ސައްޓުގެ ގޯލުން ޓީސީން ނިއު ބަލިކޮށްފި

ދިރާގު ދިވެހި ޕްރިމިއަރ ލީގުގައި މިއަދު ހަވީރު ނިއު ރޭޑިއަންޓާއި ބައްދަލުކުރި މެދުގައި ޓީސީގެ އިޝާން އިބްރާހީމް (ސައްޓު) ޖެހި ހަމައެކަނި ގޯލުން ޓީސީ ސްޕޯޓްސް ކްލަބުން ނިއު ބަލިކޮށްފިއެވެ. މިއީ މިދިޔަ އަހަރަށްފަހު ޓީސީއަށް ނިއު އަތުން ލިބުނު ފުރަތަމަ މޮޅެވެ. މި މޮޅާއެކު ކުޅުނު ފަސް މެޗުންވެސް މޮޅުވެ ތާވަލުގެ އެއްވަނައިގައި ޓީސީ އޮތީ 15 ޕޮއިންޓާއި އެކުއެވެ. ކުޅުނު ފަސްމެޗުން ލިބުނު 10 ޕޮއިންޓާއިއެކު ނިއު އޮތީ ތާވަލުގެ ދެވަނައިގައެވެ.

މިއަދުގެ މެޗަށް ސީޒަނުގައި މިހާތަނަށް 25 ގޯލު ޖަހާފައިވާ އަލީ އަޝްފާގް (ދަގަނޑޭ) ފުރަތަމަ އެގާރައިގައި ހިމަނާފައެއް ނުވެއެވެ. ޓީސީގެ ފޯވާޑް ލައިންގައި ކުޅެމުންދިޔައީ އިޝާން އިބްރާހީމް (ސައްޓު) އަދި އިބްރާހީމް މަހުދީ ހުސައިން (ފޭދޫ އިއްބެ) އެވެ. އާއްމުކޮށް މެދުތެރެއިން ފެންނަ އިބްރާހީމް ވަހީދު ހަސަން (އިއްބެ ވަހީދު) މިއަދުގެ މެޗުގައި ފެނުނީ ފަހަތަށް ކުޅޭތަނެވެ.

Advertisement

އޮސްކާ ބްރުޒޮން ނިއު ދޫކޮށް ބަންގްލަދޭޝްގެ ބަސަންދުރަ ކިންގާއި ހަވާލުވުމުން މިއަދު މެޗުގައިވެސް އިރުޝާދުދިނީ ސީޒަނުގެ ބާކީ ބަޔަށް ނިއުގެ ކޯޗުކަމާއި ހަވާލުވި ސޮބާހު މުހައްމަދު އިބްރާހީމް (ސޮބާ) އެވެ. މިއަދުގެ މެޗުގައި ނިއު ރޭޑިއަންޓް ޓީމުގައި އާއްމުކޮށް ފުރަތަމަ އެގާރައިގައި ހިމެނޭ ހަމްޒާ މުހައްމަދު (ހަމްޕު) އާއި އަކްރަމް އަބްދުލްގަނީ އަދި ރިހާމް އަބްދުލްގަނީ ހިމަނާފައެއް ނުވެއެވެ. މެޗުގައި ނިއުގެ ގޯލު ބެލެހެއްޓީ ސާފް ޗެމްޕިއަންޝިޕް ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމް ހޯދި މުހައްމަދު ފައިސަލެވެ.

މެޗުގެ ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން މޮޅަށް ކުޅުނީ ޓީސީ އެވެ. މެޗުގެ 10 ވަނަ މިނެޓުގައި ޓީސީގެ ސައްޓު ގޯލެއް ޖެހިނަމަވެސް ރެފްރީ ވަނީ ސައްޓުއަށް އެބޯޅަ ލިބުނުއިރު ހުރީ އޮފްސައިޑުގައި ކަމަށް ނިންމާފައެވެ. އޭގެފަހުން 18 ވަނަ މިނެޓުގައި ނިއުގެ އިބްރާހީމް އަތީގް ހަސަން ފޮނުވާލި ބާރުބޯޅަ ދިޔައީ ދަނޑި ކައިރިން ބޭރަށެވެ. މެޗުގެ 36 ވަނަ މިނެޓުގައި ނިއުގެ ރުވާންޑާ ފޯވާޑް އަތުހިއޭ ކިޕްސަންއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފައެވެ. އޭރިޔާތެރޭގައި ހުސްކޮށްހުރެ ލިބުނު ބޯޅަ ކިޕްސަން އަށް ފޮނުވާނުލެވުނީ ބޯޅަ ރަނގަޅަށް ކޮންޓްރޯލް ނުކުރެވުމުންނެވެ. އޭގެ ތިން މިނެޓު ފަހުން ޓީސީގެ މެދުތެރެއަށް ކުޅޭ އައްޒާމް އަބްދުﷲ ފޮނުވާލި ބާރު ބޯޅަ ދިޔައީ ދަނޑި ކައިރިން ބޭރަށެވެ.

ޓީސީގެ ލަނޑު ފުރަތަމަ ހާފު ނިމެން ދެމިނެޓަށް ވެފައިވަނިކޮށް ސައްޓު ޖެހީ ފޭދޫ އިއްބެ ތަނަވަސްކޮށްދިން ފުރުސަތެއްގައެވެ. ނިއުގެ ދެ ޑިފެންޑަރުންގެ ދޭތެރެއިން އަރައި ސައްޓުއަށް ލިބުނު ބޯޅަ ތިރިތިރިން ފޮނުވާލީ ކައިރި ކަނަށެވެ. ސައްޓުގެ ލަނޑަށްފަހު ފުރަތަމަ ހާފު ނިމެނިކޮށް ނިއުގެ ކިޕްސަށްއަށް ގޯލް ކައިރިން ލިބުނު ހުސްފުރުސަތުގެ ބޭނުމެއް ނުހިފުނެވެ.

ދެވަނަ ހާފުގައި ލަނޑު ޖަހާނެ އެންމެ ހުސް ފުރުސަތެއް ލިބުނީ ނިއުގެ ތުރުކަމެނިސްތާން ވިންގާ އާމިރު ގުރުބާނީއަށެވެ. ނިއުގެ އަލީ ފާސިރު (ސެންޓޭ) އޭރިޔާ ތެރޭގައި ހުރެފައި ގުރުބާނީއަށް ދުއްވާލި ބޯޅަ އޭނާއަށް ގޯލާ އަމާޒު ކުރެވޭގޮތެއް ނުވިއެވެ. ގުރުބާނީ ފޮނުވާލި ބޯޅަ ދިޔައީ ގޯލު ދަނޑި މަތިންނެވެ. ދެވަނަ ހާފުގެ މެދުތެރެއިން ޓީސީން ވަނީ ދަގަނޑޭ ކުޅެން އަރުވައިފައެވެ.

މި ހާފުގައި ޓީސީއަށް ލިބުނު ފުރުސަތުތަކުގައި އެޓީމުގެ އަލާ ނާސިރު އަދި ފޭދޫ އިއްބެ ފޮނުވާލި ހަމަލާތައް އަމާޒުވީ ގޯލުގެ ހުރަސް ދަނޑިއަށެވެ. އޭގެ ފަހުން މެޗު ނިމެން ދަނިކޮށް ދަގަނޑޭއަށް ލިބުނު ހުސް ފުރުސަތުގެ ބޭނުން އޭނާއަށް ހިފޭގޮތެއް ނުވިއެވެ. ދަގަނޑޭ ފޮނުވާލި ބޯޅަ ދިޔައީ ގޯލުގެ އަރިމަތިން ބޭރަށެވެ. މެޗުގެ އިތުރު ވަގުތުގައި ނިއުގެ ސޮލާހަށް ވަނީ ލަނޑު ޖަހާނެ ހުސް ފުރުސަތެއް ލިބި ބޭކާރުވެފައެވެ. ސެންޓޭ ފޮނުވާލި ހިލޭޖެހުން ގޯލު ދަނޑީގައި ޖެހިފައި ނުކުތް ވަގުތު ހުސްކޮށްހުރެ ސޮލާހް ފޮނުވާލި ބޯޅަ ދިފާއުކުރީ މެޗުގެ މޮޅު ކުޅުންތެރިޔާގެ މަގާމް ހޯދި ޓީސީގެ ނޭޕާލް ކީޕަރު ލިމްބޫ ކިރަން ކުމާރެވެ.

ލީގުގައި މިރޭކުޅޭ މެޗުގައި ވާދަކުރާނީ ށ. ފޯކައިދޫއާއި ބ. ފެހެންދޫއެވެ. މިމެޗު ފަށާނީ މިރޭ 9 ޖަހާއިރުއެވެ.

Advertisement