ދޮންފަނު އިންވިޓޭޝަން ކަޕްގެ ޗެމްޕިއަންކަން އޭދަފުއްޓަށް

ބ. ދޮންފަނުގައި 23 އަހަރުން ދަށުގެ ކުޅުންތެރިންނަށް އަމާޒުކޮށްގެން ކުރިއަށްގެންދިޔަ އިންވިޓޭޝަން ކަޕް ފުޓްބޯޅަ މުބާރާތުގެ ޗެމްޕިއަންކަން އޭދަފުށި ހޯދައިފި އެވެ. އޭދަފުށި ޗެމްޕިއަންކަން ހޯދީ މިއަދު ހަވީރު ދޮންފަނު ފުޓްބޯޅަ ދަނޑުގައި ކުޅުނު ފައިނަލް މެޗުގައި ކިހާދޫ 2-0 އިން ބަލިކޮށްގެންނެވެ.

ފައިނަލް މެޗު ބެލުމަށް ދެރަށުގެ އެތައް ސަތޭކަ ސަޕޯޓަރުންނެއް މިއަދު ދޮންފަނަށް ޒިޔާރަތް ކޮށްފައިވެއެވެ. މެޗުގެ ފުރަތަމަ ގޯލު އޭދަފުށިން ޖެހީ ފުރަތަމަ މިނެޓުގައެވެ. މި ގޯލު އެޓީމަށް ކާމިޔާބު ކޮށްދިނީ މެޗުގައި މޮޅު ކުޅުމެއްދެއްކި އިބްރާހީމް ޝަރީފް އެވެ. އޭދަފުށީގެ ގޯލަށްފަހު ކިހާދޫ ޓީމުންވަނީ ކުޅުން ރަނގަޅުކޮށް ގޯލެއް ޖަހަން މަސައްކަތް ކޮށްފައެވެ. އެކަމަކު މުޅި މެޗުގައިވެސް ހުށިޔާރުކޮށް ފެނުނު އޭދަފުށީގެ ޑިފެންސް ފޫއަޅުވާލެވޭ ގޮތެއް ނުވިއެވެ. އޭދަފުށީގެ ދެ ވަނަ ގޯލަކީ 66 ވަނަ މިނެޓުގައި ކިހާދޫ ޓީމުގެ އަހުމަދު މިފްޒާލް އަތުން ބައިކޮޅަށް ވަން ގޯލެކެވެ.

Advertisement

މުބާރާތުގެ އެންމެ ގިނަ މަގާމުތައް ހޯދީ އޭދަފުށީ ޓީމުގެ ކެޕްޓަން ހަމްދާން އަބްދުއްސައްތާރު އެވެ. އޭދަފުށީގެ ކެޕްޓަން ހަމްދާން ވަނީ ފައިނަލް މެޗުގެ މޮޅު ކުޅުންތެރިޔާގެ އިތުރުން ފެއާޕްލޭ ކުޅުންތެރިޔާގެ މަގާމާއި މުބާރާތުގެ އެންމެ މޮޅު ކުޅުންތެރިޔާގެ މަގާމްވެސް ހޯދައިފައެވެ. މުބާރާތުގެ އެންމެ މޮޅު ގޯލްކީޕަރަކަށް ހޮވުނީ ގޮއިދޫ ސެމީއަށް ގެންގޮސްދިނުމުގައި މުހިއްމު ދައުރެއް އަދާކުރި އެޓީމުގެ ޝިރުހާން އަލީ އެވެ. މުބާރާތުގެ އުއްމީދީ ކުޅުންތެރިޔާގެ މަގާމް ލިބުނީ ސެމީގައި ކިހާދޫ އަތުން ބަލިވި ދޮންފަނު ޓީމުގެ އަލީ ޝާއިން އަށެވެ. މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމް ހޯދީ ކިހާދޫ ޓީމުގެ ހުސައިން އީމާން އެވެ. މުބާރާތުގެ ފެއާޕްލޭ ޓީމަކަށް ހޮވުނީ ކުޑަރިކިލެވެ.

މުބާރާތުގެ ފައިނަލް މެޗު ޝަރަފްވެރި ކޮށްދެއްވުމަށް ކުޅިވަރާ ބެހޭ ވަޒީރު އަހުމަދު މަހުލޫފް މިއަދު ވަނީ އެރަށަށް ވަޑައިގެންފައެވެ. މީގެ އިތުރުން މުބާރާތް ނިންމުމުގެ ރަސްމިއްޔާތުގައި ބްރޯޑްކާސްޓިން ކޮމިޝަންގެ ރައީސް މުހައްމަދު ޝަހީބު އާއި މަޝްހޫރު ފުޓްބޯޅަ ކޯޗު އަލީ ސުޒޭން ވަނީ ބައިވެރިވެފައެވެ.

އަތޮޅުގެ އާބާދީ އެންމެ ބޮޑު އޭދަފުށިން މިއަދު ދޮންފަނަށް ޒިޔާރަތްކުރި އެތައް ސަތޭކަ ސަޕޯޓަރުންނެއް ވަނީ ޗެމްޕިއަންކަން ލިބުމުން ވަރަށް ބޮޑަށް އުފާފާޅު ކޮށްފައެވެ. އަދި، ތައްޓާއެކު ޓީމު އެރަށަށް ދިއުމުންވެސް ރަށުގެ ރައްޔިތުން ވަނީ ވަރަށް ބޮޑަށް މަރުހަބާ ކިޔައިފައެވެ.

މިއަހަރުގެ މުބާރާތުގައި އަށް ރަށަކުން ވާދަކޮށްފައިވާއިރު މިއީ ދޮންފަނު ޒުވާނުންގެ ރޫހުން މި މުބާރާތް ބޭއްވި ތިން ވަނަ އަހަރެވެ. 2016 ވަނަ އަހަރު ބޭއްވި ފުރަތަމަ މުބާރާތް ކިހާދޫން ކާމިޔާބު ކުރިއިރު މިދިޔަ އަހަރުގެ ޗެމްޕިއަންކަން އޭދަފުށި ބަލިކޮށް ހޯދީ ގޮއިދޫ އެވެ.

Advertisement