މާޝިއަލް ތަފާތު ދެއްކުމުން ފްރާންސް ޓީމުން ޖާގަ ދީފި

މެންޗެސްޓާ ޔުނައިޓެޑުގެ ފޯވަޑް އެންތަނީ މާޝިއަލް ކުލަބުގައި ދައްކަމުންދާ ތަފާތު ކުޅުމާއެކު، ފްރާންސްގެ ކޯޗު ޑިޑިއާ ޑިޝޭމްޕްސް އޭނާއަށް އަލުން ގައުމީޓީމުން ޖާހަ ދީފިއެވެ.

ޑިޝޭމްޕްސް ވަނީ ދުނިއޭގެ ޗެމްޕިއަނުން މިމަހުގެ 16 ވަނަ ދުވަހު ނޭޝަންސް ލީގުގައި ނެދަލޭންޑްސް އާއި 20 ވަނަ ދުވަހު އުރުގުއޭއާ ދެކޮޅަށް ކުޅޭ އެކުވެރިކަމުގެ މެޗަށް ނެގި ސޮކޮޑުގައި 22 އަހަރުގެ މާޝިއަލް ހިމަނާފައެވެ.

Advertisement

އެންމެފަހުން ބޭއްވި ވޯލްޑް ކަޕަށް ނެގި ފްރާންސް ސޮކޮޑުން މާޝިއަލް އަށް ޖާގަ ނުލިބުނުއިރު، އޭނާ އެންމެ ފަހުން ގައުމީ ޖޯޒީގައި ކުޅެފައި ވަނީ ނިމިދިޔަ މާޗު މަހުއެވެ.

މިސީޒަނުގައި މިހާތަނަށް މެންޗެސްޓާ ޔުނައިޓެޑަށް އެންމެ ގިނަ ލަނޑު ޖަހާދީފައިވާ މާޝިއަލްއާ ބެހޭގޮތުން ވާހަކަމުން ޑިޝޭމްޕްސް ބުނެފައިވަނީ، އޭނާއަކީ ޒުވާން އަދި ގާބިލު ކުޅުންތެރިއެއް ނަމަވެސް އަބަދު އޭނާގެ ފަރާތުން އެކަންތައް ނުފެންނަކަމަށެވެ. އަދި މިހާރު އޭނާ ޔުނައިޓެޑުގައި ދައްކަމުން އަންނަ ކުޅުމަކީ އޭނާގެ ގާބިލުކަމުގެ ކުޑަ މިންވަރެއް ކަމަށްވެސް ޑިޝޭމްޕްސް ބުންޏެވެ.

މާޝިއަލް އަށް އަލުން ގައުމީ ޓީމުން ޖާގަ ދިން ނަމަވެސް މިސީޒަނުގައި އާސެނަލްގައި ރަނގަޅު ކުޅުމެއް ދައްކަމުން އަންނަ އެލެކްޒެންޑަ ލަކަޒޭ އަށް ޓީމުން ޖާގަ ދީފައެއް ނުވެއެވެ.

މީގެ އިތުރުން ސްޕެއިންގެ ގައުމީ ޓީމަށް ބަލައިލާއިރު މިސީޒަނުގައި ބާސެލޯނާއަށް ދެ ގޯލު ކާމިޔާބުކޮށްދީ، ފަނަރަ ގޯލު ޖަހަން އެހީތެރިވި ޖޯޑީ އަލްބާ ވަނީ އަލުން ގައުމީ ޓީމުގެ ޖާގައެއް ހޯދާފައެވެ. ނަމަވެސް ޗެލްސީއަށް ކުޅެމުން އަންނަ މާކޯ އޮލޮންސޯ އާއި ރިއާލް މެޑްރިޑުގެ ނާޗޯގެ އިތުރުން އެތްލެޓިކޯ މެޑްރިޑްގެ މިޑްފީލްޑަރ ކޯކޭ އަށް ވަނީ ގައުމީޓީމުގެ ޖާގަ ގެއްލިފައެވެ.

Advertisement