ޓޮޓެންހަމްގެ 58 އަހަރުވީ ރެކޯޑް ޕީއެސްޖީއަށް

ފްރާންސް ލީގު 1 ގައި ރޭ ޕީއެސްޖީ އިން ލީލް ބަލިކޮށް، އިނގިރޭސި ވިލާތުގެ ޓޮޓެންހަމް ހޮޓްސްޕާގެ 58 އަހަރުވީ ރެކޯޑް މުގުރާލައިފިއެވެ. ޔޫރަޕުގެ އެންމެ މަތީ ފަންތީގެ ފަސް ލީގުގެ ތެރެއިން ލީގު ފެށިގެން، ޖެހިޖެހިގެން އެންމެ ގިނަ މޮޅު ހޯދި ޓީމުގެ ރެކޯޑް ޕީއެސްޖީއަށް ލިބެނީ ލީގުގައި މިހާތަނަށް މިސީޒަނުގައި އެޓީމު ކުޅުނު 12 މެޗުންވެސް މޮޅުވެގެންނެވެ.

މީގެ ކުރިން މި ތެކޯޑް ޓޮޓެންހަމް އަތުގައި އޮތީ 1960-61 ގެ ސީޒަނުގައި ޖެހިޖެހިގެން 11 މެޗުން މޮޅުވެގެންނެވެ.

Advertisement

ޕީއެސްޖީއިން ރޭގެ މެޗު 2-1 އިން ކާމިޔާބުކުރިއިރު މެޗުގެ ފުރަތަމަ ލަނޑު ފެނިގެންދިއާއީ 70 ވަނަ މިނިޓުގައެވެ. އޭރިޔާ ބޭރުން ފޮނުވާލި ރީތި ހަމަލާއަކުން މި ގޯލު ކާމިޔާބު ކޮށްދިނީ ކިލިއަން އެމްބާޕޭ އެވެ. މިއީ ލީގުގައި އޭނާ ކުޅުނު އަށް މެޗުން ޖެހި 11 ވަނަ ގޯލެވެ. އަދި މިސީޒަނުގައި މިހާތަނަށް އޭނާ ވަނީ ކުޅުނު ޖުމްލަ 11 މެޗުގައި 13 ގޯލު ޖަހާފައެވެ.

ޕީއެސްޖީގެ ދެވަނަ ލަނޑު ނޭމާ ކާމިޔާބު ކޮށްދިންއިރު އިތުރުވަގުތުގެ އެންމެ ފަހު މިނިޓުގައި ލީލް އަށް ސުން ކަނޑުވާލަދިނީ ލިބުނު ޕެނަލްޓީއަކުން ނިކޮލަސް ޕެޕޭ އެވެ.

މި މޮޅާއެކު ޕީއެސްޖީ މިހާރު ލީގު ތާވަލުގެ އެއްވަނާގައި އޮތީ ދެވަނާގައި އޮތް ލީލް އަށް ވުރެ 11 ޕޮއިންޓް ކުރީގައި، 36 ޕޮއިންޓާ އެކުއެވެ.

Advertisement