ލަަމްޕާޑު އެނބުރި އައި މެޗުން ޗެލްސީ މޮޅުވެއްޖެ

ކުޅުންތެރިއެއްގެ ގޮތުގައި މީގެ ކުރިން ޗެލްސީއިން ފެނުނު، އެޓީމުގެ ލެޖެންޑް ފްރޭންކް ލަމްޕާޑް، މެނޭޖަރެއްގެ ގޮތުގައި އެޓީމާ ދެކޮޅަށް ނުކުތް މެޗު ޗެލްސީއިން ކާމިޔާބު ކޮށްފިއެވެ.

އިނގިރޭސި ލީގް ކަޕުގެ ފަހަރުވަނަ ބުރުގައި ރޭ ޑާބީ ކައުންޓީއާ ދެކޮޅަށް ޗެލްސީއިން އަމިއްްލަ ދަނޑުގައި ކުޅުނު މިމެޗު ކާމިޔާބުކުރީ 3-2 ގެ ނަތީޖާއަކުންނެވެ. މެޗުގައި ފެނުނު ފަސް ގޯލުވެސް ފެނިގެން ދިޔައީ ފުރަތަމަ ހާފުގައެވެ.

Advertisement

ޗެލްސީއިން ލީޑު ނެގީ މެޗުގެ ފަސްވަނަ މިނިޓުގައި އެޓީމުގެ ޑޭވިޑް ޒަޕަކޯސްޓާ ގޯލް ކުރިމައްޗަށް ނަގައިދިން ބޯޅައެއް ދިފާއުކުރަން އުޅުމުގެތެރޭގައި، ޑާބީގެ ޑިފެންޑަރ ފިކަޔޯ ޓޮމޯރީގެ ފައިގައި ޖެހިފައި ބައިކޮޅަށް ވަތް ގޯލަކުންނެވެ. ޓޮމޯރީއަކީ ޗެލްސީއިން މިސީޒަނުގައި ލޯނުގެ ދަށުން ޑާބީއަށް ދޫކޮށްފައިވާ ކުޅުންތެރިއެކެވެ. އެއަށްފަހު މާ ގިނައިރުތަކެއް ނުވަނީސް ޑާބީގެ ޖެކް މެރިއޮޓް ވަނީ ނުވަވަނަ މިނިޓުގައި ނަތީޖާ ހަމަހަމަ ކޮށްފައެވެ.

މެޗުގައި ދެވަނަ ފަހަރަށްވެސް ލީޑުނެގީ ޗެލްސީއިންނެވެ. ޒަޕަކޯސްޓާގެ ހުރަހަކުން މިގޯލު ވަނީ ޑާބީގެ ކެޕްޓަން ރިޗަޑް ކިޔޯގްގެ ފައިގައި ޖެހިފައެވެ. ދެވަނަ ފަހަރަށް ޗެލްސީއިން ލީޑު ނެގުމާއެކު އޭގެ ހަމިނިޓު ފަހުން ޑާބީއިން އަނެއްކާވެސް ނަތީޖާ ހަމަހަމަ ކުރިއެވެ. ލޯނުގެ ދަށުން ޑާބީއަށް މިސީޒަނުގައި ކުޅެމުން އަންނަ ޗެލްސީގެ މޭސަން މައުންޓްގެ އެހީތެރިކަމާއެކު މިލަނޑު ޑާބީއަށް ކާމިޔާބު ކޮށްދިނީ މާޓީން ވެގޯން އެވެ.

ޗެލްސީ މޮޅުވި ލަނޑު، ހާފު ނިމެން ހަތަރު މިނިޓަށް ވެފައި ވަނިކޮށް ކާމިޔާބު ކޮށްދިނީ މިޑްފީލްޑަރ ސެސްކް ފެބްރިގާސް އެވެ. ފެބްރިގާސްގެ މި ލަނޑަކީވެސް ޒަޕަކޯސްޓާގެ އެހީތެރިކަމާއެކު ކާމިޔާބުކުރި ލަނޑެކެވެ.

ޗެލްސީއަތުން ބަލިވި ނަމަވެސް، މިވަގުތު އިނގިރޭސި ޗެމްޕިއަންޝިޕުގެ ތާވަލުގެ ހަވަނައިގައި އޮތް ޑާބީ ގޮވައިގެން ނުކުމެ ލަމްޕާޑް ވަނީ މިދިޔަ ސެޕްޓެމްބަރު މަހު ލީގް ކަޕް ތިންވަނަ ބުރުގައި އޭނާއަށް ކުރިން ކޯޗްކޮށްދިން ހޯސޭ މޮރީނިއޯ އާދެކޮޅަށް ނުކުމެ، މެންޗެސްޓާ ޔުނައިޓެޑް ބަލިކޮށްފައެވެ.

މި ނަތީޖާއާއެކު ޗެލްސީއިން ލީގް ކަޕްގެ ކުއާޓާ ފައިނަލުގައި އަންނަ ޑިސެމްބަރުމަހު ނުކުންނާނީ، މިދިޔަ ސީޒަނުގައިވެސް މިމުބާރާތުގެ ކުއާޓާގައި އެޓީމުން ވާދަކުރި ބޯންމައުތާ ދެކޮޅަށެވެ.

Advertisement