ފެންވަރު ސާބިތުކޮށްދޭން މަރިއާނޯ އެނބުރި ރެއާލްއަށް

މިދިޔަ ސީޒަނުގައި ފްރާންސްގެ އޮލިމްޕިކް ލިޔޯންގައި މޮޅު ކުޅުމެއްދެއްކި މަރިއާނޯ ޑިއާޒް އެނބުރި ރެއާލް މެޑްރިޑަށް ގެންގޮސްފިއެވެ. ސްޕޭންއަށް އުފަން އުމުރުން 25 އަހަރުގެ މަރިއާނޯ އަކީ 2012 އަހަރު ރެއާލް މެޑްރިޑްގެ ޔޫތް ޓީމުގައި ކުޅުމަށްފަހު 2017 ވަނަ އަހަރާ ހަމައަށް ސީނިއާ ޓީމަށްވެސް ކުޅެފައިވާ ކުޅުންތެރިއެކެވެ.

މީގެ އެއް އަހަރުކުރިން 8 މިލިއަން ޕައުންޑަށް ލިޔޯންއަށް ބަދަލުވުމަށްފަހު މިދިޔަ ސީޒަނުގައި މަރިއާނޯ ވަނީ އެޓީމަށް ކުޅެދިން 43 މެޗުގައި 20 ގޯލު ޖަހައިދީފައެވެ. ކުރިއަށް ކުޅޭ މަރިއާނޯ އަނބުރާ ރެއާލަށް ގެންދަން އެޓީމުން ޝައުގުވެރިވީ މިދިޔަ ސީޒަނަށްފަހު އެޓީމުގެ ކްރިސްޓިއާނޯ ރޮނާލްޑޯ ޔުވެންޓަސް އަށް ބަދަލުވުމުންނެވެ. ރެއާލުން މަރިއާނޯއާއެކު އެއްބަސްވުމަކަށް އައިސްފައިވަނީ 33 މިލިއަން ޕައުންޑަށް ކަމަށް ރިޕޯޓުތައް ބުނެއެވެ. މަރިއާނޯގެ 35 އިންސައްތަ ހިއްސާ ރެއާލްގައި އޮތުމާއެކު އެޓީމުން ލިޔޯންއަށް ދައްކަން ޖެހޭނީ އޭގެތެރެއިން 22 މިލިއަން ޔޫރޯ އެވެ. މިއީ ކްރިސްޓިއާނޯ ރޮނާލްޑޯ ކްލަބް ދޫކޮށްލުމުން އޭނާ ނެތްތަން ފޫބެއްދުމަށް ރެއާލުން ކުރި ހަރަދެއް ކަމަށް ރިޕޯޓުތައް ބުނެއެވެ.

Advertisement

މަރިއާނޯ ގެންދަން އެންމެ ފުރަތަމަ ޝައުގުވެރިކަން ފާޅުކުރީ ސްޕޭންގެ ސެވިއްޔާއިންނެވެ. ސެވިއްޔާގެ ރައީސް ޖޯސޭ ކާސްޓްރޯ ބުނެފައިވަނީ މަރިއާނޯ އެ ކްލަބާއެކު އެއްބަސްވުމަކަށްވެސް އައިސްފައިވާކަމަށެވެ. ނަމަވެސް ރެއާލް މެޑްރިޑުން ޝައުގުވެރިކަން ފާޅުކުރުމުން މަރިއާނޯ ވަނީ ކްލަބް ދޫކޮށްލަން ބޭނުންވާ ކަމަށްބުނެ ފަސް އަހަރު ދުވަހުގެ މުއްދަތަކަށް ރެއާލްއަށް ބަދަލުވެފައެވެ.

“މަރިއާނޯ ބުނި ކްލަބް ދޫކޮށްލަން ބޭނުންވާކަމަށް. ސެވިއްޔާއިން އޮފާ ލިބުނީ އެއްވެސް ވަރަކަށް މުއާމަލާތު ނުކޮށް އުޅެނިކޮށް. އޭގެ ފަހުން ރެއާލް މެޑްރިޑުން އޭނާ ގަންނަން އަގު ހުށަހެޅުމުން ދޫކޮށްލީ ކުޅުންތެރިޔާ ބޭނުންވާ ގޮތަށް އެކަން ކުރުމަށް” މަރިއާނޯގެ ޓްރާންސްފާއާއި ގުޅޭގޮތުން ލިޔޯންގެ ރައީސް ޖީން މިޝެލް އައުލަސް ބުންޏެވެ.

މަރިއާނޯ ރެއާލް މެޑްރިޑަށް ބަދަލުވުމަށްފަހު ފުރަތަމަ އެގާރައިން ޖާގަ ހޯދަން ބޭނުންނަމަ ވާދަކުރަން ޖެހޭނީ މިވަގުތު ފޯމުގައި ތިބި ކަރިމް ބެންޒެމާ އާއި ގަރެތް ބޭލް އަދި މާކޯ އެސެންސިއޯ އާއެވެ.

ސްޕޭންއަށް އުފަން ނަމަވެސް މަރިއާނޯ ވަނީ އޭނާގެ މަންމަގެ ގައުމު ޑޮމިނިކަން ރިޕަބްލިކް ގައުމީ ޓީމަށް 2013 ވަނަ އަހަރު އެއް މެޗު ކުޅެދީފައެވެ. ރަހްމަތްތެރިކަމުގެ މެޗެއްގައި އެގައުމަށް އެއްމެޗު ކުޅެދިނުމަށްފަހު މަރިއާނޯ ވަނީ ކްލަބަށް ވަގުތު ދިނުމަށާއި، ސްޕޭންގެ ގައުމީ ޓީމަށް ކުޅެން ބޭނުންވުމުން އެގައުމަށް ކުޅުން ހުއްޓާލާފައެވެ. މަރިއާނޯއަށް ސްޕޭންގެ ގައުމީ ޓީމަށް ކުޅުމުގެ ފުރުސަތުވެސް އޮތްއިރު ވޯލްޑް ކަޕަށް ސްޕޭން ކޮލިފައި ކޮށްދިން ކޯޗު ޖޫލެން ލޮޕެޓީގު ބުނެފައިވަނީ މަރިއާނޯއަށް އަދި ސްޕޭންގެ ގައުމީ ޓީމުން ފުރުސަތު ލިބިގެންދާނެކަމަށެވެ. ލޮޕެޓީގަކީ މިހާރު ރެއާލް މެޑްރިޑްގެ ކޯޗެވެ.

މަރިއާނޯގެ ބަދަލުގައި ލިޔޯން އިން ފާރަލަމުން އަންނަނީ ސެލްޓިކަށް ކުޅޭ މޫސާ ޑެމްބެލޭ އަށެވެ. ޑެމްބެލޭ ގެންދިއުމަށް ވާދަވެރި މާސޭއިންވެސް މަސައްކަތް ކުރާއިރު ޑެމްބެލޭ ގުޅުމުގެ ފުރުސަތު ބޮޑީ ލިޔޯންއާކަމަށް އެޓީމުން ބުނެއެވެ.

Advertisement