ޗެލްސީ ސަޕޯޓަރުންގެ ހިތްތައް އަތުލި ޑްރޮގްބާ ފުޓުބޯޅަ ކުޅުން ހުއްޓާލައިފި

ޗެލްސީގެ ކުރީގެ ފޯވަޑް އަދި އައިވަރީ ކޯސްޓްގެ ކެޕްޓަން ޑިޑިއާ ޑްރޮގްބާ، 40، ފުޓުބޯޅަ ކުޅުން ހުއްޓާލައިފިއެވެ.

ފްރާންސްގެ ލެ މާންސް އާއި ގުއިންގަމްޕް ގެ އިތުރުން މާސޭއަށް ކުޅުމަށްފަހު ޗެލްސީއަށް ބަދަލުވި ޑްރޮގްބާއަށް ވަނީ މަދު ދުވަސްކޮޅެއްގެ ތެރޭގައި ޗެލްސީގެ ސަޕޯޓަރުންގެ ލޯތްބާއި ސަޕޯޓް ހޯދާފައެވެ.

ޑްރޮގްބާ ކުޅުން ހުއްޓާލާފައި ވަނީ މިދިޔަ އަހަރު ޖޫންމަހު އޭނާ ބަދަލުވި އެމެރިކާގެ ޔުނައިޓެޑް ސޮކާ ލީގު (ޔޫއެސްއެލް)ގެ ފީނިކްސް ރައިޒިންއާއެކު ޔޫއެސްއެލް ޗެމްޕިއަންޝިޕް ޕްލޭއޮފްގައި މިއަދު ހެނދުނު ކުޅެވުނު ފައިނަލުގައި ލޮއިސްވިލް ސިޓީ އަތުން ބަލިވި މެޗަށް ފަހުއެވެ.

ޑޮރޮގްބާ ވަނީ ފީނިކްސް ރައިޒިންއާއެކު ޔޫއެސްއެލް ވެސްޓާން ކޮންފަރެންސްގެ ޗެމްޕިއަންކަން ހޯދައިދީ، އެޓީމުގެ ތާރީހުގައި ފުރަތަމަ ފަހަރަށް ޗެމްޕިއަންޝިޕް ޕްލޭއޮފަށް ކޮލިފައި ކޮށްދީފައެވެ. ޕްލޭއޮފްގައި އެޓީމު ލޮއިސްވިލް އަތުން ބަލިވީ 1-0 އިންނެވެ.

ފީނިކްސް ރައިޒިން އަށް ބަދަލުވުމަށްފަހު ޑްރޮގްބާ ވަނީ އެޓީމުގެ ހިއްސާއެއްވެސް ގަނެ، ދުނިޔޭގެ ފުރަތަމަ ޕްލޭޔާ އޯނާއަށް ވެފައެވެ.

ޑްރޮގްބާ ވަނީ އޭނާގެ ކެރިއަރުގައި ދެފަހަރު މަތިން ޗެލްސީއަށް ކުޅެފައެވެ. 2004 އިން 2012 އަށް ޗެލްސީގައި ހޭދަކުރި ދުވަސްވަރު އޭނާ ވަނީ ޗެލްސީއަށް ކުޅެދިން 341 މެޗުން 157 ގޯލު ޖަހާދީފައެވެ. މިމުއްދަތުގައި ޑްރޮގްބާ ޗެލްސީއާއެކު ތިން ޕްތިމިއަރ ލީގާއި، ހަތަރު އެފްއޭ ކަޕްގެ އިތުރުން ލީގް ކަޕް ޕާއި ކޮމިއުނިޓީ ޝީލްޑް ދެފަހަރު އަދި ޗެމްޕިއަންސް ލީގު އެއްފަހަރު ކާމިޔާބު ކޮށްފައެވެ.

ޗެލްސީގައި ކުޅުމަށްފަހު ޑްރޮގްބާ ވަނީ ޗައިނާ ސުޕަރ ލީގުގެ ކުލަބް ޝަންހާއީ ޝެންހުއާ އަދި ތުރުކީގެ ކުލަބް ގަލަޓަސަރާއީ އަށް ވެސް ކުޅެފައެވެ. ގަލަޓަސަރާއީއާއެކު ޑްރޮގްބާ ވަނީ ޓާކިޝް ސުޕަރ ލީގާއި ޓާކިޝް ކަޕުގެ އިތުރުން ޓާކިޝް ސުޕަރ ކަޕްވެސް ކާމިޔާބު ކޮށްފައެވެ. އެއަށްފަހު ޑްރޮގްބާ ވަނީ އަލުން ޗެލްސީއަށް އައިސް އެއް ސީޒަން ކުޅެދީފައެވެ. އެ ސީޒަނުގައި އޭނާ ޗެލްސީއާއެކު އިތުރު ޕްރިމިއަރ ލީގު ޓްރޮފީއަކާއި ލީގް ކަޕް ޓްރޮފީއެއް ކާމިޔާބު ކޮށްދީފައެވެ.

ޑްރޮގްބާ ފީނިކްސް ރައިޒިންއާ ގުޅުނީ ޗެލްސީއާއެކު އޭނާ ކުޅުނު އެންމެ ފަހު ސީޒަނަށް ފަހު ދެއަހަރު ވަންދެން އެމެރިކާގެ މޭޖާ ލީގް ސޮކާ (އެމްއެލްއެސް)ގެ ކުލަބް މޮންޓްރިއާލް އިމްޕެކްޓަށް ކުޅުމަށް ފަހުއެވެ.

އައިވަރީ ކޯސްޓް ގައުމީ ޓީމުގެ ކެޕްޓަންކަންވެސް ކޮށްފައިވާ ޑްރޮގްބާ ވަނީ 2006 ވަނަ އަހަރުގެ ފީފާ ވޯޕްޑް ކަޕަށް އެޓީމު ފުރަތަމަ ފަހަރަށް ކޮލިފައި ކޮށްދީގައެވެ. އެފަހަރު “ގްރޫޕް އޮފް ޑެތު” ގައި އޮވެ، ގުރޫޕް ސްޓޭޖުން ކެޓި ނަމަވެސް ޑްރޮގްބާ ވަނީ އެގައުމު 2010 އަދި 2014 ވަނަ އަހަރުގެ ވޯލްޑް ކަޕަށް ވެސް ކޮލިފައި ކޮށްދީފައެވެ. އަނިޔާގައި ހުރެ 2010 ވަނަ އަހަރުގެ ވޯލްޑްކަޕުގައި ކުޅެ، އޭނާ ވަނީ ބްރެޒިލް ކޮޅަށް ލަނޑުޖަހާ، ވޯލްޑް ކަޕެއްގައި ބްރެޒިލް ކޮޅަށް ގޯލުޖެހި އެފްރިކާ ބައްރުގެ ފުރަތަމަ ކުޅުންތެރިޔާގެ ޝަރަފް ވެސް ހޯދާފައެވެ.

ގައުމީ ޓީމަށް 104 މެޗު ކުޅެދީ 65 ގޯލު ޖަހާދީފައިވާ ޑްރޮގްބާ 2014 ވަނަ އަހަރުގެ އޮގަސްޓް މަހު ގައުމީޓީމަށް ކުޅުން ހުއްޓާލުމުގެ ކުރިން ވަނީ އައިވަރީ ކޯސްޓާއެކު އެފްރިކަން ކަޕް އޮފް ނޭޝަންސްގެ ދެވަނަ، ދެފަހަރު މަތިން ހޯދައިދީފައެވެ.

ޑްރޮގްބާ ވަނީ އެފްރިކާ ބައްރުގެ އެންމެ މޮޅު ކުޅުންތެރިޔާގެ މަގާމު ދެފަހަރު އަދި އައިވަރީ ކޯސްޓުގެ އެންމެ މޮޅު ކުޅުންތެރިޔާގެ މަގާމު ތިންފަހަރު ހޯދާފައެވެ.