މިނާ، ގޮމޭޒް އަދި ބާނާޑް ވެސް އެވަޓަން އަށް!

ސްޕެއިންގެ ބާސެލޯނާއަށް ކުޅޭ ޔެރީ މިނާއާއި އަންޑްރޭ ގޮމޭސްގެ އިތުރުން ޝަކްތަރ ޑޮނެސްކްގެ ބާނާޑް ވެސް އިނގިރޭސި ކުލަބް އެވަޓަން އަށް ބަދަލުވެއްޖެއެވެ.

ފްރީ ޓްރާންސްފާއެއްގެ ދަށުން ބްރެޒިލްގެ ވިންގާ، ބާނާޑް ޓްރާންސްފާ ޑެޑްލައިން ޑޭގައި އެވަޓަން އަށް ސޮއިކުރީ ހަތަރު އަހަރުގެ އެއްބަސްވުމެއްގެ ދަށުންނެވެ. 27.19 މިލިއަން ޕައުންޑަށް ކޮލަމްބިއާގެ ސެންޓަބެކް ޔެރީ މިނާ ބާސެލޯނާ ދޫކޮށް އެވަޓަން އަށް އައިއިރު، މިޑްފީލްޑަރ އަންޑްރޭ ގޮމޭޒް އެވަޓަންއާ ގުޅުނީ އެއް އަހަރުދުވަހުގެ ލޯން އެއްބަސްވުމެއްގެ ދަށުންނެވެ.

Advertisement

މި ތިން ކުޅުންތެރިންގެ އިތުރުން ބާސެލޯނާގެ  25 އަހަރުގެ ފުލްބެކް، ފްރާންސްގެ  ލޫކަސް ޑިގްނޭ ވެސް ވަނީ 18 މިލިއަން ޕައުންޑަށް ފަސް އަހަރުދުވަހުގެ އެއްބަސްވުމެއްގެ ދަށުން އެވަޓަންއާ ގުޅިފައެވެ.

ޑިގްނޭ (ކ)، ރިޗާލިސަން (މ) އަދި ބާނާޑް (ވ).

އާސީޒަނަށް ތައްޔާރުވުމުގެ ގޮތުން އެވަޓަން އިން ވަނީ މި ހޫނުމޫސުމުގެ ޓްރާންސްފާ ބާޒާރުގައި ވޮޓްފޯޑަށް ކުޅޭ ބްރެޒިލްގެ ޒުވާން ފޯވަޑް ރިޗާލިސަން ވެސް، ކުލަބުގެ ރެކޯޑް ފީއަކަށް ގެނެސްފައެވެ. 35 މިލިއަން ޕައުންޑަށް 21 އަހަރުގެ ރިޗާލިސަން އެވަޓަން އާގުޅުނީ ފަސް އަހަރުދުވަހުގެ އެއްބަސްވުމެއްގެ ދަށުންނެވެ.

ވޭތުވެދިޔަ ސީޒަނުގައި އެވަޓަން އަށް ކުޅުނު އިނގިރޭސިވިލާތުގެ ފޯވަޑް ވޭން ރޫނީ ހިލޭ ޓްރާންސްފާއެއްގެ ދަށުން އެމެރިކާގެ ޑީސީ ޔުނައިޓެޑާ ގުޅިފައިވާއިރު، އެވަޓަން އިން ވަނީ އެޓީމުގެ ހޮލެންޑްގެ މިޑްފީލްޑަރ ޑެވީ ކްލާސަން 12 މިލިއަން ޕައުންޑަށް ޖަރުމަނުގެ ވާޑާ ބްރޭމަންއަށް ވިއްކާލާފައެވެ.

Advertisement