭނީ މިމަހުގެ 20، 21 އަދި 22 ވަނަ ދުވަހު އެވެ. ކުއާޓާ ފައިނަލްގެ ހަތަރު މެޗު މިމަހުގެ 24 އަދި 25 ވަނަ ދުވަހު ކުޅޭއިރު ސެމީ ފައިނަލް އޮންނާނީ 28 އަދި 29 ވަނަ ދުވަހު އެވެ. އަބޫދާބީގެ ޒައިދް ސްޕޯޓްސް ސިޓީ ސްޓޭޑިއަމްގައި ފައިނަލް މެޗު ކުޅުމަށް ހަމަޖެހިފައިވަނީ އަންނަ މަހުގެ އެއް ވަނަ ދުވަހުއެވެ. 

މިއީ 1996 ވަނަ އަހަރުގެ ފަހުން ޔޫއޭއީ ގައި މި މުބާރާތް ބާއްވާ ފުރަތަމަ ފަހަރެވެ. ޔޫއޭއީ އާއެކު މި އަހަރުގެ މުބާރާތް ބާއްވަން ބިޑު ކުރީ އިރާނުންނެވެ. މުބާރާތް ބާއްވާ ގައުމުގެ ހައިސިއްޔަތުން ޔޫއޭއީ ކޮލިފައިވިއިރު ބާކީ 23 ޖާގައަށް އޭޝިއާގެ 45 ގައުމަކުން ވަނީ ވާދަކޮށްފައެވެ. ރާއްޖެ ހިމެނޭ ސާކް ސަރަހައްދުން މުބާރާތަށް ކޮލިފައިވީ ހަމައެކަނި އިންޑި އާއެވެ. މި އަހަރުގެ މުބާރާތުގައި އިންޑިއާ ހިމެނެނީ މުބާރާތް ބާއްވާ ޔޫއޭއީ އާއި ބަހްރޭން އަދި ތައިލެންޑާއެކު ގްރޫޕް އޭ ގައެވެ. އިންޑިއާ ކުޅޭ ފުރަތަމަ މެޗުގައި މާދަމާ ހަވީރު ރާއްޖެ ގަޑިން 6:30 ގައި ނުކުންނާނީ ތައިލެންޑާއި ދެކޮޅަށެވެ. 

މި މުބާރާތުގެ އެންމެ ފަހުގެ ޗެމްޕިއަން ޓީމަކީ އޮސްޓްރޭލިއާ އެވެ. 2015 ވަނަ އަހަރު އަމިއްލަ ގައުމުގައި ބޭއްވި މުބާރާތުގެ ޗެމްޕިއަންކަން އޮސްޓްރޭލިއާ ހޯދީ ފައިނަލުގައި ސައުތު ކޮރެއާ 2-1 އިން ބަލިކޮށްގެންނެވެ. 1956 ވަނަ އަހަރު ފެށި މި މުބާރާތުގެ އެންމެ ކާމިޔާބު ޓީމަކީ ހަތަރު ފަހަރު މުބާރާތް ކާމިޔާބު ކޮށްފައިވާ ޖަޕާނެއެވެ. އެޓީމުގެ ފަހަތުން ސައުދީ އަރަބިއްޔާ އަދި އިރާނުން ވެސް ވަނީ ތިން ފަހަރު މި މުބާރާތް ކާމިޔާބު ކޮށްފައެވެ.