1-10 ގެ އެގްރިގޭޓުން މޮޅުވެ ރެއަލްވެސް ގަދަ ސޯޅައަށް

ސްޕެނިޝް ކަޕްގައި ރޭ ތިންވަނަ ޑިވިޝަންގެ ކްލަބެއް ކަމަށްވާ މެލިއްލާއާ ވާދަކޮށް 1-6 އިން ރެއަލް މެޑްރިޑް މޮޅުވުމުން 1-10 ގެ އެގްރިގޭޓް ނަތީޖާއަކާއެކު މުބާރާތުގެ ގަދަ ސޯޅައަށް ރެއަލް ދަތުރުކޮށްފިއެވެ.

ރެއަލްގެ ދަނޑުގައި ކުޅުނު މި މެޗްގައި މާކޯ އަސެންސިއޯއާއި އިސްކޯ ކޮންމެ ކުޅުންތެރިއަކު ދެ ގޯލް ކާމިޔާބުކުރިއެވެ. އަނެއް ދެ ގޯލް ކާމިޔާބުކުރީ ވިނިސިއަސް ޖޫނިއާ އާއި ރެއަލްގެ ޖޯޒީގައި ފުރަތަމަ ފަހަރަށް މެޗަކަށް ނުކުތް ޒަވީ ސަންޗޭޒް އެވެ. ސްޕެއިންގެ ބާރުގެ ދަށުގައި އެފްރިކާގެ އުތުރުގައި އޮންނަ ކުޑަކުޑަ ސަރަހައްދަކަށް ނިސްބަތްވާ މެލިއްލާއިން މެޗްގައި ކާމިޔާބުކުރި ހަމައެކަނި ގޯލް ކާމިޔާބުކުރީ މެޗް ނިމެން ދިހަ މިނެޓަށް ވެފައި ވަނިކޮށް ޔަކީން ގަސްމީ އެވެ.

Advertisement

މި މެޗަށް ރެއަލް އިން ނުކުތް އިރު  އެންމެ ފަހުން ސްޕެނިޝް ލަލީގާގައި 0-2 އިން ވެލެންސިއާ ބަލިކުރި މެޗަށް ނެރުނު ފުރތަމަ އެގާރައަށް ދިހަ ބަދަލެއް ކޯޗް ސަންތިއާގޯ ސޮލާރީ ގެނައެވެ. އެކަމަކު ރޭ ނެރުނު ފުރަތަމަ އެގާރައިގައިވެސް ސްޕެއިންގެ ގައުމީ ޓީމުގައި ހިމެނޭ ހަތަރު ކުޅުންތެރިންނާއި، ޗެމްޕިއަންސް ލީގް ތިން ފަހަރަށް ކާމިޔާބުކޮށްފައިވާ ގޯލްކީޕަރު ކެއިލާ ނަވާސް ހިމަނައިފައިވެއެވެ.

މި މެޗްގެ ފުރަތަމަ ލެގް އޮތީ މިދިޔަ އޮކްޓޯބަރު މަހުގެ 31 ވަނަ ދުވަހުއެވެ. 0-4 ގެ ނަތީޖާއަކުން ރެއަލްއިން ކާމިޔާބުކުރި އެ މެޗަކީ ސޮލާރީ ކްލަބާ ހަވާލުވިފަހުން ކުޅުނު ފުރަތަމަ މެޗެވެ.

Advertisement