ޔޫރަޕްގެ ގައުމުތަކަށް ހާއްސަ ނޭޝަންސް ލީގު މިރޭ ފަށަނީ

ޔޫރަޕުގެ ގައުމުތަކަށް ހާއްސަކޮށްގެން ޔޫއެފާއިން ބާއްވާ ނޭޝަންސް ލީގު މިރޭ ފަށާނެއެވެ. މި މުބާރާތަކީ ޔޫރަޕުގެ ފުޓުބޯޅަ އެސޯސިއޭޝަނުން ފީފާ އިންޓަރނޭޝަނަލް ބްރޭކުގައި ކުޅެން ހަމަޖައްސާފައިވާ ލީގު އުސޫލުން ކުޅޭ މުބާރާތެކެވެ.

މި މުބާރާތުގައި ޔޫއެފާގެ މެމްބަރު 55 ގައުމު ވަނީ ރޭންކިން އަށް ބެލުމަށްފަހު 4 ލީގަކަށް ބަހާލެވިފައެވެ. ލީގު-އޭ އަދި ލީގު-ބީ، ކޮންމެ ލީގެއްގައި 12 ޓީމު ހިމެނޭއިރު، ލީގު-ސީ ގައި 15 ޓީމު އަދި ލީގު-ޑީ ގައި 16 ޓީމު ހިމެނެއެވެ. ކޮންމެ ލީގެއްވެސް ކުޅެވިގެން ދާނީ 4 ގުރޫޕަކަށް ބަހާލައިގެންނެވެ.

ލީގު އޭގެ ހަތަރު ގްރޫޕުގެ ތެރެއިން އެއްވަނަ ހޯދާ ހަތަރު ޓީމު މުބާރާތުގެ ނޮކްއައުޓް ސްޓޭޖަށް ދަތުރުކުރާނެއެވެ. ނޮކްއައުޓް ސްޓޭޖުގައި ހިމެނެނީ ސެމީ ފައިނަލާއި ފައިނަލުގެ އިތުރުން ތިންވަނަ ހޮވާ މެޗެވެ. މި މެޗުތައް ކުޅެވޭނީ ލީގު އޭ އިން އެއްވަނަ ހޯދާ ހަތަރު ގައުމުގެ މެދުގައެވެ. 2019 ވަނަ އަހަރުގެ ޖޫން 5 އަދި 6 ގައި ސެމީ ފައިނަލް ކުޅުމަށް ހަމަޖެހިފައި ވާއިރު ތިންވަނަ ހޮވާ މެޗާއި ފައިނަލް މެޗު ކުޅުމަށް ހަމަޖެހިފައި ވަނީ ޖޫން 9 ވަނަ ދުވަހުއެވެ. މި މުބާރާތުގެ ލީގު މެޗުތައް ހޯމް އެންޑް އަވޭ އުސޫލުން ދެލެގު ކުޅުމަށް ހަމަޖެހިފައިވާއިރު ސެމީ ފައިނަލުގައި ކުޅެވިގެންދާނީ އެންމެ ލެގެކެވެ. ސެމީ ފައިނަލާއި ފައިނަލް މެޗު ކުޅޭނެ ދަނޑުތައް ޔޫއެފާއި އަދި އިއުލާން ކޮށްފައެއް ނުވެއެވެ. މި މުބާރާތުގެ ޗެމްޕިއަންކަން ކަނޑައެޅިގެންދާނީ ކޮންމެ ދެ އަހަރަކުން އެއް އަހަރުއެވެ.

ނޭޝަންސް ލީގުގައި ހިމެނޭ ލީގު އޭ، ބީ އަދި ސީ ގެ ގުރޫޕްތަކުގެ ފުލަށްދާ ޓީމުތައް 2020/21 ވަނަ އަހަރު އޮންނަ މުބާރާތުގައި ޖެހިގެން އޮންނަ ލީގަށް ރެލިގޭޓް ވާއިރު، ލީގު ބީ، ސީ އަދި ޑީ ގެ ގުރޫޕްތަކުން އެއްވަނަ ހޯދާ ޓީމެއް އެއަށްވުރެ މަތީ ލީގަކަށް ޕްރޮމޯޓް ވާނެއެވެ. ލީގު ބީ، ސީ، އަދި ޑީ ގައިވެސް ހަމައެކަނި ކުޅޭނީ ގްރޫޕް ސްޓޭޖުގެ މެޗުތަކެވެ.

ހަތަރު ލީގުގައި 16 ގްރޫޕް ހިމެނޭއިރު ކޮންމެ ގްރޫޕަކުންވެސް ޗެމްޕިއަންކަން ހޯދާ ގައުމަކަށް 2020 ވަނަ އަހަރު ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތަށް ކޮލިފައިވުމުގެ ގޮތުން ކުޅެވޭ ޕްލޭ އޮފުން ފުރުސަތު ލިބޭނެއެވެ. މީގެ ކުރިން ޔޫރޯ ކޮލިފައިންގައި ގްރޫޕުގެ ތިންވަނައަށްދާ ގައުމުތަކަށް ޕްލޭ އޮފުން ފުރުސަތު ލިބުނު ނަމަވެސް ދެން މި ފުރުސަތު ލިބޭނީ ނޭޝަން ލީގުގެ 16 ގްރޫޕުގެ ޗެމްޕިއަނުންނަށެވެ. ނަމަވެސް 16 ގައުމުގެ ތެރޭގައި ޔޫރޯއަށް ކޮލިފައިވެފައިވާ ގައުމެއް ހިމެނޭނަމަ ލީގުގައި އެންމެ ރަނގަޅަށް ރޭންކު ކުރެވިފައި އިންނަ އިތުރު ޓީމަކަށް ޔޫރޯ 2020 ގެ ޕްލޭއޮފުން ފުރުސަތު ލިބޭނެއެވެ.

2020 ވަނަ އަހަރުގެ ޔޫރޯ ފުޓްބޯޅަ މުބާރާތް ބާއްވަން ޔޫއެފާއިން ނިންމާފައިވަނީ ތަފާތު 12 ގައުމެއްގައެވެ. މި ބަދަލާއެކު އެއްވެސް ގައުމެއް ދެން އޮންނަ ޔޫރޯ ފުޓްބޯޅަ މުބާރާތަށް އޮޓަމެޓިކުން ކޮލިފައިއެއް ނުވާނެއެވެ. ނަމަވެސް އެހެން މުބާރާތް ތަކެކޭވެސް އެއްގޮތަށް ޔޫރޯ ކޮލިފައިން 2020 ވަނަ އަހަރުގެ މުބާރާތުގައި ކުރިއަށްދާނެއެވެ.

މި ބަދަލާއެކު ފީފާއިގައި ރެޖިސްޓަރ ކޮށްގެން ކުޅޭ އެކުވެރިކަމުގެ މެޗުތައް ވަރަށް ބޮޑުތަން މަދުވެ ދެން ފެނިގެންދާނީ ނޭޝަންސް ލީގުގެ ވާދަވެރި މެޗުތަކެކެވެ.

މި މުބާރާތުގައި އެންމެ ފޯރިގަދަ މެޗުތަކެއް ކުޅެވިގެންދާނީ ލީގު އޭގައި ހިމެނޭ ޓީމުތަކުގެ މެދުގައެވެ. ލީގު އޭގައި މިރޭ ކުޅޭ މެޗުގައި ދުނިޔޭގެ ޗެމްޕިއަން ފްރާންސް ނުކުންނާނީ ޖާމަނީއާ ދެކޮޅަށެވެ. މި މެޗު ފެށުމަށް ހަމަޖެހިފައިވަނީ ރާއްޖެ ގަޑިން މިރޭ 11:45 ގައެވެ.

ލީގު އޭ ގައި ހިމެނޭ ޓީމުތައް

ގްރޫޕް އެކެއް: ފްރާންސް، ޖާމަނީ، ނެދަލޭންޑްސް،

ގްރޫޕް ދޭއް: ބެލްޖިއަމް، އައިސްލޭންޑް، ސްވިޒަލޭންޑް

ގްރޫޕް ތިނެއް: އިޓަލީ، ޕޮލެންޑް، ޕޯޗުގަލް

ގްރޫޕް ހަތަރެއް: ކްރޮއޭޝިޔާ، އިންގްލެންޑް، ސްޕެއިން