ލަންކާއިން މެޗެއް ކުޅެފި، އަހަރެމެން ދަނޑަށް އާވާނެ: ސެގާޓް

ސާފް ސުޒުކީ ކަޕްގައި މިއަދު ހަވީރު ސްރީ ލަންކާއާ ދެކޮޅަށް ނުކުންނައިރު މުބާރާތް ކުޅޭ ޑާކާގެ ބަންގުބަންދު ސްޓޭޑިއަމްގައި ރާއްޖެއަށް ފަރިތަކުރުމުގެ ފުރުސަތު ނުލިބުމުން ލަންކާއަށް ފައިދާ ކުރާނެކަމަށް ރާއްޖޭގެ ގައުމީ ފުޓްބޯޅަ ޓީމުގެ ކޯޗު ޕީޓަރ ސެގާޓް ބުނެފިއެވެ. ކޯޗު މިހެން ބުނީ މުބާރާތުގައި ލަންކާ ފުރަތަމަ މެޗު މިހާރު ކުޅެފައިވާތީ އެޓީމު ދަނޑަށް ހޭނުމުގެ ފުރުސަތު ބޮޑުވާނެކަމަށް ބުނެއެވެ. ނަމަވެސް މުބާރާތްތެރޭގައި ބަންގުބަންދު ސްޓޭޑިއަމްގައި ޕްރެކްޓިސް ކުރުމުގެ ހުއްދައެއް އެއްވެސް ޓީމަކަށް އިންތިޒާމުކުރާ ފަރާތަކުން ނުދެއެވެ.

“އާއްމު ގޮތެއްގަ ސްޓޭޑިއަމްގަ ފަރިތަކުރުމުގެ ފުރުސަތު ލިބޭ އެކަމު އިއްޔެވެސް މުބާރާތް ކުރިއަށް ދިޔައީމަ އަހަރެމެންގެ ޓްރެއިނިންގް ކެންސަލް ކުރަން ޖެހުނު. އަހަރެމެން ޖެހޭ މިކަން ގަބޫލު ކުރަން. ސްރީ ލަންކާ ކުރީ ދުވަހު މިތާ މެޗެއް ކުޅެފި. އެމީހުނަށް ސްޓޭޑިއަމް އެނގޭނެ. އަހަރެންނަކަށް ނޭނގޭ މީގެ ކުރިން މި ސްޓޭޑިއަމްގަ ލަންކާ ޕްރެކްޓިސް ކުރިކަމެއް” ޕްރެކްޓިސް ކުރާނެ ރަނގަޅު ފެންވަރުގެ ދަނޑެއް ނުލިބޭތީ މީގެ ކުރިންވެސް ފާޑުކިޔާފައިވާ ކޯޗު ބުންޏެވެ.

Advertisement

ސުޒުކީ ކަޕްގެ ގްރޫޕް ބީ ގައި ލަންކާ ވަނީ ފުރަތަމަ މެޗުގައި އިންޑިޔާއާ ވާދަކޮށް 2-0 އިން ބަލިވެފައެވެ. މުބާރާތުގެ ސެމީއަށް ދަތުރުކުރަން މިއަދުގެ މެޗުން ލަންކާއަށް މޮޅުވާން މަޖުބޫރެވެ. މެޗު އެއްވަރު ވެއްޖެނަމަ ލަންކާއަށް ސެމީގެ ޖާގައެއް ލިބޭނީ ގްރޫޕުގެ ފަހު މެޗުގައި އިންޑިޔާ އަތުން ރާއްޖެ ބޮޑު ތަފާތަކުން ބަލިވެގެންނެވެ.

ކޯޗު ބުނީ ލަންކާއަކީ ވަރުގަދަ ޓީމެއް ކަމަށާއި، އެކަމަކު އެއްވެސް ވަރަކަށް ޖެހިލުން ނުވާކަމަށެވެ.

“އަހަރެމެން ސްރީ ލަންކާއަށް އިހުތިރާމް ކުރަން، ސްރީ ލަންކާއަކީ ވަރުގަދަ ޓީމެއް. އެމީހުން ލިތުއޭނިއާއާ ރަނގަޅު ވާދައެއް ކުރި އަދި މީގެ ހައެއްކަ ދުވަސް ކުރިން ބަންގްލަދޭޝް ބަލިކުރި. އެހެންވީމާ އަހަރެމެން ޖެހޭ ވަރަށް ފަރުވާތެރިވާން. ވަރަށް އިހުތިރާމް ކުރަން. އެކަމު އަހަރެމެން އެއްވެސް ބައެއްދެކެ ޖެހިލުމެއް ނުވޭ” ކޯޗު ބުންޏެވެ.

ލަންކާއިން ވަނީ ސާފް ސުޒުކީ ކަޕަށް ތައްޔާރުވުމުގެ ގޮތުން ބަންގްލަދޭޝްއާ ކުޅުނު އެކުވެރިކަމުގެ މެޗު 1-0 އިން މޮޅުވެފައެވެ. ބަންގްލަދޭޝް މެޗުގެ ކުރިން ލަންކާއިން ވަނީ ރަހްމަތްތެރިކަމުގެ ދެމެޗެއް ލިތުއޭނިޔާއާ ދެކޮޅަށް ކުޅެފައެވެ. ފުރަތަމަ މެޗު 0-0 އިން އެއްވަރުވިއިރު ދެވަނަ މެޗުން އެގައުމު ބަލިވީ 2-0 އިންނެވެ.

ސުޒުކީ ކަޕްގައި ރާއްޖެއާއި ލަންކާ މިއަދު ހަވީރު ވާދަކުރާއިރު އެންމެ ފަހުން މި ދެޓީމު މުބާރާތުގައި ބައްދަލުކުރީ 2013 ވަނަ އަހަރުއެވެ. އެމެޗުން ރާއްޖެ މޮޅުވީ 10-0 ގެ ތަފާތު ބޮޑު ނަތީޖާއަކުންނެވެ. ލަންކާއަށް އެންމެފަހުން ރާއްޖެ ބަލިކުރެވިފައިވަނީ 2002 ވަނަ އަހަރު ކުޅުނު ރަހްމަތްތެރިކަމުގެ މެޗެއްގައި 1-0 އިންނެވެ. އޭގެ ކުރިން ލަންކާއިން ވަނީ 2000 ވަނަ އަހަރު ރާއްޖޭގައި ބޭއްވި ގޯލްޑަން ޖުބިލީ ފުޓްބޯޅަ މުބާރާތުގައި މާލޭގައި ކުޅުނު ފައިނަލް މެޗުގައި ޕެނަލްޓީ ޖަހައިގެން ރާއްޖެ ބަލިކޮށްފައެވެ.

ފުޓްބޯޅައިގެ ތާރީހުގައި ލަންކާ އާއި ރާއްޖެ 18 ފަހަރު ބައްދަލުކޮށްފައިވާއިރު ލަންކާ އަށް މޮޅު ވެވިފައިވަނީ ތިން މެޗުންނެވެ. އަށް މެޗުން އެއްވަރުވިއިރު ރާއްޖެ ވަނީ ހަތް ފަހަރު ލަންކާ ބަލިކޮށްފައެވެ.

މިއަދު ހަވީރު ރާއްޖެއާއި ލަންކާ ވާދަކުރާ މެޗު ފަށާނީ ރާއްޖެ ގަޑިން ހަވީރު 6 ޖަހާއިރު އެވެ.

Advertisement