ސަލާހާއި ގްރިޒްމަންއަށް ގަދަ އެގާރައިން ފުރުސަތެއް ނެތް

ފީފާއިން ހޮވި ފިފްޕްރޯ ދުނިޔޭގެ ގަދަ އެގާރަ ކުޅުންތެރިންގެ ތެރޭގައި މަޝްހޫރު ބައެއް މޫނުތައް އުނިވެއްޖެއެވެ. އެންމެ ބޮޑަށް ފާހަގަ ކޮށްލެވެނީ މިދިޔަ ސީޒަނުގައި ލިވަޕޫލްގައި މޮޅު ކުޅުމެއް ދެއްކި މުހައްމަދު ސަލާހް ގަދަ އެގާރައިގައި ނުހިމެނުމެވެ. ނަމަވެސް ސަލާހް ވަނީ ފީފާއިން ހޮވި ގަދަ ތިން ކުޅުންތެރިންގެ ތެރޭގައި ހިމެނިފައެވެ. ފީފާއިން ހޮވި އެންމެ މޮޅު ކުޅުންތެރިޔާގެ މަގާމް ހޯދީ ލޫކަ މޮޑްރިޗެވެ.

ސަލާހުގެ އިތުރުން ލިސްޓުގައި ނުހިމެނޭ އެންމެ ފާހަގަ ކޮށްލެވޭ ކުޅުންތެރިއަކީ ފްރާންސުން ވޯލްޑް ކަޕް ކާމިޔާބު ކުރިއިރު މުހިއްމު ދައުރެއް އަދާކުރި އެންޓޮއިން ގްރިޒްމަން އެވެ. މީގެ އިތުރުން ބްރެޒިލްގެ ތަރި ނޭމާއަށްވެސް ގަދަ އެގާރައިން ފުރުސަތު ލިބިފައެއް ނުވެއެވެ. ދެން އެންމެ ފާހަގަ ކޮށްލެވެނީ ފީފާއާއި ވޯލްޑް ކަޕްގެ އެންމެ މޮޅު ގޯލް ކީޕަރުގެ މަގާމްވެސް ހޯދި ތިބައޫ ކޯޓުއާއެވެ.

Advertisement

މިއަހަރުގެ ގަދަ އެގާރަ އިއުލާން ކުރީ ލަންޑަނުގައި މިރޭ ބޭއްވި ހަފްލާގައި ބްރެޒިލްގެ ރޮނާލްޑީނިއޯ އާއި ޖަރުމަނުގެ މައިކަލް ބަލަކެވެ. ގަދަ އެގާރައިގެ ގޯލް ކީޕަރަކަށް ހޮވުނީ މެންޗެސްޓަރ ޔުނައިޓެޑް އަދި ސްޕެއިންގެ ގޯލް ކީޕަރު ޑޭވިޑް ޑިހެއާއެވެ. ޑިފެންސްގައި ހިމެނުނު ހަތަރު ކުޅުންތެރިންނަކީ ޕީއެސްޖީގެ ޑެނީ އަލްވޭސް އާއި ރެއާލް މެޑްރިޑްގެ ފަހަތުގައި މުހިއްމު ދައުރެއް އަދާކުރާ ރަފޭލް ވެރާން އާއި ސާޖިއޯ ރާމޯސްގެ އިތުރުން މާސެލޯ އެވެ. ވެރާން ވަނީ މިފަހަރުގެ ވޯލްޑް ކަޕް ފުޓްބޯޅަ މުބާރާތް ފްރާންސުން ކާމިޔާބު ކުރިއިރު ފަހަތުގައި މޮޅު ކުޅުމެއް ދައްކާ މުބާރާތުގައި އުރުގުއޭ ކޮޅަށް ގޯލުވެސް ޖަހާފައެވެ. ޑިފެންސްގައި ހިމެނުނު މާސެލޯ އާއި ރާމޯސް ވަނީ މިދިޔަ ސީޒަނުގައި ރެއާލް މެޑްރިޑް ޖެހިޖެހިގެން ތިންވަނަ ފަހަރަށް ޗެމްޕިއަންސް ލީގު ކާމިޔާބު ކުރިއިރު މުހިއްމު ދައުރެއް އަދާކޮށްފައެވެ. ޑިފެންސްގައި ޑެނީ އަލްވޭސް ހިމެނުމުން ގިނަ ބަޔަކަށް ވަނީ ހައިރާންކަން ލިބިފައެވެ. އަލްވޭސް މިދިޔަ ސީޒަނުގައި ހޯދި އެންމެ ބޮޑު ކާމިޔާބީއަކީ ޕީއެސްޖީއާއެކު ފްރެންޗް ލީގެވެ. އަނިޔާގެ ސަބަބުން މިފަހަރުގެ ވޯލްޑް ކަޕް ފުޓްބޯޅަ މުބާރާތުގެ ބްރެޒިލް ޓީމުންވެސް އަލްވޭސް ފެނިފައެއް ނުވެއެވެ.

މެދުތެރޭގައި ހިމެނުނު ކުޅުންތެރިންނަކީ މޮޅު ކުޅުންތެރިޔާގެ މަގާމް ހޯދި ލޫކަ މޮޑްރިޗާއި ޗެލްސީ އަދި ފްރާންސްގެ މުހިއްމު ކުޅުންތެރިޔާ އެންގޯލޯ ކާންޓޭ އެވެ. ފްރާންސުން މިފަހަރުގެ ވޯލްޑް ކަޕް ކާމިޔާބު ކުރިއިރު މެދުތެރޭގެ މައި ތަނބެއްގެ ގޮތުގައި ފެނުނީ ކާންޓޭ އެވެ. މި ދެކުޅުންތެރިންނާއެކު މެދުތެރޭގައި ހިމެނުނީ ފްރާންސްގެ ޒުވާން ތަރި ކިލިއަން އެމްބާޕޭ އާއި ޗެލްސީ އަދި ބެލްޖިއަމްގެ ހުނަރުވެރި ކުޅުންތެރިޔާ އެޑެން ހެޒާޑެވެ. އުމުރުން 19 އަހަރުގެ އެމްބާޕޭ ވަނީ ވޯލްޑް ކަޕް ތަށި ފްރާންސް ކާމިޔާބު ކުރިއިރު ފައިނަލުގައި ކްރޮއޭޝިޔާ ކޮޅަށް ލަނޑު ޖަހާފައެވެ. އެ މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމްވެސް ހޯދީ އޭނާއެވެ. ހެޒާޑްގެ ކުޅުން އެންމެ ބޮޑަށް ފެނުނީ މިފަހަރުގެ ވޯލްޑް ކަޕްގައެވެ. ބެލްޖިއަމުން ވޯލްޑް ކަޕްގައި ތިންވަނަ ހޯދިއިރު މުޅި ޓީމުގެ އެންމެ މުހިއްމު ކުޅުންތެރިއެއްގެ ގޮތުގައި ފެނުނީ އޭނާއެވެ. ހަޒާޑުގެ ބެލްޖިއަމް ވޯލްޑް ކަޕުން ކެޓީ ސެމީ ފައިނަލުގައި ފްރާންސާއި ވާދަކޮށް 1-0 އިން ބަލިވުމުންނެވެ.

ގަދަ އޭގާރައިގެ ފޯވާޑުންގެ ގޮތުގައި ހިމެނުނު ދެ ކުޅުންތެރިންނަކީ ކްރިސްޓިއާނޯ ރޮނާލްޑޯ އާއި ލިއޮނެލް މެސީއެވެ. ރޮނާލްޑޯ ވަނީ މިދިޔަ ސީޒަނުގައި 44 ގޯލް ޖަހާފައެވެ. މިދިޔަ ސީޒަނުގައި ރެއާލް މެޑްރިޑުން ޖެހިޖެހިގެން ތިންވަނަ ފަހަރަށް ޗެމްޕިއަންސް ލީގު ހޯދިއިރު ރޮނާލްޑޯ އަކީ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާއެވެ. މެސީ ވަނީ މިދިޔަ ސީޒަނުގައި ބާސެލޯނާއިން ލީގާއި ކޮޕަޑެލްރޭ ކާމިޔާބު ކުރިއިރު މުހިއްމު ދައުރެއް އަދާކޮށްފައެވެ. މިދިޔަ ސީޒަނުގަ ޖެހި 45 ގޯލާއެކު މެސީއަކީ ޔޫރަޕްގައި މިދިޔަ ސީޒަނުގައި އެންމެ ގިނަ ގޯލުވެސް ޖެހި ކުޅުންތެރިޔާއެވެ.

Advertisement