ބައްޕަ އެކަންޏެއް ނޫން، ދަރިފުޅުވެސް ހަމަ އެހާ ތަފާތު

ކްރިސްޓިއާނޯ ރޯނާލްޑޯ އޭނާގެ ދޮށީ ދަރިފުޅު ކްރިސްޓިއާނޯ ޖޫނިއާގެ ހުނަރު ފެންނަ ވީޑިއޯއެއް ސޯޝަލް މީޑިއާގައި އާއްމު ކުރުމުން ގިނަ ބަޔަކު ރޮނާލްޑޯގެ ދަރިފުޅަށް ތައުރީފް ކޮށްފިއެވެ. ޔުވެންޓަސްގެ ޔޫތް ޓީމަށް ރޮނާލްޑޯ ދަރިފުޅު ޖަހައިދިން ދެ ގޯލުގެ ވީޑިއޯ ރޮނާލްޑޯ ވަނީ އިންސްޓަގްރާމާއި ޓްވިޓާ އަދި ފޭސްބުކް ގައިވެސް އާއްމު ކޮށްފައެވެ. މި ވީޑިއޯ ބަލާފައިވާ އެތައް މިލިއަން ބަޔަކު ވަނީ ކްރިސްޓިއާނޯ ޖޫނިއާއަށް ތައުރީފް އޮއްސާލާފައި ވާއިރު ވީޑިއޯ ވަނީ ސޯޝަލް މީޑިއާގައި ވަރަށް ބޮޑަށް ވައިރަލް ވެފައެވެ. ޔުވެންޓަސްގެ ޔޫތް ޓީމުގައިވެސް ކްރިސްޓިއާނޯ ޖޫނިއާވެސް ބޭނުންކުރަނީ އޭނާގެ ބައްޕަގެ 7 ނަންބަރު ޖާޒީ އެވެ.

ކްރިސްޓިއާނޯ ޖޫނިއާ ޔުވެންޓަސްގެ ޔޫތް ޓީމަށް ޖަހައިދިން ފުރަތަމަ ލަނޑާއެކު ގިނަ ބަޔަކު ފާހަގަ ކުރަނީ ރޮނާލްޑޯގެ ފަހަތުން އޭނާގެ ދަރިފުޅުވެސް ކާމިޔާބު ކުޅުންތެރިއަކަށް ވާނެކަމަށެވެ. ކްރިސްޓިއާނޯ ޖޫނިއާގެ ފުރަތަމަ ގޯލުގައި ކައިރިއަށް އަންނަ ކުޅުންތެރިޔާ ކައިރިން ފަސޭހަކަމާއެކު ނައްޓާލުމަށްފަހު ގޯލުގެ ތެރެއަށް ބޯޅަ ފޮނުވާލަނީ ގޯލްކީޕަރު ކައިރިންވެސް ހިތްގައިމު ގޮތަކަށް ނައްޓާލުމަށްފަހުއެވެ. އެއަށްފަހު ދެވަނަ ގޯލުގައި ފެނިގެންދަނީ ކްރިސްޓިއާނޯ ޖޫނިއާގެ ބޯޅައިގައި ޖެހުމުގެ ހުނަރެވެ. ދަނޑުގެ އަރިމަތިން ބޯޅަ ހިފައިގެން ގޮސް ކްރިސްޓިއާނޯ ޖޫނިއާ ފޮނުވާލާ ބާރު ބޯޅަ ހިފަހައްޓަށް ގޯލް ކީޕަރަށް އެއްވެސް ކަމެއް ނުކުރެވުނެވެ.

Advertisement

https://twitter.com/Cristiano/status/1051469866237071361

މި ވީޑިއޯގެ އިތުރުންވެސް ރޮނާލްޑޯ ވަނީ އޭނާގެ ދަރިފުޅުގެ ގިނަ ވީޑިއޯތަކެއް މީގެކުރިންވެސް ސޯޝަލް މީޑިއާ މެދުވެރިކޮށް ސަޕޯޓަރުންނާއި ހިއްސާ ކޮށްފައެވެ. އޭގެތެރޭގައި ކްރިސްޓިއާނޯ ޖޫނިއާއަށް ތަމްރީނުދޭ ވީޑިއޯތަކާއި ކަސްރަތުކުރާ ވީޑިއޯތައްވެސް ހިމެނެއެވެ.

އުމުރުން އެންމެ އަށް އަހަރުގެ ކްރިސްޓިއާނޯ ޖޫނިއާ ވަނީ މީގެ ކުރިން އޭނާ ކިޔެވި ސްޕެއިންގެ މެޑްރިޑްގެ ސްކޫލް ޓީމުގައި އެންމެ ގިނަ ލަނޑު ޖެހި ކުޅުންތެރިޔާގެ މަގާމް މިދިޔަ އޭޕްރީލް މަހު ހޯދާފައެވެ. އުމުރުން މިހާރު 33 އަހަރުގެ ރޮނާލްޑޯ ރެއާލް މެޑްރިޑް ދޫކޮށް މި ސީޒަނަށް ޔުވެންޓަސްއަށް ބަދަލުވުމަށްފަހު އޭނާގެ ދަރިފުޅުވެސް ވަނީ ޔުވެންޓަސްގެ ޔޫތް އެކަޑެމީގައި ފަރިތަކުރުންތައް ރަސްމީކޮށް ފަށާފައެވެ.

ޕްރޮފެޝަނަލް ތަމްރީނުތައް ފުރިހަމަ ކުރުމަށް ޔުވެންޓަސްގެ ޔޫތް އެކަޑެމީއާއި ގުޅުމަށްފަހު ނުވަ އަހަރުން ދަށުގެ ޓީމު ކުޅުނު އެކުވެރިކަމުގެ ފުރަތަމަ މެޗުގައިވެސް ކްރިސްޓިއާނޯ ޖޫނިއާ ވަނީ ހަތަރު ގޯލު ޖަހާފައެވެ. އެމެޗުން ކްރިސްޓިއާނޯ ޖޫނިއާގެ ޓީމު 5-1 އިން މޮޅުވިއިރު ރޮނާލްޑޯގެ ލޯބިވެރިޔާ ޖޯޖީނާ ރޮޑްރިގޭސްވެސް މެޗު ބެލުމަށް ގޮސްފައިވެއެވެ.

ރޮނާލްޑޯ ބުނެފައިވަނީ އޭނާއަށް ލިބިފައިވާ ހަތަރު ކުދިންގެ ތެރެއިން ކްރިސްޓިއާނޯ ޖޫނިއާ އަކީ އުއްމީދީ ފުޓްބޯޅަ ކުޅުންތެރިއެއް ކަމަށާއި، ދަރިފުޅު އޭނާގެ ރެކޯޑުތައްވެސް މުގުރާލާނެ ކަމަށް އުއްމީދު ކުރާކަމަށެވެ. ސަބަބެއް ކަމަށް ރޮނާލްޑޯ ބުނެފައިވަނީ އޭނާގެ ދަރިފުޅަކީ ބަލިވާން ބޭނުންވާ ކުއްޖެއް ނޫންކަމަށެވެ. ދަރިފުޅަށް ދޭންވާ ހުރިހާ ސަޕޯޓެއްވެސް ދޭނެކަމަށްބުނެ ބައެއް ކަންކަން ދަސްކޮށްދޭން ބޭނުންވާ ކަމަށް ރޮނާލްޑޯ ވަނީ ބުނެފައެވެ.

Advertisement