ކުއާޓާއަށް ދިޔަ ނަމަވެސް ސިޓީއަށް ނުތަނަވަސްކަން

އިނގިރޭސި ލީގުކަޕުގެ ހަތަރުވަނަ ބުރުގައި ރޭ ފުލަމް އަތުން މޮޅުވެ ކުއާޓާ ފައިނަލުން ޖާގަ ހޯދި ނަމަވެސް، މެންޗެސްޓާ ސިޓީގެ ބެލްޖިއަމް މިޑްފީލްޑަރ ކެވިން ޑިބްރޭނާ އަނިޔާވުމުން އެޓީމަށް ނުތަނަވަސްކަމަކާ ކުރިމަތިވެއްޖެއެވެ.

ޑިބްރޭނާއަށް އަނިޔާވެފައި ވަނީ މެޗު ނިމެން ތިން މިނިޓަށް ވެފައިވަނިކޮށެވެ. އޮގަސްޓް މަހު ކަކުލަށް ލިބުނު އަނިޔާއަކުން ސަލާމަތްވުމަށްފަހު މިމެޗަކީީ އޭނާ ސިޓީގައި ފުރަތަމަ އެގާރައިގައި ހިމެނިގެން ކުޅުނު ދެވަނަ މެޗެވެ.

Advertisement

ކަނާތު ކަކުލަސް ލިބުނު ގެއްލުމުން ސަލާމަތްވެ، އަލުން ކުޅުމުގެ ތެރެއަށް އަންނަން ދެމަސްދުވަސް ނެގިއިރު ރޭގެ މެޗުގައި އަނިޔާވެފައިވަނީ އޭނާގެ ވާތު ކަކުލަށެވެ. ރޭގެ އަނިޔާއާބެހޭ އިތުރު މައުލޫމާތެއް އަދި މީޑިޔާއަށް ހާމަކޮށްފައެއް ނުވެއެވެ.

ސިޓީއިން ރޭގެ މެޗު ކާމިޔާބުކުރީ އެޓީމުގެ ޒުވާން ކުޅުންތެރިޔާ ބްރަހިމް ޑިއަޒް ގެ ދެގޯލުން 2-0 ގެ ނަތީޖާއަކުންނެވެ. މެޗުގެ މޮޅު ކުޅުންތެރިޔަކަށްވެސް ހޮވުނީ ސިޓީގެ ދެގޯލު ކާމިޔާބުކޮށްދިން 19 އަހަރުގެ މިޑްފީލްޑަރެވެ.

ކުއާޓާ ފައިނަލުގައި ސިޓީ ބައްދަލުކުރަންޖެހޭނީ ލެސްޓާ ސިޓީ އާއި ސައުތެމްޕްޓަން ބައްދަލުކުރާ މެޗުން މޮޅުވާ ޓީމަކާއެވެ. ހެލިކޮޕްޓަރު ވެއްޓުނު ހާދިސާއެއްގައި ލެސްޓާގެ ވެރިޔާ ވިޗާއީ ސްރިވަދަނަޕްރަވާ މަރުވުމުން މިމެޗު ވަނީ މިމަހުގެ 27 ވަނަ ދުވަހުގެ ރެއަށް ފަސްކުރެވިފައެވެ.

Advertisement