މާޒިޔާއިން ފަސޭހަކަމާއެކު ފޯކައިދޫ ބަލިކޮށް ދެވަނަ އަށް

ދިރާގު ދިވެހި ޕްރިމިއަރ ލީގުގައި މިރޭ ށ. ފޯކައިދޫއާ ބައްދަލުކުރި މެޗު 5-0 ގެ ނަތީޖާއަކުން މާޒިޔާ ކާމިޔާބުކޮށްފިއެވެ. މި މެޗުން މޮޅުވުމުން މާޒިޔާ ވަނީ 34 ޕޮއިންޓާއެކު އަލުން ދެވަނަ މަގާމަށް އަރައިފައެވެ. މިމެޗުގެ ކުރިން ދެވަނަ މަގާމުގައި އޮތީ މިއަދު ވިކްޓްރީން މެޗަށް ހާޒިރުނުވުމުން ތިން ޕޮއިންޓް ލިބުނު ކްލަބް އީގަލްސް އެވެ.

މާޒިޔާގެ މި މޮޅާއެކު އެޓީމު ވަނީ އެއްމެޗުމަދުން ކުޅެ އެއްވަނައިގައި އޮތް ޓީސީ ސްޕޯޓްސް ކްލަބާއި ދެޕޮއިންޓް ކައިރިއަށް ޖެހިލައިފައެވެ. 36 ޕޮއިންޓާއެކު އެއްވަނައިގައި އޮތް ޓީސީ މާދަމާ ހަވީރު ކުޅޭ މެޗުގައި ފ. ނިލަންދޫ ބަލިކޮށްފި ނަމަ ފަސް ޕޮއިންޓަށް ލީޑު ފުޅާކުރެވޭނެއެވެ. މިރޭގެ މެޗުން ބަލިވި ފޯކައިދޫއަށް ދެވަނަ ބުރުގައި އަދި އެއްވެސް މެޗެއް ކާމިޔާބު ކުރެވިފައެއް ނުވެއެވެ. ނުވަ ޕޮއިންޓާއެކު އެޓީމު އޮތީ ތާވަލުގެ ހަތްވަނައިގައެވެ.

Advertisement

މިރޭގެ މެޗުގައި މޮޅަށް ކުޅެ ގިނަ ހަމަލާތަކެއް އުފެއްދީވެސް މާޒިޔާއިންނެވެ. ފޯރިއެއްނެތި ކުޅުނު މި މެޗުގައި ލަނޑު ޖަހާނެ ފުރަތަމަ ފުރުސަތު މެޗުގެ ފަސްވަނަ މިނެޓުގައި ލިބުނީ މާޒިޔާގެ ކޮނޭލިއަސް ސްޓެވާޓަށެވެ. ނާއިޒް ހަސަން (ދާދު) ދިން ބޯޅަ ސްޓެވާޓަށް ލިބުމުން ފޯކައިދޫގެ ގޯލްކީޕަރު މުހައްމަދު ޝިފާން ކައިރިން ނައްޓާލުމަށްފަހު ފޮނުވާލުމުން ބޯޅަ ދިޔައީ ދަނޑި ކައިރިން ބޭރަށެވެ. ކީޕަރު ކައިރިން ނައްޓާލިއިރު ސްޓެވާޓަށް އެބޯޅަ ގޯލަށް ފޮނުވާލަން ލިބުނު ޖާގަ އޮތީ ވަރަށްބޮޑަށް ހަނިވެފައެވެ. މާޒިޔާގެ ހަމަލާއަށްފަހު ފެނުނީ ފޯކައިދޫއަށް ލިބުނު ކޯނަރެއްގައި ނުރައްކާކުރިތަނެވެ. އެޓީމުގެ ހަސަން ސުފިޔާން ނަގައިދިން ކޯނަރު އޭރިޔާތެރޭގައި ހުސްކޮށްހުރެ ނަދީމް ނަވާޒް ބޮލުން ޖެހުމުން ދިޔައީ ގޯލުގެ އަރިމަތިން ބޭރަށެވެ.

މާޒިޔާގެ ފުރަތަމަ ލަނޑު މެޗުގެ 14 ވަނަ މިނެޓުގައި ޖެހީ ދާދުއެވެ. އޭރިޔާ ތެރެއިން އަސަދުﷲ އަބްދުﷲ އަށް ލިބުނު ބޯޅަ ގޯލަށް ފޮނުވާލުމުން އެބޯޅަ ލިބުނީ އޭރިޔާތެރޭގައި ހުސްކޮށްހުރި ދާދުއަށެވެ. ދާދު ވަނީ ފަސޭހަ ކަމާއެކު އެއްފަހަރުން ގޯލުގެ ތެރެއަށް ބޯޅަ ފޮނުވާލައިފައެވެ. އޭގެ މިނެޓެއްފަހުން އަސަދުﷲ އަށް ވަނީ ލަނޑު ޖަހާނެ ފުރުސަތެއް ލިބިފައެވެ. އޭރިޔާތެރޭގައި ހުރެ އަސަދުﷲ ހުސްކޮށްހުރެ ބޮލުން ފޮނުވާލި ބޯޅަ ދިޔައީ ހުރަސްދަނޑި މަތިން ބޭރަށެވެ. މާޒިޔާގެ ދެވަނަ ލަނޑު މެޗުގެ 21 ވަނަ މިނެޓުގައި ޖެހީ ސްޓެވާޓެވެ. އޭގެ ދެމިނެޓު ފަހުން އޭރިޔާ ބޭރުގައި ހުރެފައި ޔަސްފާދު ހަބީބު (މުލަކޭ) ފޮނުވާލި ބާރު ބޯޅަ އަމާޒުވީ ގޯލުގެ ދަނޑިއަށެވެ.

ފޯކައިދޫއަށް މެޗުގައި ލަނޑު ޖަހާނެ ދެވަނަ ފުރުސަތުވެސް ލިބުނީ ނަވާޒަށެވެ. މެޗުގެ 33 ވަނަ މިނެޓުގައި އެޓީމުގެ މުހައްމަދު ޖައިލަމް ނަގައިދިން ހުރަސް އެއްފަހަރުން ނަވާޒް ފޮނުވާލިއިރު ގޯލާ އަމާޒެއް ނުވިއެވެ. މާޒިޔާގެ މޫސާ ޔާމީން މެޗުގެ 43 ވަނަ މިނެޓުގައި އޭރިޔާ ބޭރުން ފޮނުވާލީ ހަމަލާ މިމެޗުގައި މާޒިޔާއިން އުފެއްދި ގިނަ ހަމާލަތަކެއް ދިފާއުކުރި ކީޕަރު ޝިފާން މަތަކޮށްފައި ކޯނަރަކަށް ބޭރުކޮށްލިއެވެ. މާޒިޔާއިން މެޗުގެ ތިންވަނަ ލަނޑު ޖެހީ އެކޯނަރުގައެވެ. މާޒިޔާއިން ނެގި ކޯނަރު ކީޕަރު ޝިފާން އަތުގައި ޖެހިފައި ފަހަތަށް ވެއްޓުނު ބޯޅަ ދިފާއުކުރުމުގެ ގޮތުން ފޯކައިދޫގެ އަހްމަދު ވިޖްދާން ފޮނުވާލި ބޯޅަ ގޯލަށްވަނީ ކުރިމަތީގައި ހުރި ކީޕަރު ޝިފާން ގައިގައި ޖެހިފައި ބައިކޮޅަށެވެ.

ދެވަނަ ހާފު ފެށިގެން ލަނޑު ޖަހާނެ ފުރަތަމަ ފުރުސަތު ލިބުނީ ފޯކައިދޫ ޓީމުގެ ނަވާޒަށެވެ. އެކަމަކު އޭރިޔާ ތެރޭގައި ހުރި ނަވާޒަށް ލިބުނު ބޯޅަ ގޯލަށް ފޮނުވާލުމުގެ ކުރިން މާޒިޔާގެ ޑިފެންޑަރު ވަނީ އެބޯޅައަށް ހުރަސް އަޅައިފައެވެ. މާޒިޔާއިން ވަނީ މެޗުގެ 70 ވަނަ މިނެޓުގައި ލަނޑު ޖަހާނެ ރަނގަޅު ފުރުސަތެއް ތަނަވަސްކޮށްފައެވެ. އަސަދުﷲ ނަގައިދިން ހުރަސް އޭރިޔާތެރޭގައި ހުރި ސްޓެވާޓް  ފޮނުވާލި ބާރުބޯޅައިގެ ހުރަހަކަށް ވީވެސް ފޯކައިދޫ ޓީމުގެ ކީޕަރު ޝިފާން އެވެ. ފަހު 20 މިނެޓަށް މާޒިޔާއިން ވަނީ އިސްމާއީލް އީސާ ކުޅެން އަރުވައިފައެވެ. ކުޅެން އެރުމަށްފަހު އީސަ ދިން ފުރަތަމަ ޕާހުގައިވެސް އަސަދުﷲ އަށް ވަނީ ލަނޑު ޖަހާނެ ހުސް ފުރުސަތެއް ލިބިފައެވެ. އަސަދުﷲ އަށް ލިބުނު ބޯޅަ ފޮނުވާލުމުން ދިޔައީ ގޯލުގެ ދަނޑި ކައިރިން ތިރިތިރިން ބޭރަށެވެ.

މާޒިޔާގެ ހަތަރުވަނަ ލަނޑާއި ފަސްވަނަ ލަނޑު ގާތްގާތުގައި ޖެހީ މެޗުގެ މޮޅު ކުޅުންތެރިޔާގެ މަގާމް ހޯދި އަސަދުﷲ އެވެ. 79 ވަނަ މިނެޓުގައި އަސަދުﷲ ގެ ފުރަތަމަ ލަނޑު ޖަހަން މަގުފަހިކޮށްދިނީ ސްޓެވާޓެވެ. ސްޓެވާޓް ނަގައިދިން ހުރަސް އަސަދުﷲ ބޮލުން ގޯލުގެ ތެރެއަށް ފޮނުވާލިއިރު އޭރިޔާ ތެރޭގައި އަސަދުﷲ ހުއްޓުވަން ފޯކައިދޫގެ އެއްވެސް ކުޅުންތެރިއަކު ނެތެވެ. އޭގެ ދެމިނެޓު ފަހުން އީސަ ދިން ހިތްގައިމު ޕާހަކުން އަސަދުﷲ ވަނީ މެޗުގެ ފަސްވަނަ ލަނޑު ޖަހައިފައެވެ. އީސައަށް މެދުތެރެއިން ލިބުނު ބޯޅަ ފޯކައިދޫގެ ޑިފެންޑަރުންގެ ދޭތެރެއިން ތިރިތިރިން ހުސްކޮށްލާފައި އަސަދުﷲ އަށް ދިން ބޯޅަ ގޯލުގެ ތިރީކަނަށް ވައްދާލީ ކީޕަރު ޝިފާން އެބޯޅައަށް އެރިވަގުތުއެވެ.

ލީގުގައި މާދަމާ ހަވީރު ކުޅޭމެޗުގައި ޓީސީ ސްޕޯޓްސް ކްލަބް ނުކުންނާނީ ފ. ނިލަންދޫއާ ދެކޮޅަށެވެ. އަދި މާދަމާރޭ ނިއު ރޭޑިއަންޓާއި ކްލަބް ގްރީން ސްޓްރީޓްސް ވާދަކުރާނެއެވެ.

Advertisement