ޕާކިސްތާން ބަލިކޮށް އިންޑިޔާ އަނެއްކާވެސް ފައިނަލަށް

ސާފް ސުޒުކީ ކަޕް ދެވަނަ ސެމީ ފައިނަލުގައި ޕާކިސްތާން 3-1 އިން ބަލިކޮށް އިންޑިޔާ ފައިނަލަށް ދަތުރު ކޮށްފިއެވެ. މިއީ ޖެހިޖެހިގެން އިންޑިޔާ މި މުބާރާތުގެ ފައިނަލަށް ދަތުރުކުރި ހަތްވަނަ ފަހަރެވެ. އިންޑިޔާއަށް އެންމެ ފަހުން ފައިނަލުގެ ޖާގައެއް ގެއްލުނީ 2003 ވަނަ އަހަރު ބަންގްލަދޭޝްގައި އޮތް މުބާރާތުގައެވެ. އެ މުބާރާތުގެ ފައިނަލުގައި ރާއްޖެއާ ވާދަކޮށް ޗެމްޕިއަންކަން ހޯދީ ބަންގްލަދޭޝް އެވެ.

މިއަދުގެ މެޗުގައި ގިނަ ވަގުތު ބޯޅަ ހިފަހައްޓައިގެން ކުޅުނު އިންޑިޔާ ޓީމުގެ ލަނޑުތައް ޖަހައިދިނީ މަންވީރު ސިންހާއި ސުމިތް ޕަސީއެވެ. މެޗުގައި އިންޑިޔާގެ ފުރަތަމަ ދެ ލަނޑު ޖެހީ މަންވީރު އެވެ. އޭނާވަނީ ގްރޫޕް ސްޓޭޖުގައި ރާއްޖެއާ ދެކޮޅަށް ކުޅުނު މެޗުގައިވެސް ލަނޑު ޖަހާފައެވެ. މަންވީރުގެ ފުރަތަމަ ލަނޑު ޖެހީ ދެވަނަ ހާފު ފެށިގެން ތިންވަނަ މިނެޓުގައެވެ. އެނާ ދެވަނަ ގޯލު ޖެހީ މެޗުގެ 69 ވަނަ މިނެޓުގައެވެ. މެޗުގައި އިންޑިޔާގެ ތިންވަނަ ގޯލު ސުމިތް ޖެހީ މެޗުގެ 84 ވަނަ މިނެޓުގައެވެ. ސެމީ ފައިނަލާއި ހަމައަށް ލަނޑެއް ވަދެފައިނުވާ އިންޑިޔާ ކޮޅަށް ޕާކިސްތާނުގެ ލަނޑު ޖަހައިދިނީ 88 ވަނަ މިނެޓުގައި މުހައްމަދު އަލީ އެވެ.

Advertisement

މިމެޗުގެ 86 ވަނަ މިނެޓުގައި ދެޓީމުގެ ކުޅުންތެރިންގެ ދެމެދުގައި ހިނގި ހަމަނުޖެހުމެއްގައި ރެފްރީ ވަނީ އިންޑިޔާގެ ލަލިއަންޒުއާލާ ޗާންގް އަދި ޕާކިސްތާނުގެ މުހުސިން އަލީ އަށް ރަތްކާޑު ދައްކާފައެވެ.

މިފަހަރުގެ މުބާރާތުގައި އިންޑިޔާއިން ނެރެފައިވަނީ 23 އަހަރުން ދަށުގެ ޓީމެކެވެ. ޒުވާން ޓީމެއް މި މުބާރަތަށް ނެރުނީ އަންނަ އަހަރު އޮންނަ އޭޝިއަން ކަޕްގައި އިންޑިޔާގެ ސީނިއަރ ޓީމު ބައިވެރިކުރަން ޖެހޭތީ އެ ކުޅުންތެރިންނަށް މި މުބާރާތުގެ ތަޖުރިބާ ހޯދައި ދިނުމަށްކަމަށް އިންޑިޔާގެ ކޯޗު މީގެ ކުރިން ވަނީ ބުނެފައެވެ. އެގައުމުން ވަނީ 2009 ވަނަ އަހަރުވެސް 23 އަހަރުން ދަށުގެ ޓީމަކާއެކު މި މުބާރާތް ކާމިޔާބު ކޮށްފައެވެ. އެފަހަރު އިންޑިޔާއިން ތަށި ހޯދީ ފައިނަލުގައި ރާއްޖެ ބަލިކޮށްގެންނެވެ. އެންމެ ފަހުން މި މުބާރާތް ބޭއްވި ތިން ފަހަރުވެސް ފައިނަލުގައި ކުޅެފައިވަނީ އިންޑިޔާއާއި އަފްގާނިސްތާނެވެ.

މުބާރާތުގެ ފައިނަލުގައި އިންޑިޔާ ނުކުންނާނީ ފުރަތަމަ ސެމީ ފައިނަލުން މޮޅުވި ދިވެހި ރާއްޖެއާއެވެ. މި މުބާރާތުގެ ފައިނަލުގައި އިންޑިޔާއާއި ރާއްޖެ ވަނީ ތިން ފަހަރަކު ވާދަކޮށްފައެވެ. އެތަނުން ދެފަހަރު ރާއްޖެ ބަލިކޮށް ޗެމްޕިއަންކަން ހޯދީ އިންޑިޔާއެވެ. މިދެޓީމު ކުޅޭ ފައިނަލް މެޗު ފަށާނީ އަންނަ ހޮނިހިރު ދުވަހުގެ ރާއްޖެ ގަޑިން ހަވީރު 6 ޖަހާއިރު އެވެ.

Advertisement