ރޮމަނޯލީގެ ގޯލުން އޭސީ މިލާން ފަހުވަގުތު މޮޅުވެއްޖެ

އިޓާލިއަން ސެރީއޭގައި އުޑިނޭސީއާ ދެކޮޅަށް ރޭ އޭސީމިލާނުން ކުޅުނު މެޗުގެ އެންމެ ފަހު ސިކުންތުގައި ޖެހި ގޯލުން 1-0 އިން އުޑިނޭސީ ބަލިކޮށްފިއެވެ.

އޭސީ މިލާނުގެ ޑިފެންޑަރު އަލެސިއޯ ރޮމަނޯލީ މި ލަނޑު ޖެހީ 90 ވަނަ މިނިޓުގެ ކުޅުން ހަމަވެގެން ރެފްރީ ދެއްކި އިތުރު ވަގުތުގެ ފަސް މިނިޓުގެ ކުޅުމުގެ ވެސް އެންމެ ފަހު ސިކުންތުގައެވެ. އުޑިނޭސީގެ ޑިފެންޑަރުންނަށް ހެދުނު ގޯހެއްގެ ބޭނުންހިފައި ކައުންޓަރ އެޓޭކެއްގައި މި ގޯލުޖަހަން ރޮމަނޯލީ އަށް ތަނަވަސް ކޮށްދިނީ ސޫސޯއެވެ.

Advertisement

މެޗުގެ ފުރަތަމަ ހާފުގައި މިލާނުގެ ފޯވަޑް ގޮންޒާލޯ ހިގައިން އަށް އަނިޔާވެ ދަނޑުން ބާލަން ޖެހުނުއިރު، އުޑިނޭސީއިން މެޗުގެ ފަހު ފަސް މިނެޓަށް ކުޅެން އެރުވި ބްރާމް ނައިޓިންކަށް ވަނީ ރަތްކާޑު ދައްކާފައެވެ.

މިސީޒަނުގައި މިލާނުގެ ކެޕްޓަންކަން ވެސް ކުރަމުން އަންނަ ރޮމަނޯލީ ވަނީ އެންމެ ފަހުން އެޓީމު ލީގުގައި ގެނޮއާ އާދެކޮޅަށް ކުޅުނުު މެޗު 1-1 އިން އެއްވަރުވާން ދަނިކޮށް އެންމެ ފަހުމިނިޓުގައި ލަނޑުޖަހާ، ޓީމަށް ތިން ޕޮއިންޓު ހޯދައިދީފައެވެ.

މެޗަށްފަހު މިލާނުގެ ކޯޗު އަދި ކުރީގެ ކުޅުންތެރިޔާ ގެނާރޯ ގަޓޫސޯ ބުނީ އުނދަގޫ މޮޅެއް ނަމަވެސް މެޗާދޭތެރޭ ޖުމްލަކޮށް ވަރަށް ހިތްހަމަޖެހޭ ކަމަށެވެ.

ލާޒިއޯ ވެސް ވަނީ ރޭގެ މެޗުން މޮޅުވެ، ތާވަލުގައި އޭސީމިލާނުގެ ފަހަތުން ފަސްވަނައިގައި ވިއްދާފައެވެ. މިލާނާއި ލާޒިއޯ އަށްވެސް 11 މެޗު ކުޅެގެން 21 ޕޮއިންޓު ލިބޭއިރު، މިލާން ހަތަރުވަނައިގައި އޮތީ ދައިދާ ގޯލުގެ ތަފާތުންނެވެ.

ލާޒިއޯއިން ސްޕަލް ގެ މައްޗަށް ކުރިހޯދީ 4-1 ގެ ނަތީޖާއަކުންނެވެ. ސީރޯ އިމޯބިލޭ މިމެޗުގައި ލާޒިއޯއަށް ދެގޯލު ކާމިޔާބު ކޮށްދިންއިރު ޑެނީލޯ ކަޓާލްޑީ އަދި މާކޯ ޕަރޯލޯވެސް ވަނީ ލަނޑު ޖަހާފައެވެ.

ސެރީއޭގެ ތާވަލުގެ އެއްވަނައިގައި 31 ޕޮއިންޓާއެކު އެއްވެސް މެޗަކުން ބަލިނުވެ ޔުވެންޓަސް އޮތްއިރު، 25 ޕޮއިންޓާއެކު ދެވަނަ އަދި ތިންވަނަ ލިބެނީ އިންޓަރ އާއި ނަޕޯލީއަށެވެ.

Advertisement