ދުނިޔޭގެ ރޭންކިންގެ އެއްވަނައިގައި ފުރަތަމަ ފަހަރަށް ދެގައުމެއް

ފީފާއިން އިއްޔެ އާއްމުކުރި ދުނިޔޭގެ ރޭންކިންގައި ފުރަތަމަ ފަހަރަށް ދެގައުމެއް ހިމެނިއްޖެއެވެ. މިފަހަރު ދުނިޔޭގެ އެއްވަނައިގައި ހިމެނެނީ އެއްވަރަކަށް ޕޮއިންޓް ލިބުނު ފްރާންސާއި ބެލްޖިއަމެވެ. މި ދެޓީމަށްވެސް ލިބުނީ 1729 ޕޮއިންޓެވެ. ފްރާންސަކީ މިދިޔަ ޖުލައި މަހު ދުނިޔޭގެ ޗެމްޕިއަންކަން ހޯދި ޓީމެވެ. ބެލްޖިއަމް ވޯލްޑް ކަޕުން ކެޓީ ސެމީ ފައިނަލުގައި ފްރާންސާއި ވާދަކޮށް ބަލިވުމުންނެވެ. ތިންވަނަ ހޮވި މެޗުގައި އިންގްލެންޑް ބަލިކޮށް އެޓީމުން ވަނީ މުބާރާތުގެ ތިންވަނަ ފުރަތަމަ ފަހަރަށް ހޯދާފައެވެ.

ދުނިޔޭގޭ ރޭންކިން 1992 ވަނަ އަހަރު ހޮވަން ފެށިފަހުން ވޭތުވެދިޔަ 25 އަހަރުތެރޭ އެއްވެސް ފަހަރަކު ދެގައުމެއް އެއްވަނައިގައި ހިމެނިފައެއް ނުވެއެވެ. ވޭތުވެދިޔަ 25 އަހަރުތެރޭ ދުނިޔޭގެ އެއްވަނަ ހޯދިފައިވަނީ އަށް ގައުމަކަށެވެ. އެއީ އާޖެންޓީނާ، ބެލްޖިއަމް، ބްރެޒިލް، ޖާމަނީ، އިޓަލީ، ނެދަލޭންޑްސް އަދި ސްޕެއިން އެވެ. މީގެ ތެރެއިން އެންމެ ދިގު މުއްދަތަކަށް ދުނިޔޭގެ އެއްވަނަ މަގާމުގައި އޮތީ ފަސް ފަހަރު ވޯލްޑް ކަޕް ކާމިޔާބު ކޮށްފައިވާ ބްރެޒިލް އެވެ.

Advertisement

ދުނިޔޭގެ ރޭންކިންގެ ގަދަ ދިހައެއްގައި ހިމެނޭ ގައުމުތައް. މިއީ ދެގައުމެއް އެއްވަނައިގައި ހިމެނުނު ފުރަތަމަ ފަހަރު

ފްރާންސް ވަނީ ވޯލްޑް ކަޕަށްފަހު ޔޫއެފާއިން އަލަށް ތައާރަފްކުރި ޔޫއެފާ ނޭޝަންސް ލީގުގެ ދެމެޗެއް ކުޅެފައެވެ. ފުރަތަމަ މެޗު ޖަރުމަނާއި ވާދަކޮށް 0-0 އިން އެއްވަރުވިއިރު ދެވަނަ މެޗުގައި އެޓީމު ވަނީ 2-1 އިން އަމިއްލަ ދަނޑުގައި ނެދަލޭންޑްސް ބަލިކޮށްފައެވެ. ވޯލްޑް ކަޕަށްފަހު ބެލްޖިއަމުންވެސް ވަނީ އެޓީމުގެ ފޯމު ދަމަހައްޓާފައެވެ. އެކުވެރިކަމުގެ މެޗެއްގައި ސްކޮޓްލޭންޑް 4-0 އިން ބަލިކުރިއިރު އެޓީމުން ވަނީ ނޭޝަންސް ލީގުގެ ފުރަތަމަ މެޗުގައި 3-0 އިން އައިސްލޭންޑް ބަލިކޮށްފައެވެ.

ދުނިޔޭގެ ގަދަ ބާރު ޖަރުމަނަށް މިފަހަރުގެ ރޭންކިންގައި ލިބެނީ 12 ވަނައެވެ. އާޖެންޓީނާއަށް 11 ވަނަ ލިބޭއިރު ވޯލްޑް ކަޕަށް ކޮލިފައިނުވި އިޓަލީ އޮތީ 20 ވަނައިގައެވެ. މިފަހަރު އެންމެ ބޮޑު ކުރިއެރުމެއް ހޯދީ ދާދިފަހުން ނޭޝަންސް ލީގުގެ ދެމެޗުވެސް ކާމިޔާބުކުރި ޔޫކްރޭން އެވެ. ހަ ދަރަޖައިގެ ކުރިއެރުމަކާއި އެކު އެޓީމަށް ލިބެނީ 29 ވަނަ އެވެ.

Advertisement