މާރޭޒްގެ ބަދަލުގައި ލެސްޓާރ އިން އަނެއްކާވެސް އަލްޖީރިއާގެ ކުޅުންތެރިއެއް

2015 ވަނަ އަހަރު ލެސްޓާރ ސިޓީއަށް ޕްރިމިއަރ ލީގް ތަށި ހޯދައިދިނުމުގައި މުޙިއްމު ދައުރެއް އަދާކުރި ރިޔާޒް މާރޭޒް 60 މިލިއަން ޕައުންޑްގެ އަގަކަށް އެންމެފަހުގެ ޗެމްޕިއަން މެންޗެސްޓާރ ސިޓީއަށް ބަދަލުވުމާ ގުޅިގެން އޭނާ ނެތްތަން ފޫބައްދަން ފްރާންސްގެ މޮނާކޯއަށް ކުޅެމުން އަންނަ އަލްޖީރިއާގެ ވިންގާ ރާޝިދު ގެޒާލްގެ ސޮއި އެޓީމުން ހޯދައިފިއެވެ.

ހަތަރު އަހަރުގެ ކޮންޓްރެކްޓެއްގައި އުމުރުން 26 އަހަރުގެ ގެޒާލް ލެސްޓާރ އަށް ސޮއިކުރީ 10 މިލިއަން ޕައުންޑުގެ އަގަކަށެވެ.

Advertisement

ފްރާންސްގެ ލިޔޯން އިން ފުޓުބޯޅަ ކެރިއަރުފެށި ގެޒާލްވަނީ އެޓީމަށް 110 މެޗުކުޅެދީ 14 ގޯލް ކާމިޔާބުކޮށްފައެވެ. 2017 ވަނަ އަހަރުގެ އޮގަސްޓު މަހު ގެޒާލް ފްރީ ޓްރާންސްފާރ އެއްގައި މޮނާކޯއަށް ބަދަލުވިއެވެ. އަދި އެޓީމަށް ކުޅެދިން 33 މެޗުގައި އޭނާވަނީ 2 ގޯލް ކާމިޔާބުކޮށްފައެވެ.

ފްރާންސްއަށް އުފަން ކުޅުންތެރިއެއް ނަމަވެސް 2017 ވަނަ އަހަރު އޭނާވަނީ އެފްރިކަން ކަޕް އޮފް ނޭޝަންސްގައި އަލްޖީރިއާ ތަމްޞީލުކޮށްފައެވެ.

ގެޒާލް އަކީ ލެސްޓާރ ސިޓީއިން މި ޓްރާންސްފާރ ބާޒާރުގައި ސޮއިކުރި 5 ވަނަ ކުޅުންތެރިޔާއެވެ. މީގެކުރިން ލެސްޓާރ ސިޓީ އިންވަނީ ގޯލްކީޕާރ ޑެނީ ވޯޑް، ޑިފެންޑަރ ރިކާޑޯ ޕެރޭރާ އާއި ޖޮނީ އިވަންސްގެ އިތުރުން މިޑްފީލްޑަރ ޖޭމްސް މެޑިސަން އެޓީމަށް ސޮއިކުރުވާފައެވެ.

ގެޒާލް އަކީ ލެސްޓާރގެ ކޯޗު ކްލައުޑް ޕުއެލް ލިޔޯންގައި ހުރި ދުވަސްވަރު އޭނާގެ ދަށުން މަސައްކަތްކުރި ކުޅުންތެރިއެކެވެ.

Advertisement